શિવસ્તોત્રાવલિ · અધ્યાય 4

સુરસોદ્બલાખ્યાં ચતુર્થં સ્તોત્રમ્
ચપલમ્ અસિ યદ્ અપિ માનસ તત્રાપિ શ્લાઘ્યસે યતો ભજસે &
શરણાનામ્ અપિ શરણં ત્રિભુવનગુરુમ્ અમ્બિકાકાન્તમ્

ઉલ્લઙ્ઘ્ય વિવિધદૈવતસોપાનક્રમમ્ ઉપેય શિવચરણાન્ &
આશ્રિત્યાપ્ય્ અધરતરાં ભૂમિં નાદ્યાપિ ચિત્રમ્ ઉજ્ઝામિ

પ્રકટય નિજમ્ અધ્વાનં સ્થગયતરામ્ અખિલલોકચરિતાનિ &
યાવદ્ ભવામિ ભગવંસ્ તવ સપદિ સદોદિતો દાસઃ

શિવ શિવ શમ્ભો શઙ્કર શરણાગતવત્સલાશુ કુરુ કરુણામ્ &
તવ ચરણકમલયુગલસ્મરણપરસ્ય હિ સમ્પદો ઽદૂરે

તાવકાઙ્ઘ્રિકમલાસનલીના યે યથારુચિ જગદ્ રચયન્તિ &
તે વિરિઞ્ચિમ્ અધિકારમલેનાલિપ્તમ્ અસ્વવશમ્ ઈશ હસન્તિ

ત્વત્પ્રકાશવપુષો ન વિભિન્નં કિં ચન પ્રભવતિ પ્રતિભાતુમ્ &
તત્ સદૈવ ભગવન્ પરિલબ્ધો ઽસીશ્વર પ્રકૃતિતો ઽપિ વિદૂરઃ

પાદપઙ્કજરસં તવ કે ચિદ્ ભેદપર્યુષિતવૃત્તિમ્ ઉપેતાઃ &
કે ચનાપિ રસયન્તિ તુ સધ્યો ભાતમ્ અક્ષતવપુર્ દ્વયશૂન્યમ્

નાથ વિદ્યુદ્ ઇવ ભાતિ વિભાતે યા કદા ચન મમામૃતદિગ્ધા &
સા યદિ સ્થિરતરૈવ ભવેત્ તત્ પૂજિતો ઽસિ વિધિવત્ કિમ્ ઉતાન્યત્

સર્વમ્ અસ્યપરમ્ અસ્તિ ન કિં ચિદ્ વસ્ત્વ્ અવસ્તુ યદિ વેતિ મહત્યા &
પ્રજ્ઞાય વ્યવસિતો ઽત્ર યથૈવ ત્વં તથૈવ ભવ સુપ્રકટો મે

સ્વેચ્છયૈવ ભગવન્ નિજમાર્ગે કારિતઃ પદમ્ અહં પ્રભુનૈવ &
તત્ કથં જનવદ્ એવ ચરામિ ત્વત્પદોચિતમ્ અવૈમિ ન કિં ચિત્

કો ઽપિ દેવ હૃદિ તેષુ તાવકો જૃમ્ભતે સુભગભાવ ઉત્તમઃ &
ત્વત્કથામ્બુદનિનાદચાતકા યેન તે ઽપિ સુભગીકૃતાશ્ ચિરમ્

ત્વજ્જુષાં ત્વયિ કયાપિ લીલયા રાગ એષ પરિપોષમ્ આગતઃ &
યદ્ વિયોગભુવિ સઙ્કથા તથા સંસ્મૃતિઃ ફલતિ સંગમોત્સવમ્

યો વિચિત્રરસસેકવર્ધિતઃ શઙ્કરેતિ શતશો ઽપ્ય્ ઉદીરિતઃ &
શબ્દ આવિશતિ તિર્યગાશયેષ્વ્ અપ્ય્ અયં નવનવપ્રયોજનઃ

તે જયન્તિ મુખમણ્ડલે ભ્રમન્ અસ્તિ યેષુ નિયતં શિવધ્વનિઃ &
યઃ શાશીવ પ્રસૃતો ઽમૃતાશયાત્ સ્વાદુ સંસ્રવતિ ચામૃતં પરમ્

પરિસમાપ્તમ્ ઇવોગ્રમ્ ઇદં જગદ્ વિગલિતો ઽવિરલો મનસો મલઃ &
તદ્ અપિ નાસ્તિ ભવત્પુરાર્ગલકવાટવિઘટ્ટનમ્ અણ્વ પિ

સતતફુલ્લભવન્મુખપઙ્કજોદરવિલોકનલાલસચેતસઃ &
કિમ્ અપિ તત્ કુરુ નાથ મનાગ્ ઇવ સ્ફુરસિ યેન મમાભિમુખસ્થિતિઃ

ત્વદવિભેદમતેર્ અપરં નુ કિં સુખમ્ ઇહાસ્તિ વિભૂતિર્ અથાપરા &
તદ્ ઇહ તાવકદાસજનસ્ય કિં કુપથમ્ એતિ મનઃ પરિહૃત્ય તામ્

ક્ષણમ્ અપીહ ન તાવકદાસતાં પ્રતિ ભવેયમ્ અહં કિલ ભાજનમ્ &
ભવદભેદરસાસવમ્ આદરાદ્ અવિરતં રસયેયમ્ અહં ન ચેત્

ન કિલ પશ્યતિ સત્યમ્ અયં જનસ્ તવ વપુર્ દ્વયદૃષ્ટિમલીમસઃ &
તદ્ અપિ સર્વવિદાશ્રિતવત્સલઃ કિમ્ ઇદમ્ આરટિતં ન શૃણોષિ મે

સ્મરસિ નાથ કદાચિદ્ અપીહિતં વિષયસૌખ્યમ્ અથાપિ મયાર્થિતમ્ &
સતતમ્ એવ ભવદ્વપુરીક્ષણામૃતમભીષ્ટમલં મમ દેહિ તત્

કિલ યદૈવ શિવાધ્વનિ તાવકે કૃતપદો ઽસ્મિ મહેશ તવેચ્છયા &
શુભશતાન્યુદિતાનિ તદૈવ મે કિમ્ અપરં મૃગયે ભવતઃ પ્રભો

યત્ર સો ઽસ્તમ્ અયમ્ એતિ વિવસ્વાંશ્ ચન્દ્રમઃ પ્રભૃતિભિઃ સહ સર્વૈઃ &
કાપિ સા વિજયતે શિવરાત્રિઃ સ્વપ્રભાપ્રસરભાસ્વરરૂપા

અપ્ય્ ઉપાર્જિતમ્ અહં ત્રિષુ લોકેષ્વ્ અધિપત્યમ્ અમરેશ્વર મન્યે &
નીરસં તદ્ અખિલં ભવદઙ્ઘ્રિસ્પર્શનામૃતરસેન વિહીનમ્

બત નાથ દૃઢો ઽયમ્ આત્મબન્ધો ભવદખ્યાતિમયસ્ ત્વયૈવ કૢપ્તઃ &
યદ્ અયં પ્રથમાનમ્ એવ મે ત્વામ્ અવધીર્ય શ્લથતે ન લેશતો ઽપિ

મહતામ્ અમરેશ પૂજ્યમાનો ઽપ્ય્ અનિશં તિષ્ઠસિ પૂજકૈકરૂપઃ &
બહિરન્તરપીહ દૃશ્યમાનઃ સ્ફુરસિ દ્રષ્ટૃશરીર એવ શશ્વત્