શિવસ્તોત્રાવલિ · અધ્યાય 10

અવિચ્છેદભઙ્ગાખ્યં દશમં સ્તોત્રમ્
ન સોઢવ્યમ્ અવશ્યમ્ તે જગદેકપ્રભોર્ ઇદમ્ &
માહેશ્વરાશ્ ચ લોકાનામ્ ઇતરેષાં સમાશ્ ચ યત્

યે સદૈવાનુરાગેણ ભવત્પાદાનુગામિનઃ &
યત્ર તત્ર ગતા ભોગાંસ્ તે કાંશ્ ચિદ્ ઉપભુઞ્જતે

ભર્તા કાલાન્તકો યત્ર ભવાંસ્ તત્ર કુતો રુજઃ &
તત્ર ચેતરભોગાશા કા લક્ષ્મીર્ યત્ર તાવકી

ક્ષનમાત્રસુખેનાપિ વિભુર્ યેનાસિ લભ્યસે &
તદૈવ સર્વઃ કાલો ઽસ્ય ત્વદાનન્દેન પૂર્યતે

આનન્દરસબિન્દુસ્ તે ચન્દ્રમા ગલિતો ભુવિ &
સૂર્યસ્ તથા તે પ્રસૃતઃ સંહારી તેજસઃ કણઃ

બલિં યામસ્ તૃતીયાય નેત્રાયાસ્મૈ તવ પ્રભો &
અલૌકિકસ્ય કસ્યાપિ માહાત્મ્યસ્યૈકલક્ષ્મણે

તેનૈવ દૃષ્ટો ઽસિ ભવદ્દર્શનાદ્યો ઽતિહૃષ્યતિ &
કથઞ્ચિદ્ યસ્ય વા હર્ષઃ કો ઽપિ તેન ત્વમ્ ઈક્ષિતઃ

યેષામ્ પ્રસન્નો ઽસિ વિભો યૈર્ લબ્ધં હૃદયં તવ &
આકૃષ્ય ત્વત્પુરાત્તૈસ્ તુ બાહ્યમ્ આભ્યન્તરીકૃતમ્

ત્વદ્ ઋતે નિખિલં વિશ્વં સમદૃગ્યાતમ્ ઈક્ષ્યતામ્ &
ઈશ્વરઃ પુનર્ એતસ્ય ત્વમ્ એકો વિષમેક્ષણઃ

આસ્તાં ભવત્પ્રભાવેણ વિના સત્તૈવ નાસ્તિ યત્ &
ત્વદ્દૂષણકથા યેષામ્ ત્વદ્ ઋતે નોપપદ્યતે

બાહ્યાન્તરાન્તરાયાલીકેવલે ચેતસિ સ્થિતિઃ &
ત્વયિ ચેત્ સ્યાન્ મમ વિભો કિમ્ અન્યદ્ ઉપયુજ્યતે

અન્યે ભ્રમન્તિ ભગવન્ન્ આત્મન્ય્ એવાતિદુઃસ્થિતાઃ &
અન્યે ભ્રમન્તિ ભગવન્ન્ આત્મન્ય્ એવાતિસુસ્થિતાઃ

અપીત્વાપિ ભવદ્ભક્તિસુધામ્ અનવલોક્ય ચ &
ત્વામ્ ઈશ ત્વત્સમાચારમાત્રાત્ સિદ્ધ્યન્તિ જન્તવઃ

ભૃત્યા વયં તવ વિભો તેન ત્રિજગતાં યથા &
બિભર્ષ્ય્ આત્માનમ્ એવં તે ભર્ત્તવ્યા વયમ્ અપ્ય્ અલમ્

પરાનન્દામૃતમયે દૃષ્ટો ઽપિ જગદાત્મનિ &
ત્વયિ સ્પર્શરસે ઽત્યન્તતરસુત્કણ્ઠિતો(?) ઽસ્મિ તે

દેવ દુઃખાન્ય્ અશેષાણિ યાનિ સંસારિણામ્ અપિ &
ઘૃત્યાખ્યભવદીયાત્મયુતાન્ય્ આયાન્તિ સહ્યતામ્

સર્વજ્ઞે સર્વશક્તૌ ચ ત્વય્ય્ એવ સતિ ચિન્મયે &
સર્વથાપ્ય્ અસતો નાથ યુક્તાસ્ય જગતઃ પ્રથા

ત્વત્પ્રાણિતાઃ સ્ફુરન્તીમે ગુણા લોષ્ટોપમા અપિ &
નૃત્યન્તિ પવનોદ્ધૂતાઃ કાર્પાસાઃ પિચવો યથા

યદિ નાથ ગુણેષ્વ્ આત્માભિમાનો ન ભવેત્ તતઃ &
કેન હીયેત જગતસ્ ત્વદેકાત્મતયા પ્રથા

વન્દ્યાસ્ તે ઽપિ મહીયાંસઃ પ્રલયોપગતા અપિ &
ત્વત્કોપપાવકસ્પર્શપૂતા યે પરમેશ્વર

મહાપ્રકાશવપુષિ વિસ્પષ્ટે ભવતિ સ્થિતે &
સર્વતો ઽપીશ તત્ કસ્માત્ તમસિ પ્રસરામ્ય્ અહમ્

અવિભાગો ભવાન્ એવ સ્વરૂપમ્ અમૃતં મમ &
તથાપિ મર્ત્યધર્માણામ્ અહમ્ એવૈકમ્ આસ્પદમ્

મહેશ્વરેતિ યસ્યાસ્તિ નામકં વાગ્વિભૂષણમ્ &
પ્રણામાઙ્કશ્ ચ શિરસિ સ એવૈકઃ પ્રભાવિતઃ

સદસચ્ ચ ભવાન્ એવ યેન તેનાપ્રયાસતઃ &
સ્વરસેનૈવ ભગવંસ્ તથા સિદ્ધિઃ કથં ન મે

શિવદાસઃ શિવૈકાત્મા કિં યન્ નાસાદયેત્ સુખમ્ &
તર્પ્યો ઽસ્મિ દેવમુખ્યાનામ્ અપિ યેનામૃતાસવૈઃ

હૃન્નાભ્યોર્ અન્તરાલસ્થઃ પ્રાણિનાં પિત્તવિગ્રહઃ &
ગ્રસસે ત્વં મહાવહ્નિઃ સર્વં સ્થાવરજઙ્ગમમ્