શિવસ્તોત્રાવલિ · અધ્યાય 8

અલૌકિકોદ્બલનાખ્યમ્ અષ્ટમં સ્તોત્રમ્
યઃ પ્રસાદલવ ઈશ્વરસ્થિતો યા ચ ભક્તિર્ ઇવ મામ્ ઉપેયુષી &
તૌ પરસ્પરસમન્વિતૌ કદા તાદૃશે વપુષિ રૂઢિમ્ એષ્યતઃ

ત્વત્પ્રભુત્વપરિચર્વણજન્મા કો ઽપ્ય્ ઉદેતુ પરિતોષરસો ઽન્તઃ &
સર્વકાલમ્ ઇહ મે પરમ્ અસ્તુ જ્ઞાનયોગમહિમાદિ વિદૂરે

લોકવદ્ભવતુ મે વિષયેષુ સ્ફીત એવ ભગવન્પરિતર્ષઃ &
કેવલં તવ શરીરતયૈતાન્+ લોકયેયમ્ અહમ્ અસ્તવિકલ્પઃ

દેહભૂમિષુ તથા મનસિ ત્વં પ્રાણવર્ત્મનિ ચ ભેદમ્ ઉપેતે &
સંવિદઃ પથિષુ તેષુ ચ તેન સ્વાત્મના મમ ભવ સ્ફુટરૂપઃ

નિજનિજેષુ પદેષુ પતન્ત્વ્ ઇમાઃ કરણવૃત્તય ઉલ્લસિતા મમ &
ક્ષણમપીશ મનાગ્ અપિ મૈવ ભૂત્ ત્વદવિભેદરસક્ષતિસાહસમ્

લઘુમસૃણસિતાચ્છશીતલં ભવદાવેશવશેન ભાવયન્ &
વપુર્ અખિલપદાર્થપદ્ધતેર્ વ્યવહારાન્ અતિવર્તયેય તાન્

વિકસતુ સ્વવપુર્ ભવદાત્મકં સમુપયાન્તુ જગન્તિ મમાઙ્ગતામ્ &
વ્રજતુ સર્વમ્ ઇદં દ્વયવલ્ગિતં સ્મૃતિપથોપગમે ઽપ્ય્ અનુપાખ્યતામ્

સમુદિયાદ્ અપિ તાદૃશતાવકાનન વિલોક પરામૃતસમ્પ્લવઃ &
મમ ઘટેત યથા ભવદદ્વયાપ્રથનઘોરદરીપરિપૂરણમ્

અપિ કદાચન તાવકસઙ્ગમામૃતકણાચ્છુરણેન તનીયસા &
સકલલોકસુખેષુ પરાઙ્મુખો ન ભવિતાસ્મ્ય્ ઉભયચ્યુત એવ કિમ્

સતતમ્ એવ ભવચ્ચરણામ્બુજાકરચરસ્ય હિ હંસવરસ્ય મે &
ઉપરિ મૂલતલાદ્ અપિ ચાન્તરાદ્ ઉપનમત્વ્ અજ ભક્તિમૃણાલિકા

ઉપયાન્તુ વિભો સમસ્તવસ્તૂન્ય્ અપિ ચિન્તાવિષયં દૃશઃ પદં ચ &
મમ દર્શનચિન્તનપ્રકાશામૃતસારાણિ પરં પરિસ્ફુરન્તુ

પરમેશ્વર તેષુ તેષુ કૃચ્છ્રેષ્વ્ અપિ નામોપનમત્સ્વ્ અહં ભવેયમ્ &
ન પરં ગતભીસ્ ત્વદઙ્ગસઙ્ગાદુપજાતાધિકસમ્મદો ઽપિ યાવત્

ભવદાત્મનિ વિશ્વમ્ ઉમ્ભિતં યદ્ ભવતૈવાપિ બહિઃ પ્રકાશ્યતે તત્ &
ઇતિ યદ્ દૃઢનિશ્ચયોપજુષ્ટં તદ્ ઇદાનિં સ્ફુટમ્ એવ ભાસતામ્