શિવસ્તોત્રાવલિ · અધ્યાય 13

સંગ્રહસ્તોત્રનામ ત્રયોદશં સ્તોત્રમ્
સંગ્રહેન સુખદુઃખલક્ષણં માં પ્રતિ સ્થિતમ્ ઇદં શૃણુ પ્રભો &
સૌખ્યમ્ એષ ભવતા સમાગમઃ સ્વામિના વિરહ એવ દુઃખિતા

અન્તર્ અપ્ય્ અતિતરામ્ અણીયસી યા ત્વદપ્રથનકાલિકાસ્તિ મે &
તામ્ અપીશ પરિમૃજ્ય સર્વતઃ સ્વં સ્વરૂપમ્ અમલં પ્રકાશય

તાવકે વપુષિ વિશ્વનિર્ભરે ચિત્સુધારસમયે નિરત્યયે &
તિષ્ઠતઃ સતતમ્ અર્ચતઃ પ્રભું જીવિતં મૃતમ્ અથાન્યદ્ અસ્તુ મે

ઈશ્વરો ઽહમ્ અહમ્ એવ રૂપવાન્ પણ્ડિતો ઽસ્મિ સુભગો ઽસ્મિ કો ઽપરઃ &
મત્સમો ઽસ્તિ જગતીતિ શોભતે માનિતા ત્વદનુરાગિણઃ પરમ્

દેવદેવ ભવદદ્વયામૃતાખ્યાતિસંહરણલબ્ધજન્મના &
તદ્ યથાસ્થિતપદાર્થસંવિદા માં કુરુષ્વ ચરણાર્ચનોચિતમ્

ધ્યાયતે તદ્ અનુ દૃશ્યતે તતઃ સ્પૃશ્યતે ચ પરમેશ્વરઃ સ્વયમ્ &
યત્ર પૂજનમહોત્સવઃ સ મે સર્વદાસ્તુ ભવતો ઽનુભાવતઃ

યદ્ય્ અથાસ્થિતપદાર્થદર્શનં યુષ્મદર્ચનમહોત્સવશ્ ચ યઃ &
યુગ્મમ્ એતદ્ ઇતરેતરાશ્રયં ભક્તિશાલિષુ સદા વિજૃમ્ભતે

તત્તદિન્દ્રિયમુખેન સન્તતં યુષ્મદર્ચનરસાયનાસવમ્ &
સર્વભાવચષકેષુ પૂરિતેષ્વ્ આપિબન્ન્ અપિ ભવેયમ્ ઉન્મદઃ

અન્યવેદ્યમ્ અણુમાત્રમ્ અસ્તિ ન સ્વપ્રકાશમ્ અખિલં વિજૃમ્ભતે &
યત્ર નાથ ભવતઃ પુરે સ્થિતં તત્ર મે કુરુ સદા તવાર્ચિતુઃ

દાસધામ્નિ વિનિયોજિતો ઽપ્ય્ અહં સ્વેચ્છયૈવ પરમેશ્વર ત્વયા &
દર્શનેન ન કિમ્ અસ્મિ પાત્રિતઃ પાદસંવહનકર્મણાપિ વા

શક્તિપાતસમયે વિચારણં પ્રાપ્તમ્ ઈશ ન કરોષિ કર્હિચિત્ &
અદ્ય માં પ્રતિ કિમ્ આગતં યતઃ સ્વપ્રકાશનવિધૌ વિલમ્બસે

તત્ર તત્ર વિષયે બહિર્વિભાત્ય્ અન્તરે ચ પરમેશ્વરીયુતમ્ &
ત્વાં જગત્ત્રિતયનિર્ભરં સદા લોકયેય નિજપાણિપૂજિતમ્

સ્વામિસૌધમ્ અભિસન્ધિમાત્રતો નિર્વિબન્ધમ્ અધિરુહ્ય સર્વદા &
સ્યાં પ્રસાદ પરમામૃતાસવાપાનકેલિપરિલબ્ધનિર્વૃતિઃ

યત્સમસ્તસુભગાર્થવસ્તુષુ સ્પર્શમાત્રવિધિના ચમત્કૃતિમ્ &
તાં સમર્પયતિ તેન તે વપુઃ પૂજયન્ત્ય્ અચલભક્તિશાલિનઃ

સ્ફારયસ્ય્ અખિલમ્ આત્મના સ્ફુરન્ વિશ્વમ્ આમૃશસિ રૂપમ્ આમૃશન્ &
યત્ સ્વયં નિજરસેન ઘુર્ણસે તત્ સમુલ્લસતિ ભાવમણ્ડલમ્

યો ઽવિકલ્પમ્ ઇદમ્ અર્થમણ્ડલં પશ્યતીશ નિખિલં ભવદ્વપુઃ &
સ્વાત્મપક્ષપરિપૂરિતે જગત્ય્ અસ્ય નિત્યસુખિનઃ કુતો ભયમ્

કણ્ઠકોણવિનિવિષ્ટમ્ ઈશ તે કાલકૂટમ્ અપિ મે મહામૃતમ્ &
અપ્ય્ ઉપાત્તમ્ અમૃતં ભવદ્વપુર્ ભેદવૃત્તિ યદિ રોચતે ન મે

ત્વત્પ્રલાપમયરક્તગીતિકાનિ ત્ય યુક્તવદનોપશોભિતઃ &
સ્યામ્ અથાપિ ભવદર્ચનક્રિયાપ્રેયસીપરિગતાશયઃ સદા

ઈહિતં ન બત પારમેશ્વરં શક્યતે ગણયિતું તથા ચ મે &
દત્તમ્ અપ્ય્ અમૃતનિર્ભરં વપુઃ સ્વં ન પાતુમ્ અનુમન્યતે તથા

ત્વામ્ અગાધમ્ અવિકલ્પમ્ અદ્વયં સ્વં સ્વરૂપમ્ અખિલાર્થઘસ્મરમ્ &
આવિશન્ન્ અહમ્ ઉમેશ સર્વદા પૂજયેયમ્ અભિસંસ્તુવીય ચ