સ્કંદ પુરાણ · શ્લોક 2.31-3

॥ સ્કન્દ ઉવાચ ॥
શ્રુત્વૈતત્સકલં ધર્મ્યં યથાવદ્ભગવદ્વચઃ ॥
નિઃસંશયો મુનિઃ પ્રાહ તં પ્રણમ્ય કૃતાઞ્જલિઃ

નારદ ઉવાચ ॥
નષ્ટા મે સંશયાઃ સર્વે પ્રસાદાદ્ભગવંસ્તવ ॥
વાસુદેવસ્ય માહાત્મ્યં મયાધિગતમઞ્જસા

કંચિત્કાલમિહૈવાહં તપઃ કુર્વંસ્ત્વયા સહ ॥
શૃણ્વંશ્ચ નિત્યં જ્ઞાનાદિ કરિષ્યે પક્વમાત્મનઃ

સ્કન્દ ઉવાચ ॥
ઇત્યુક્ત્વા નારદસ્તત્ર તેન ચાપ્યનુમોદિતઃ ॥
ઉવાસ દિવ્યવર્ષાણાં સહસ્રં સ તપશ્ચરન્

શુશ્રાવ ચાનુદિવસં યથાકાલં હરેર્મુખાત્ ॥
ધર્મજ્ઞાનાદ્યથ પ્રાપ પક્વતાં તત્ર યોગિરાટ્

સ્નેહં ચ પરમં પ્રાપ સ શ્રીકૃષ્ણેઽખિલાત્મનિ ॥
ગુણગાનપરો નિત્યમાસ ભાગવતાગ્રણીઃ

ભક્તિનિષ્ઠાં પરાં પ્રાપ્તમથ તં સિદ્ધયોગિનમ્ ॥
ઉવાચ ભગવત્પ્રીતઃ શ્રેયસ્કૃત્સર્વદેહિનામ્

શ્રીનારાયણ ઉવાચ ॥
સિદ્ધોસિ ત્વં મહર્ષેઽદ્ય ગચ્છ લોકહિતં કુરુ ॥
એકાન્તધર્મં સર્વત્ર પ્રવર્ત્તયિતુમર્હસિ

સ્કન્દ ઉવાચ ॥
ઇત્યાજ્ઞાં શિરસા તસ્ય સ આદાય જગદ્ગુરોઃ ॥
ગચ્છંસ્તતસ્તમસ્તૌષીત્પ્રણમ્ય પ્રાઞ્જલિઃ સ્થિતઃ

નારદ ઉવાચ ॥
નમોનમસ્તે ભગવઞ્જગદ્ગુરો નારાયણાઽપ્રાકૃત દિવ્યમૂર્તે ॥
અનન્તકલ્યાણગુણાકરસ્ત્વં દાસે મયિ પ્રીતતરઃ મદા સ્યાઃ

ત્વં વાસુદેવોસિ જગન્નિવાસઃ ક્ષેમાય લોકસ્ય તપઃ કરોષિ ॥
યોગેશ્વરેશોપશમસ્થ આત્મારામાધિપસ્ત્વં પરહંસસદ્ગુરુઃ

વિભુરૃષીણામૃષભોઽક્ષરાત્મા જીવેશ્વરાણાં ચ નિયામકોસિ ॥
સાક્ષી મહાપૂરુષ આત્મતન્ત્રઃ કાલોઽભવદ્યદ્ભ્રુકુટેર્મહાંશ્ચ

સર્ગાદિલીલા જગતાં ત્વમીશ કરોષિ માયાપુરુષાત્મનૈવ ॥
તથાપ્યકર્ત્તા નનુ નિર્ગુણોસિ ભૂમા પરબ્રહ્મ પરાત્પરશ્ચ

સત્યઃ સ્વયંજ્યોતિરતર્ક્યશક્તિસ્ત્વં બ્રહ્મભૂતાત્મવિચિન્ત્યમૂર્ત્તિઃ ॥
બૃહદ્વ્રતાચાર્ય મહામુનીન્દ્ર કન્દર્પદર્પાપહરપ્રતાપ

તપસ્વિનાં યે રિપવઃ પ્રસિદ્ધાઃ ક્રોધો રસો મત્સરલોભમુખ્યાઃ ॥
અપ્યાશ્રમં તેપિ કદાપિ વેષ્ટું નેમં ક્ષમા હ્યેષ તવ પ્રતાપઃ

છન્દોમયો જ્ઞાનમયોઽમૃતાધ્વા ધર્માત્મકો ધર્મસર્ગાભિપોષ્ટા॥
ઉન્મૂલિતાધર્મસર્ગો મહાત્મા ત્વમવ્યયશ્ચાક્ષયોઽવ્યક્તબન્ધુઃ

નિર્દોષરૂપસ્ય તવાઽખિલાઃ ક્રિયા ભવન્તિ વૈ નિર્ગુણા નિર્ગુણસ્ય॥
ધર્માર્થકામેપ્સુભિરર્ચનીયસ્ત્વમીશ્વરો નાથ મુમુક્ષુભિશ્ચ ॥
ત્વં કાલમાયાયમસંસૃતિભ્યો મહાભયાત્પાતુમેકઃ સમર્થઃ ॥
ભક્તાપરાધાનનવેક્ષમાણો મહાદયાલુઃ કિલ ભક્તવત્સલઃ

ધૃતાવતારસ્ય હિ નામમાત્રં રૂપં ચ વા યઃ સ્મરેદન્તકાલે ॥
સોપિ પ્રભો ઘોરમહાઘસંઘાત્સદ્યો વિમુક્તો દિવમાશુ યાતિ

તં ત્વાં વિહાયાઽત્ર તુ યો મનુષ્યો દેહે ત્રિધાતાવપિ દેહિકેષુ ॥
જાયાત્મજજ્ઞાતિધનેષુ સજ્જતે સ માયયા વઞ્ચિત એવ મૂઢઃ

ત્વદ્ભક્તિયોગ્યો નરદેહ એવ યં કામયન્તેઽપિ ચ નાકસંસ્થાઃ ॥
ત્વદ્ભક્તિહીનં હિ દિવોપિ સૌખ્યમહં તુ જાને નરકેણ તુલ્યમ્

તપસ્ત્રિલોક્યાઃ કુરુષે સુખાય તત્રાપિ તે ભારતવાસિપુંસુ ॥
અનુગ્રહો ભૂરિતરો યદત્ર કૃતાવતારો વિચરન્વિરાજસે ॥

તસ્યાશ્રયં યે તવ નાત્ર કુર્વતે ત એવ શાસ્ત્રેષુ મતાઃ કૃતઘ્નાઃ ॥
અતસ્તવૈકાશ્રયમેવ બાઢં કુર્વત્યજસ્રં મયિ તેઽસ્તુ તુષ્ટિઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં દ્વિતીયે વૈષ્ણવખણ્ડે શ્રીવાસુદેવમાહાત્મ્યે શ્રીનરનારાયણસ્તુતિનિરૂપણંનામૈકત્રિંશોઽધ્યાયઃ