શિવસ્તોત્રાવલિ · અધ્યાય 9

સ્વાતન્ત્ર્યવિજયાખ્યં નવમં સ્તોત્રમ્
કદા નવરસાર્દ્રાર્દ્રસમ્ભોગાસ્વાદનોત્સુકમ્ &
પ્રવર્તેત વિહાયાન્યન્ મમ ત્વત્સ્પર્શને મનઃ

ત્વદેકરક્તસ્ ત્વત્પાદપૂજામાત્રમહાધનઃ &
કદા સાક્ષાત્કરિષ્યામિ ભવન્તમ્ અયમ્ ઉત્સુકઃ

ગાઢાનુરાગવશતો નિરપેક્ષીભૂતમાનસો ઽસ્મિ કદા &
પટપટિતિ વિઘટિતાખિલમહાર્ગલસ્ ત્વામ્ ઉપૈષ્યામિ

સ્વસંવિત્સારહૃદયાધિષ્ઠાનાઃ સર્વદેવતાઃ &
કદા નાથ વશીકુર્યાં ભવદ્ભક્તિપ્રભાવતઃ

કદા મે સ્યાદ્ વિભો ભૂરિ ભક્ત્યાનન્દરસોત્સવઃ &
યદાલોકસુખાનન્દી પૃથઙ્ નામાપિ લપ્સ્યતે

ઈશ્વરમ્ અભયમ્ ઉદારં પૂર્ણમ્ અકારણમ્ અપહ્નુતાત્માનં &
સહસાભિજ્ઞાય કદા સ્વામિજનં લજ્જયિષ્યામિ

કદા કામ્ અપિ તાં નાથ તવ વલ્લભતામ્ ઇયામ્ &
યયા માં પ્રતિ ન ક્વાપિ યુક્તં તે સ્યાત્ પલાયિતુમ્

તત્ત્વતો ઽશેષજન્તૂનાં ભવત્પૂજામયાત્મનામ્ &
દૃષ્ટ્યાનુમોદિતરસાપ્લાવિતઃ સ્યાં કદા વિભો

જ્ઞાનસ્ય પરમા ભૂમિર્ યોગસ્ય પરમા દશા &
ત્વદ્ભક્તિર્ યા વિભો કર્હિ પૂર્ણ મે સ્યાત્ તદર્થિતા

સહસૈવસાદ્ય કદા ગાઢમ્ અવષ્ટભ્ય હર્ષવિવશો ઽહમ્ &
ત્વચ્ચરણવરનિધાનં સર્વસ્ય પ્રકટયિષ્યામિ

પરિતઃ પ્રસરચ્છુદ્ધત્વદાલોકમયઃ કદા &
સ્યાં યથેશ ન કિઞ્ચિન્ મે માયાચ્છાયાબિલં ભવેત્

આત્મસાત્કૃતનિઃશેષમણ્ડલો નિર્વ્યપેક્ષકઃ &
કદા ભવેયં ભગવંસ્ ત્વદ્ભક્તગણનાયકઃ

નાથ લોકાભિમાનાનામ્ અપૂર્વં ત્વં નિબન્ધનમ્ &
મહાભિમાનઃ કર્હિ સ્યાં ત્વદ્ભક્તિરસપૂરિતઃ

અશેષવિષયાશૂન્યશ્રીસમાશ્લેષસુસ્થિતઃ &
શયીયમ્ ઇવ શીતાઙ્ઘ્રિકુશેશયયુગે કદા

ભક્ત્યાસવસમૃદ્ધાયાસ્ ત્વત્પૂજાભોગસમ્પદઃ &
કદા પારં ગમિષ્યામિ ભવિષ્યામિ કદા કૃતી

આનન્દબાષ્પપૂરસ્ખલિતપરિભ્રાન્તગદ્ગદાક્રન્દઃ &
હાસોલ્લાસિતવદનસ્ ત્વત્સ્પર્શરસં કદાપ્સ્યામિ

પશુજનસમાનવૃત્તામ્ અવધૂય દશામ્ ઇમાં કદા શમ્ભો &
આસ્વાદયેય તાવકભક્તોચિતમ્ આત્મનો રૂપમ્

લબ્ધાણિમાદિસિદ્ધિર્ વિગલિતસકલોપતાપસન્ત્રાસઃ &
ત્વદ્ભક્તિરસાયનપાનક્રિઢાનિષ્ટઃ કદાસીય

નાથ કદા સ તથાવિધ આક્રન્દો મે સમુચ્ચરેદ્ વાચિ &
યત્ સમનન્તરમ્ એવ સ્ફુરતિ પુરસ્ તાવકી મૂર્તિઃ

ગાઢગાઢભવદઙ્ઘ્રિસરોજાલિઙ્ગનવ્યસનતત્પરચેતાઃ &
વસ્ત્વ્ અવસ્ત્વ્ ઇદમ્ અયત્નત એવ ત્વાં કદા સમવલોકયિતાસ્મિ