સ્કંદ પુરાણ · શ્લોક 2.32-3

॥ સ્કન્દ ઉવાચ ॥
ઇતિ સ્તુત્વા તમીશાનં નારદઃ સ યયૌ તતઃ ॥
શમ્યાપ્રાસાભિધં બ્રહ્મન્વ્યાસસ્યાશ્રમમાદિતઃ

સાદરં માનિતસ્તેન પ્રત્યુત્થાનાસનાદિભિઃ ॥
તસ્મા એકાન્તિકં ધર્મ્મં પ્રાહ જિજ્ઞાસવે સ ચ

તતો બ્રહ્મસભાં ગત્વા બ્રહ્મણઃ શૃણ્વતો મુનિઃ ॥
દેવાન્પિતૄન્મહર્ષીંશ્ચ તત્રસ્થાંસ્તમુપાદિશત્

તત્રસ્થિતો ભાસ્કરશ્ચ ધર્મ્મમેતં પુનર્મ્મુને ॥
શુશ્રાવ નારદાત્સર્વં શ્રુતં નારાયણાત્પુરા

સ પ્રાહાત્માગ્રયાયિભ્યો વાલખિલ્યેભ્ય આદરાત્ ॥
મેરૌ તે સંગતાન્દેવાનિન્દ્રાદીંશ્ચ ન્યશામયન્

તેભ્યોઽસિતો મુનિઃ શ્રુત્વા ધર્મમેતં દ્વિજોત્તમ ॥
પિતૃભ્યઃ કથયામાસ પિતૃલોકં ગતઃ ક્વચિત્

પિતરસ્તે ત્વર્યમાદ્યા ઊચિરે શંતનું નૃપમ્ ॥
સ ભીષ્માય સ્વપુત્રાય કથયામાસ તત્ત્વતઃ

સોપિ ભારતયુદ્ધાન્તે ધર્મ્મરાજાય પૃચ્છતે ॥
શયાનઃ શરશય્યાયાં પ્રાહ સંસદિ ભૂયસિ

તત્ર શ્રુત્વા નારદોપિ સ્થિતઃ સદસિ સાદરમ્ ॥
કૈલાસે શંકરં પ્રાહ સ ચ માં મુનિસત્તમ

મયા તે કથિતં બ્રહ્મન્પૃચ્છતે ધર્મ્મવર્ત્તિને ॥
પાત્રાયૈતત્પ્રદાતવ્યમિતિ માં હિ પિતાબ્રવીત્

યેનયેન શ્રુતં હ્યેતન્માહાત્મ્યં સાત્વતાંપતેઃ ॥
સ સ તસ્મિન્પરાં ભક્તિં ચકાર સ્વવિમુક્તયે

યુધિષ્ઠિરોપિ રાજર્ષિઃ શ્રુત્વા ભીષ્મેણ કીર્ત્તિતમ્ ॥
માહાત્મ્યં દેવકીસૂનોર્મ્મુમુદે ભ્રાતૃભિઃ સહ

તમાત્મનો માતુલેયં સર્વકારણકારણમ્ ॥
નિશમ્યાશ્ચર્ય્યજલધૌ નિમમજ્જ મહામતિઃ

વાસુદેવાદિકં વ્યૂહ વારાહાદીંશ્ચ સર્વ્વશઃ ॥
અવતારાનપિ નૃપો મેનેઽસ્યૈવ રમાપતેઃ

તતઃ સહાનુજો રાજા દિવ્યમાનુષવિગ્રહે ॥
અત્યન્તં ભક્તિમાન્કૃષ્ણે બભૂવ દ્વિજસત્તમ

શ્રુત્વેમાં ચ કથાં સર્વ્વે બ્રહ્મરાજસુરર્ષયઃ ॥
સભાયાં તત્ર યે ચાસંસ્તેપ્યભૂવન્સવિસ્મયાઃ

કૃષ્ણમેવ પરં બ્રહ્મ વિદિત્વા તે નરાકૃતિ ॥
ભક્તિં પ્રપેદિરે તસ્મિન્પ્રણમન્તસ્તમાદરાત્

