શિવસ્તોત્રાવલિ · અધ્યાય 17

દિવ્યક્રીડાબહુમાનનામ સપ્તદસં સ્તોત્રમ્
અહો કો ઽપિ જયત્ય્ એષ સ્વાદુઃ પૂજામહોત્સવઃ &
યતો ઽમૃતરસાસ્વાદમ્ અશ્રૂણ્ય્ અપિ દદત્ય્ અલમ્

વ્યાપારાઃ સિદ્ધિદાઃ સર્વે યે ત્વત્પૂજાપુરઃસરાઃ &
ભક્તાનાં ત્વન્મયાઃ સર્વે સ્વયં સિદ્ધય એવ તે

સર્વદા સર્વભાવેષુ યુગપત્ સર્વરૂપિણમ્ &
ત્વામ્ અર્ચયન્ત્ય્ અવિશ્રન્તં યે મમૈતે ઽધિદેવતાઃ

ધ્યાનાયસતિરસ્કારસિદ્ધસ્ ત્વત્સ્પર્શનોત્સવઃ &
પૂજાવિધિર્ ઇતિ ખ્યાતો ભક્તાનાં સ સદાસ્ તુ મે

ભક્તાનાં સમતાસારવિષુવત્સમયઃ સદા &
ત્વદ્ભાવરસપીયૂષરસેન્નૈષાં સદાર્ચનમ્

યસ્યાનારમ્ભપર્યન્તૌ ન ચ કાલક્રમઃ પ્રભો &
પૂજાત્માસૌ ક્રિયા તસ્યાઃ કર્તારસ્ ત્વજ્જુષઃ પરમ્

બ્રહ્માદીનામ્ અપીશાસ્તે તે ચ સૌભાગ્યભાગિનઃ &
યેષાં સ્વપ્ને ઽપિ મોહે ઽપિ સ્થિતસ્ ત્વત્પૂજનોત્સવઃ

જપતાં જુહ્વતાં સ્નાતાં ધ્યાયતાં ન ચ કેવલમ્ &
ભક્તાનાં ભવદભ્યર્ચામહો યાવદ્ યદા તદા

ભવત્પૂજાસુધાસ્વાદસમ્ભોગસુખિનઃ સદા &
ઇન્દ્રાદીનામ્ અથ બ્રહ્મમુખ્યાનામ્ અસ્તિ કઃ સમઃ

જગત્ક્ષોભૈકજનકે ભવત્પૂજામહોત્સવે &
યત્પ્રાપ્યં પ્રાપ્યતે કિંચિદ્ ભક્તા એવ વિદન્તિ તત્

ત્વદ્ધામ્નિ ચિન્મયે સ્થિત્વા ષટ્ત્રિંશત્તત્ત્વકર્મભિઃ &
કાયવાક્ચિત્તચેષ્ટાદ્યૈર્ અર્ચયે ત્વાં સદા વિભો

ભવત્પૂજામયાસઙ્ગસમ્ભોગસુખિનો મમ &
પ્રયાતુ કાલઃ સકલો ઽપ્ય્ અનન્તો ઽપીયદર્થયે

ભવત્પૂજામૃતરસાભોગલમ્પટત વિભો &
વિવર્ધતામ્ અનુદિનં સદા ચ ફલતાં મમ

જગદ્વિલયસઞ્જાતસુધૈકરસનિર્ભરે &
ત્વદબ્ધૌ ત્વાં મહાત્માનમ્ અર્ચન્નાસીય સર્વદા

અશેષવાસનાગ્રન્થિવિચ્છેદસરલં સદા &
મનો નિવેદ્યતે ભક્તૈઃ સ્વાદુ પૂજાવિધૌ તવ

અધિષ્ઠાયૈવ વિષયાનિમાઃ કરણવૃત્તયઃ &
ભક્તાનાં પ્રેષયન્તિ સ્વત્પૂજાર્થમ્ અમૃતાસવમ્

ભક્તાનાં ભક્તિસંવેગમહોષ્મવિવશાત્મનામ્ &
કો ઽન્યો નિર્વાણહેતુઃ સ્યાત્ ત્વત્પૂજામૃતમજ્જનાત્

સતતં ત્વત્પદાભ્યર્ચાસુધાપાનમહોત્સવઃ &
ત્વત્પ્રસાદૈકસમ્પ્રાપ્તિહેતુર્ મે નાથ કલ્પતામ્

અનુભૂયાસમીશાન પ્રતિકર્મ ક્ષણાત્ ક્ષણમ્ &
ભવત્પૂજામૃતાપાનમદાસ્વાદમહામુદમ્

દૃષ્ટર્થ એવ ભક્તાનાં ભવત્પૂજામહોદ્યમઃ &
તદૈવ યદ્ અસમ્ભાવ્યં સુખમ્ આસ્વાદયન્તિ તે

યાવન્ ન લબ્ધસ્ ત્વત્પૂજાસુધાસ્વાદમહોત્સવઃ &
તાવન્ નાસ્વાદિતો મન્યે લવો ઽપિ સુખસમ્પદઃ

ભક્તાનાં વિષયન્વેષાભાસાયાસાદ્ વિનૈવ સા &
અયત્નસિદ્ધં ત્વદ્ધામસ્થિતિઃ પૂજાસુ જાયતે

ન પ્રાપ્યમ્ અસ્તિ ભક્તનાં નાપ્ય્ એષામ્ અસ્તિ દુર્લભમ્ &
કેવલં વિચરન્ત્ય્ એતે ભવત્પૂજામદોન્મદાઃ

