શિવસ્તોત્રાવલિ · અધ્યાય 19

ઉદ્યોતનાભિધાનમ્ એકોનવિંશં સ્તોત્રમ્
પ્રાર્થનાભૂમિકાતીતવિચિત્રફલદાયકઃ &
જયત્ય્ અપૂર્વવૃત્તાન્તઃ શિવઃ સત્કલ્પપાદપઃ

સર્વવસ્તુનિ ચ યૈકનિધાનાત્ સ્વાત્મનસ્ ત્વદ્ અખિલં કિલ લભ્યમ્ &
અસ્ય મે પુનર્ અસૌ નિજા આત્મા ન ત્વમ્ એવ ઘટસે પરમાસ્ તામ્

જ્ઞાનકર્મમયચિદ્વપુર્ આત્મા સર્વથૈષ પરમેશ્વર એવ &
સ્યાદ્ વપુસ્ તુ નિખિલેષુ પદાર્થેષ્વ્ એષુ નામ ન ભવેત્ કિમ્ ઉતાન્યત્

વિષમાર્તિમુષાનેન ફલેન ત્વદ્દૃગાત્મના &
અભિલીય પથા નાથ મમાસ્તુ ત્વન્મયી ગતિઃ

ભવદમલચરણચિન્તારત્નલતાલઙ્કૃતા કદા સિદ્ધિઃ &
સિદ્ધજનમાનસાનાં વિસ્મયજનની ઘટેત મમ ભવતઃ

કર્હિ નાથ વિમલં મુખબિમ્બં તાવકં સમવલોકયિતાસ્મિ &
યત્સ્રવત્ય્ અમૃતપૂરમ્ અપૂર્વં યો નિમજ્જયતિ વિશ્વમ્ અશેષમ્

ધ્યાતમાત્રમુદિતં તવ રૂપં કર્હિ નાથ પરમામૃતપૂરૈઃ &
પૂરયેત્ ત્વદવિભેદવિમોક્ષાખ્યાતિદૂરવિવરાણિ સદા મે

ત્વદીયાનુત્તરરસાસઙ્ગસંત્યક્તચાપલમ્ &
નાદ્યાપિ મે મનો નાથ કર્હિ સ્યાદ્ અસ્તુ શીઘ્રતઃ

મા શુષ્કકટુકાન્ય્ એવ પરં સર્વાણિ સર્વદા &
તવોપહૃત્ય લબ્ધાનિ દ્વન્દ્વાન્ય્ અપ્ય્ આપતન્તુ મે

નાથ સાંમુખ્યમ્ આયાન્તુ વિશુદ્ધાસ્ તવ રશ્મયઃ &
યાવત્ કાયમનસ્તાપતમોભિઃ પરિલુપ્યતામ્

દેવ પ્રસીદ યાવન્ મે ત્વન્માર્ગપરિપન્થિકાઃ &
પરમાર્થમુષો વશ્યા ભૂયાસુર્ ગુણતસ્કરાઃ

ત્વદ્ ભક્તિસુધાસારૈર્ માનસમ્ આપૂર્યતાં મમાશુ વિભો &
યાવદ્ ઇમા ઉહ્યન્તાં નિઃશેષાસારવાસનાઃ પ્લુત્વા

મોક્ષદશાયાં ભક્તિસ્ ત્વયિ કુત ઇવ મર્ત્યધર્મિણો ઽપિ ન સા &
રાજતિ તતો ઽનુરૂપામ્ આરોપય સિદ્ધિભૂમિકામ્ અજ મામ્

સિદ્ધિલવલાભલુબ્ધં મામ્ અવલેપેન મા વિભો સંસ્થાઃ &
ક્ષામસ્ ત્વદ્ભક્તિમુખે પ્રોલ્લસદણિમાદિપક્ષતો મોક્ષઃ

દાસસ્ય મે પ્રસીદતુ ભગવાન્ એતાવદ્ એવ નનુ યાચે &
દાતા ત્રિભુવનનાથો યસ્ય ન તન્માદૃશાં દૃશો વિષયઃ

ત્વદ્વપુઃસ્મૃતિસુધારસપૂર્ણે માનસે તવ પદામ્બુજયુગ્મમ્ &
મામકે વિકસદ્ અસ્તુ સદૈવ પ્રસ્રવન્મધુ કિમ્ અપ્ય્ અતિલોકમ્

અસ્તિ મે પ્રભુર્ અસૌ જનકો ઽથ ત્ર્યમ્બકો ઽથ જનની ચ ભવાની &
ન દ્વિતીય ઇહ કો ઽપિ મમાસ્તીત્ય્ એવ નિર્વૃતતમો વિચરેયમ્