સ્કંદ પુરાણ · શ્લોક 2.7-6

॥ સ્કન્દ ઉવાચ ॥
ભૂમધ્યગઃ સ રાજાઽથ સ્વકૃતં કર્મ ગર્હયન્ ॥
અનુતપ્યમાનશ્ચ ભૃશં માનયંસ્તાબૃહન્મુનીન્ ॥
જજાપ ભગવન્મન્ત્રં ત્ર્યક્ષરં મનસા સદા

તત્રાપિ પરયા ભક્ત્યા પઞ્ચકાલં સ્વચેતસા ॥
અયજદ્ધરિં સુરપતિં ભૂમેર્વિવર આદરાત્

તતોઽસ્ય તુષ્ટો ભગવાન્વાસુદેવો જગત્પતિઃ ॥ આપદ્યપિ યથાકાલં યથાશાસ્ત્રં સ્વમર્ચતઃ

વરદો ભગવાન્વિષ્ણુઃ સમીપસ્થં દ્વિજોત્તમમ્ ॥ ગરુત્મન્તં મહાવેગમાબભાષે સ્વયં તતઃ

શ્રીભગવાનુવાચ ॥
દ્વિજોત્તમ મહાભાગ ગમ્યતાં વચનાન્મમ ॥
સમ્રાડ્રાજા વસુર્નામ ધર્માત્મા માં સમાશ્રિતઃ

બ્રહ્માતિક્રમદોષેણ પ્રવિષ્ટો વસુધાતલમ્ ॥
તન્માનના કૃતા તેન તદ્ગચ્છાદ્ય તદન્તિકમ્

ભૂમેર્વિવરસંગુપ્તં ગરુડૈનં મમાજ્ઞયા ॥
અધશ્ચરં નૃપશ્રેષ્ઠં ખેચરં કુરુ મા ચિરમ્

સ્કન્દ ઉવાચ ॥
ગરુત્માનથ વિક્ષિપ્ય પક્ષૌ મારુતવેગવાન્ ॥
વિવેશ વિવરં ભૂમ્યા યત્રાસ્તે વાગ્યતો વસુઃ

તત એનં સમુત્ક્ષિપ્ય સ્વચઞ્ચ્વા વિનતા સુતઃ ॥
ઉત્પપાત નભસ્તૂર્ણં તત્ર ચૈનમમુઞ્ચત

તસ્મિન્મુહૂર્ત્તે સંજજ્ઞે રાજોપરિચરઃ પુનઃ ॥
સશરીરો ગતઃ સ્વર્ગં પરમં સુખમાપ્તવાન્

એવં તેનાપિ બ્રહ્મર્ષે વાગ્દોષાત્સદવજ્ઞયા ॥
પ્રાપ્તા ગતિરયજ્વાર્હા ધર્મજ્ઞેન મહાત્મના

કેવલં પુરુષસ્તેન સેવિતો હરિરીશ્વરઃ ॥
તતઃ શીઘ્રં જહૌ પાપં સ્વર્ગલોકમવાપ ચ

ભુઞ્જાનો વિવિધં સૌખ્યં મનોભીષ્ટં ચ તત્ર સઃ ॥
ઉવાસાન્યો યથા શક્રો ગીયમાનયશાઃ સુરૈઃ

તમેકદા વિમાનેન ચરન્તં સૂર્યસન્નિભમ્ ॥
અદ્રિકાપ્સરસા યુક્તમચ્છોદા સમવૈક્ષત

સા હિ સોમપદસ્થાનાં પિતૄણાં માનસી સુતા ॥
અગ્નિષ્વાત્તાભિધાનાનામમૂર્ત્તાનાં મહાત્મનામ્

અમૂર્ત્તત્વાત્પિતૄન્સ્વાન્સા ન જાનન્તી શુચિસ્મિતા ॥
તં વસું પિતરં મેને સ ચ તામાત્મજામિવ

તૌ તતઃ પિતરઃ શેપુર્ભાવં દૃષ્ટ્વેદૃશં તયોઃ ॥
કન્યે ત્વમસ્ય નૃપતેર્ભુવિ કન્યા ભવિષ્યસિ

વસો ત્વં માનુષો ભૂત્વા સુતામેનાં સ્વયોષિતિ ॥
અસ્યામેવાપ્સરાયાં ત્વં જનયિષ્યસિ નિશ્ચિતમ્

ઇત્થં તૌ પિતૃભિઃ શપ્તૌ શાપમોક્ષાય તાસ્તતઃ ॥
પ્રાર્થયામાસતુર્ન્નત્વા તદોચુસ્તે કૃપાલવઃ

અવશ્યમિત્થં ભાવિત્વાદ્યુવાભ્યામુપલમ્ભિતઃ ॥
શાપોઽયં તત્ર યુવયોઃ શ્રેય એવ ભવિષ્યતિ

અષ્ટાવિંશે દ્વાપરે તુ વસો ત્વં ભુવિ ભૂપતેઃ ॥
કૃતયજ્ઞસ્ય તનયો ભવિતાસિ મહાત્મનઃ

તત્રાપિ ચ યથેદાનીં તથા ત્વં સકલૈર્ગુણૈઃ ॥
જુષ્ટશ્ચ ખચરો ભાવ્યો મહાભાગવતાગ્રણીઃ

પઞ્ચરાત્રોક્તવિધિના વિષ્ણુમભ્યર્ચ્ય ભક્તિતઃ ॥
તચ્છેષેણ સુરાંશ્ચાસ્માનર્ચયિષ્યસિ સપ્રજઃ