અહો ભક્તિભરોદારચેતસાં વરદ ત્વયિ &
સ્લાઘ્યઃ પૂજાવિધિઃ કો ઽપિ યો ન યાચ્ઞાકલંકિતઃ

કા ન શોભા ન કો હ્લાદઃ કા સમૃદ્ધિર્ ન વાપરા &
કો વા ન મોક્ષઃ કો ઽપ્ય્ એષ મહાદેવો યદ્ અર્ચ્યતે

અન્તરુલ્લસદચ્છાચ્છભક્તિપીયૂષપોષિતમ્ &
ભવત્પૂજોપયોગાય શરીરમ્ ઇદમ્ અસ્તુ મે

ત્વત્પાદપૂજાસમ્ભોગપરતન્ત્રઃ સદા વિભો &
ભૂયાસં જગતામ્ ઈશ એકઃ સ્વચ્છન્દચેષ્ટિતઃ

ત્વદ્ધ્યાનદર્શનસ્પર્શતૃષિ કેષામ્ અપિ પ્રભો &
જાયતે શીતલસ્વાદુ ભવત્પૂજામહાસરઃ

યથા ત્વમ્ એવ જગતઃ પૂજાસમ્ભોગભાજનમ્ &
તથેશ ભક્તિમાન્ એવ પૂજાસમ્ભોગભાજનમ્

કો ઽપ્ય્ અસૌ જયતિ સ્વામિન્ ભવત્પૂજામહોત્સવઃ &
ષટ્ત્રિંશતો ઽપિ તત્ત્વાનાં ક્ષોભો યત્રોલ્લસત્ય્ અલમ્

નમસ્ તેભ્યો વિભો યેષાં ભક્તિપીયૂષવારિણા &
પૂજ્યાન્ય્ એવ ભવન્તિ ત્વત્પૂજોપકરણાન્ય્ અપિ

પૂજારમ્ભે વિભો ધ્યાત્વા મન્ત્રાધેયાં ત્વદાત્મતામ્ &
સ્વાત્મન્ય્ એવ પરે ભક્તા માન્તિ હર્ષેણ ન ક્વચિત્

રાજ્યલાભાદિવોત્ફુલ્લૈઃ કૈશ્ ચિત્ પૂજામહોત્સવે &
સુધાસવેન સકલા જગતી સંવિભજ્યતે

પૂજામૃતાપાનમયો યેષાં ભોગઃ પ્રતિક્ષણમ્ &
કિં દેવા ઉત મુક્તાસ્ તે કિં વા કે ઽપ્ય્ એવ તે જનાઃ

પૂજોપકરણીભૂતવિશ્વવેશેન ગૌરવમ્ &
અહો કિમ્ અપિ ભક્તાનાં કિમ્ અપ્ય્ એવ ચ લાઘવમ્

પૂજામયાક્ષવિક્ષેપક્ષોભાદેવામૃતોદ્ગમઃ &
ભક્તાનાં ક્ષીરજલધિક્ષોભાદ્ ઇવ દિવૌકસામ્

પૂજાં કે ચન મન્યન્તે ધેનું કામદુઘામ્ ઇવ &
સુધાધારાધિકરસાં ધયન્ત્ય્ અન્તર્મુખાઃ પરે

ભક્તાનામ્ અક્ષવિક્ષેપો ઽપ્ય્ એષ સંસારસંમતઃ &
ઉપનીય કિમ્ અપ્ય્ અન્તઃ પુષ્ણાત્ય્ અર્ચામહોત્સવમ્

ભક્તિક્ષોભવશાદ્ ઈશ સ્વાત્મભૂતે ઽર્ચનં ત્વયિ &
ચિત્રં દૈન્યાય નો યાવદ્ દીનતાયાઃ પરં ફલમ્

ઉપચારપદં પૂજા કેષાં ચિત્ ત્વત્પદાપ્તયે &
ભક્તાનાં ભવદૈકાત્મ્યનિર્વૃત્તિપ્રસરસ્ તુ સઃ

અપ્ય્ અસમ્બદ્ધરૂપાર્ચાભક્ત્યુન્માદનિરર્ગલૈઃ &
વિતન્યમાના લભતે પ્રતિષ્ઠાં ત્વયિ કામ્ અપિ

સ્વાદુભક્તિરસાસ્વાદસ્તબ્ધીભૂતમનશ્ ચ્યુતામ્ &
શમ્ભો ત્વમ્ એવ લલિતઃ પૂજાનાં કિલ ભાજનમ્

પરિપૂર્ણાનિ શુદ્ધાનિ ભક્તિમન્તિ સ્થિરાણિ ચ &
ભવત્પૂજાવિધૌ નાથ સાધનાનિ ભવન્તુ મે

અશેષપૂજાસત્કોશે ત્વત્પૂજાકર્મણિ પ્રભો &
અહો કરણવૃન્દસ્ય કાપિ લક્ષ્મીર્ વિજૃમ્ભતે

એષા પેશલિમા નાથ તવૈવ કિલ દૃશ્યતે &
વિશ્વેશ્વરો ઽપિ ભૃત્યૈર્ યદ્ અર્ચ્યસે યશ્ ચ લભ્યસે

સદામુર્ત્તાદ્ અમૂર્ત્તાદ્વા ભાવાદ્ યદ્ વાપ્ય્ અભાવતઃ &
ઉત્થેયાન્ મે પ્રશસ્તસ્ય ભવત્પૂજામહોત્સવઃ

કામક્રોધાભિમાનૈસ્ ત્વામ્ ઉપહરીકૃતૈઃ સદા &
યે ઽર્ચયન્તિ નમસ્ તેભ્યસ્ તેષાં તુષ્ટો ઽસ્મિ તત્ત્વતઃ

જયત્ય્ એષ ભવદ્ભક્તિભાજાં પૂજાવિધિઃ પરઃ &
યસ્ તૃણૈઃ ક્રિયમાનો ઽપિ રત્નૈર્ એવોપકલ્પતે