ઇત્થં તસ્યાસ્તિ માહાત્મ્યમતસ્ત્વમપિ સન્મતે ॥
સર્વાત્મના વાસુદેવં તમેવ ભજ ભક્તિતઃ

શ્રીવાસુદેવમાહાત્મ્યમેતત્તે કથિતં મયા ॥
દુર્વાસનોપશમનં ભગવદ્ભક્તિવર્દ્ધનમ્

કથિતાનિ પુરાણેઽત્ર મયાખ્યાનાનિ યાનિ તે ॥
તેષાં સાર ઇદં બ્રહ્મન્નિર્મ્મથ્યૈવ સમુદ્ધૃતઃ

વેદોપનિષદાં ચૈતદ્રસો વૈ સાંખ્યયોગયોઃ ॥
પઞ્ચરાત્રસ્ય કૃત્સ્નસ્ય ધર્મશાસ્ત્રસ્ય ચાનઘ

ધન્યં યશસ્યં ચાયુષ્યમેતત્પરમમઙ્ગલમ્ ॥
સાક્ષાદ્ભગવતા ગીતં સર્વાભદ્રવિનાશનમ્

ય એતચ્છૃણુયાત્પુણ્યં કીર્ત્તયેદથ યઃ પઠેત્ ॥
વાસુદેવે ભવેત્તેષામચલા નિર્મલા મતિઃ

ભક્તા એકાન્તિકાસ્તે ચ ભવેયુસ્તસ્ય માનવાઃ ॥
બ્રહ્મરૂપા વ્રજન્ત્યન્તે બ્રહ્મધામ તમઃપરમ્

ધર્માર્થી લભતેઽનેન ધર્મં કામં ચ કામુકઃ ॥
ધનાર્થી ધનમાપ્નોતિ મોક્ષાર્થી મોક્ષમુત્તમમ્

લભેત વિદ્યાં વિદ્યાર્થી મુચ્યેદ્રુગ્ણશ્ચ રોગતઃ ॥
એતચ્છ્રવણમાત્રેણ સર્વપાપક્ષયો ભવેત્

બ્રાહ્મં તેજો લભેદ્વિપ્રઃ ક્ષત્રિયશ્ચ નરેશતામ્॥
ધનં વૈશ્યઃ સુખં શૂદ્રઃ શ્રવણાદસ્ય ચાપ્નુયાત્

એતચ્છ્રુત્વા રણં ગચ્છન્વિજયં ચાપ્નુયાન્નૃપઃ॥
પ્રાપ્નુયાત્સ્ત્રી ચ સૌભાગ્યં કન્યા ચ સ્વેપ્સિતં વરમ્

એતસ્ય શ્રુતિકીર્ત્તિભ્યઃ શાસ્ત્રજાતશિરોમણેઃ ॥
યં યં યઃ કામયેત્કામં તંતં પ્રાપ્નોતિ માનવઃ ॥

તસ્માત્ત્વં સર્વદા ભક્ત્યા પઠન્નેતદ્દ્વિજોત્તમ॥
કાયવાણીમનોભિસ્તં ભજેથા ભક્તવત્સલમ્

સૌતિરુવાચ॥
એતન્મહાસેનમુખાબ્જનિઃસૃતં સાવર્ણિરાપીય વચોમૃતં સઃ ॥
ચકાર ભક્તિં વસુદેવનન્દને નરાકૃતિબ્રહ્મણિ સર્વમઙ્ગલે

યૂયં ચ સર્વે નિગમાગમજ્ઞા બ્રહ્મણ્યદેવં ભજનીયમીશમ્ ॥
ભજધ્વમેકં તમુદારકીર્ત્તિં શ્રીવાસુદેવં નિજધર્મસંસ્થાઃ

ગોલોકધામપતયે પ્રકાશચયમૂર્ત્તયે ॥ નમોસ્તુ વાસુદેવાય ભક્ત્યાનન્દવિવૃદ્ધયે

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવાસુદેવમાહાત્મ્યે ગ્રન્થસંપ્રદાયપ્રવૃત્તિનિરૂપણં નામ દ્વાત્રિંશોઽધ્યાયઃ

ઇતિ શ્રીસ્કાન્દે મહાપુરાણે દ્વિતીયે વૈષ્ણવખણ્ડે વાસુદેવમાહાત્મ્યં સમ્પૂર્ણમ્॥ ૨-૯ ॥
ઇતિ શ્રીસ્કાન્દે મહાપુરાણે દ્વિતીયં વૈષ્ણવખણ્ડં સમ્પૂર્ણમ્