તતસ્ત્વં દિવ્યદેહેન સ્વર્ગલોકમવાપ્સ્યસિ ॥
દિવ્યાન્ભોગાંસ્તત્ર ભુક્ત્વા પ્રાપ્સ્યસે વૈષ્ણવં પદમ્ ॥

અચ્છોદે ત્વમપિ ક્ષોણ્યાં નામ્ના કાલીતિ વિશ્રુતા ॥
સ્વાંશેન મત્સ્યદેહાયામદ્રિકાયાં જનિષ્યસે

પરાશરાત્તત્ર સુતં કન્યેવ પ્રાપ્સ્યસે હરિમ્ ॥
પ્રસાદાદેવ તસ્ય ત્વં ભુક્તિં મુક્તિં ચ લપ્સ્યસે

સ્કન્દ ઉવાચ ॥
ઇત્થં સ પિતૃભિઃ શપ્તોઽનુગૃહીતશ્ચ ભૂપતિઃ ॥
કૃતયજ્ઞાદિહ જનિં પ્રાપ્યાઽભૂદ્વિશ્રુતો ગુણૈઃ

યથા પૂર્વં કૃષ્ણભક્તો દૈવપિત્ર્યવિધાનવિત્ ॥
સખ્યે તસ્મૈ મહેન્દ્રશ્ચ પ્રાદાત્પ્રચુરસંપદઃ

શ્વેતદ્વીપે વાસુદેવાત્પ્રાપ્તો યો વિજયધ્વજઃ ॥
પુરા સ્વેનારિનાશાર્થં તસ્મા ઇન્દ્રસ્તમપ્યદાત્

અન્તરિક્ષગતી રાજા ભૌમાન્ભોગાન્સુદુર્લભાન્ ॥
ભુક્ત્વાન્તે સ્વર્ગલોકં ચ દિવ્યદેહેન લબ્ધવાન્

પ્રાક્પુણ્યશેષસ્ય ફલં ભુઞ્જન્સ્વમનસેપ્સિતાન્॥
તત્ર ભોગાન્બહુવિધાંસ્તીવ્રં વૈરાગ્યમાપ્તવાન્

મેરોઃ શૃઙ્ગેઽથ વિજને શુચિઃ કૃતદૃઢાસનઃ ॥
દધ્યૌ સ્વહૃદયામ્ભોજે સ્વેષ્ટદેવં રમાપતિમ્

ત્યક્ત્વા દેવવપુઃ સોઽથ યોગધારણયા મુનિઃ ॥
તતઃ સૂક્ષ્મશરીરેણ પ્રાપ ભાસ્કરમણ્ડલમ્ ॥
યદાહુર્નૈષ્ઠિકાનાં ચ મુક્તિદ્વારં હિ યોગિનામ્

તત્તેજોદગ્ધસૂક્ષ્માઙ્ગઃ સચ્ચિદૂપોઽતિનિર્મલઃ॥
સ બભૂવ મહાભાગઃ સંક્ષીણાશેષવાસનઃ

તતસ્તન્મણ્ડલગતૈરાતિવાહિકદૈવતૈઃ॥
સ નિન્યે વૈષ્ણવં ધામ શ્વેતદ્વીપાખ્યમદ્ભુતમ્

સ હિ દ્વીપો ભુવિસ્થોપિ ભવત્યપ્રાકૃતો મુને ॥
હરિભક્તજનાવાસઃ પ્રાપ્ય એકાન્તભક્તિભિઃ

સ ગોલોકબ્રહ્મપુરવૈકુણ્ઠાનાં ચ સુવ્રત ॥
દ્વારભૂતોસ્તિ ભક્તાનાં તલ્લિપ્સૂનાં મહાત્મનામ્

યસ્ય યદ્ધામ્ન ઇચ્છા સ્યાદ્ભજતસ્તં તદેવ હિ ॥
પ્રાપયન્તિ શ્વેતમુક્તા મુને પ્રાગુક્તલક્ષણાઃ

દિવ્યદેહોઽભવત્તત્ર ધામ્ન્યઽસૌ શ્વેતમુક્તવત્ ॥
પ્રાપ્ય ગોલોકધામાઽથ પરમાનન્દમાપ્તવાન્

ઇત્થમેકાન્તિકેનૈવ ધર્મેણારાધયન્તિ યે ॥
નારાયણં પરં બ્રહ્મ શ્વેતમુક્તા ભવંતિ તે

એતત્તે સર્વમાખ્યાતં પૃષ્ટવાન્યદ્ભવાન્મુને ॥
સ્થિતિરેકાંતભક્તાનાં શ્વેતધામ્નશ્ચ લક્ષણમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવાસુદેવમાહાત્મ્ય ઉપીરચરવસુમોક્ષનિરૂપણં નામ સપ્તમોઽધ્યાયઃ