શિવસ્તોત્રાવલિ · અધ્યાય 18

આવિષ્કારનામ અષ્ટાદશં સ્તોત્રમ્
જગતો ઽન્તરતો ભવન્તમ્ આપ્ત્વા પુનર્ એતદ્ ભવતો ઽન્તરાલ્ લભન્તે &
જગદીશ તવૈવ ભક્તિભાજો ન હિ તેષામ્ ઇહ દૂરતો ઽસ્તિ કિઞ્ચિત્

ક્વચિદ્ એવ ભવાન્ ક્વચિદ્ ભવાની સકલાર્થક્રમગર્ભિણી પ્રધાના &
પરમાર્થપદે તુ નૈવ દેવ્યા ભવતો નાપિ જતત્ત્રયસ્ય ભેદઃ

નો જાનતે સુભગમ્ અપ્ય્ અવલેપવન્તો લોકાઃ પ્રયત્નસુભગા નિખિલ હિ ભાવાઃ &
ચેતઃ પુનર્ યદ્ ઇદમ્ ઉદ્યતમ્ અપ્ય્ અવૈતિ નૈવાત્મરૂપમ્ ઇહ હા તદ્ અહો હતો ઽસ્મિ

ભવન્મયસ્વાત્મનિવાસલબ્ધસમ્પદ્ભરાભ્યર્ચિતયુષ્મદઙ્ઘ્રિઃ &
ન ભોજનાચ્છાદનમ્ અપ્ય્ અજસ્રમ્ અપેક્ષતે યસ્ તમ્ અહં નતો ઽસ્મિ

સદા ભવદ્દેહનિવાસસ્વસ્થો ઽપ્ય્ અન્તઃ પરં દહ્યત એષ લોકઃ &
તવેચ્છયા તત્ કુરુ મે યથાત્ર ત્વદર્ચનાનન્દમયો ભવેયમ્

સ્વરસોદિતયુષ્મદઙ્ઘ્રિપદ્મદ્વયપૂજામૃતપાનસક્તચિત્તઃ &
સકાર્થચયેષ્વ્ અહં ભવેયમ્ સુખસંસ્પર્શનમાત્રલોકયાત્રઃ

સકલવ્યવહારગોચરે સ્ફુટમ્ અન્તઃ સ્પુરતિ ત્વયિ પ્રભો &
ઉપયાન્ત્ય્ અપયાન્તિ ચાનિશમ્ મમ વસ્તૂનિ વિભાન્તુ સર્વદા

સતતમ્ એવ તવૈવ પુરે ઽથવાપ્ય્ અરહિતો વિચરેયમ્ અહં ત્વયા &
ક્ષણલવો ઽપ્ય્ અથ મા સ્મ ભવેત્ સ મે ન વિજયે નનુ યત્ર ભવન્મયઃ

ભવદઙ્ગપરિસ્રવત્સુશીતામૃતપૂરૈર્ ભરિતે સમન્તતો ઽપિ &
ભવદર્ચનસમ્પદેહ ભક્તાસ્ તવ સંસારસરો ઽન્તરે ચરન્તિ

મહામન્ત્રતરુચ્છાયાશીતલે ત્વન્મહાવને &
નિજાત્મનિ સદા નાથ વસેયં તવ પૂજકઃ

પ્રતિવસ્તુ સમસ્તજીવતઃ પ્રતિભાસિ પ્રતિભામયો યથા &
મમ નાથ તથા પુરઃ પ્રથાં વ્રજ નેત્રત્રયશૂલશોભિતઃ

અભિમાનચરૂપહારતો મમતાભક્તિભરેણ કલ્પિતાત્ &
પરિતોષગતઃ કદા ભવાન્ મમ સર્વત્ર ભવેદ્ દૃશઃ પદમ્

નિવસન્પરમામૃતાબ્ધિમધ્યે ભવદર્ચાવિધિમાત્રમગ્નચિત્તઃ &
સકલં જનવૃત્તમ્ આચરેયં રસયન્ સર્વત એવ કિઞ્ચનાપિ

ભવદીયમ્ ઇહાસ્તુ વસ્તુ તત્ત્વં વિવરીતું ક ઇવાત્ર પાત્રમ્ અર્થે &
ઇદમ્ એવ હિ નામરૂપચેષ્ટાદ્યસમં તે હરતે હરો ઽસિ યસ્માત્

શાન્તયે ન સુખલિપ્સુતા મનાગ્ ભક્તિસમ્ભૃતમદેષુ તૈઃ પ્રભોઃ &
મોક્ષમાર્ગણફલાપિ નાર્થના સ્મર્યતે હૃદયહારિણઃ પુરઃ

જાગરેતરદશાથવા પરા યાપિ કાચન મનાગ્ અવસ્થિતેઃ &
ભક્તિભાજનજનસ્ય સાખિલા ત્વત્સનાથમનસો મહોત્સવઃ

આમનો ઽક્ષવલયસ્ય વૃત્તયઃ સર્વતઃ શિથિલવૃત્તયો ઽપિ તાઃ &
ત્વામ્ અવાપ્ય દૃઢદીર્ઘસંવિદો નાથ ભક્તિધનસોષ્મણાં કથમ્

ન ચ વિભિન્નમ્ અસૃજ્યત કિઞ્ચિદ્ અસ્ત્ય્ અથ સુખેતરદ્ અત્ર ન નિર્મિતમ્ &
અથ ચ દુઃખિ ચ ભેદિ ચ સર્વથાપ્ય્ અસમવિસ્મયધામ નમો ઽસ્તુ તે

ખરનિષેધખદામૃતપૂરણોચ્છલિતધૌતવિકલ્પમલસ્ય મે &
દલિતદુર્જયસંશયવૈરિણસ્ ત્વદવલોકનમ્ અસ્તુ નિરન્તરમ્

સ્ફુટમ્ અવિશ મામ્ અથાવિશેયં સતતં નાથ ભવન્તમસ્મિ યસ્માત્ &
રભસેન વપુસ્ તવૈવ સાક્ષાત્ પરમાસત્તિગતઃ સમર્ચયેયમ્

ત્વયિ ન સ્તુતિશક્તિર્ અસ્તિ કસ્યાપ્ય્ અથવાસ્ત્ય્ એવ યતો ઽતિસુન્દરો ઽસિ &
સતતં પુનર્ અર્થિતં મમૈતદ્ યદ્ અવિશ્રાન્તિ વિલોકયેયમ્ ઈશમ્