શિવસ્તોત્રાવલિ · અધ્યાય 11

ઔત્સુક્યવિશ્વસિતનામૈકાદશં સ્તોત્રમ્
જગદ્ ઇદમ્ અથવા સુહૃદો બન્ધુજનો વા ન ભવતિ મમ કિમ્ અપિ &
ત્વં પુનર્ એતત્ સર્વં યદા તદા કો ઽપરો મે ઽસ્તુ

સ્વામિન્ મહેશ્વરસ્ ત્વં સાક્ષાત્ સર્વં જગત્ ત્વમ્ એવેતિ &
વસ્ત્વ્ એવ સિદ્ધિમ્ એત્વ્ ઇતિ યાચ્ઞા તત્રાપિ યાચ્ઞૈવ

ત્રિભુવનાધિપતિત્વમ્ અપીહ યત્ તૃણમ્ ઇવ પ્રતિભાતિ ભવજ્જુષઃ &
કિમ્ ઇવ તસ્ય ફલં શુભકર્મણો ભવતિ નાથ ભવત્સ્મરણાદ્ ઋતે

યેન નૈવ ભવતો ઽસ્તિ વિભિન્નં કિઞ્ચનાપિ જગતાં પ્રભવશ્ ચ &
ત્વદ્વિજૃમ્ભિતમ્ અતો ઽદ્ભુતકર્મસ્વ્ અપ્ય્ ઉદેતિ ન તવ સ્તુતિબન્ધઃ

ત્વન્મયો ઽસ્મિ ભવદર્ચનનિષ્ઠઃ સર્વદાહમ્ ઇતિ ચાપ્ય્ અવિરામમ્ &
ભાવયન્ન્ અપિ વિભો સ્વરસેન સ્વપ્નગો ઽપિ ન તથા કિમ્ ઇવ સ્યામ્

યે મનાગ્ અપિ ભવચ્ચરણાબ્જોદ્ભૂતસૌરભલવેન વિમૃષ્ટઃ &
તેષુ વિસ્રમ્ ઇવ ભવતિ સમસ્તં ભોગજાતમ્ અમરૈર્ અપિ મૃગ્યમ્

હૃદિ તે ન તુ વિદ્યતે ઽન્યદ્ અન્યદ્ વચને કર્મણિ ચાન્યદ્ એવ શંભો &
પરમાર્થસતો ઽપ્ય્ અનુગ્રહો વા યદિ વા નિગ્રહ એક એવ કાર્યઃ

મૂઢો ઽસ્મિ દુઃખકલિતો ઽસ્મિ જરાદિદોષભીતો ઽસ્મિ શક્તિરહિતો ઽસ્મિ તવાશ્રિતો ઽસ્મિ &
શમ્ભો તથા કલય શીઘ્રમ્ ઉપૈમિ યેન સર્વોત્તમાં ધુરમ્ અપોજ્ઝિતદુઃખમાર્ગઃ

ત્વત્કર્ણદેશમ ધિશય્ય મહાર્ઘભાવમ્ આક્રન્દિતાનિ મમ તુચ્છતરાણિ યાન્તિ &
વંશાન્તરાલપતિતાનિ જલૈકદેશખણ્ડાનિ મૌક્તિકમણિત્વમ્ ઇવોદ્વહન્તિ

કિમ્ ઇવ ચ લભ્યતે બત ન તૈર્ અપિ નાથ જનૈઃ ક્ષણમ્ અપિ કૈતવાદ્ અપિ ચ યે તવ નામ્નિ રતાઃ &
શિશિરમયૂખશેખર તથા કુરુ યેન મમ ક્ષતમરણો ઽણિમાદિકમ્ ઉપૈમિ યથા વિભવમ્

શમ્ભો શર્વ શશઙ્કશેખર શિવ ત્ર્યક્ષાક્ષમાલાધર શ્રીમન્ન્ ઉગ્રકપાલલાઞ્છન લસદ્ભીમત્રિશૂલાયુધ &
કારુણ્યામ્બુનિધે ત્રિલોકરચનાશીલોગ્રશક્ત્યાત્મક શ્રીકણ્ઠાશુ વિનાશયાશુભભરાન્ આધત્ સ્વસિદ્ધિં પરામ્

તત્ કિં નાથ ભવેન્ ન યત્ર ભગવાન્ નિર્માતૃતામ્ અશ્નુતે ભાવઃ સ્યાત્ કિમ્ ઉ તસ્ય ચેતનવતો નાશાસ્તિ યં શઙ્કરઃ &
ઇત્થં તે પરમેશ્વરાક્ષતમહાશક્તેઃ સદા સંશ્રિતઃ સંસારે ઽત્ર નિરન્તરાધિવિધુરઃ ક્લિશ્યામ્ય્ અહં કેવલમ્

યદ્ય્ અપ્ય્ અત્ર વરપ્રદોદ્ધતતમાઃ પીડાજરામૃત્યવ એતે વા ક્ષણમ્ આસતાં બહુમતઃ શબ્દાદિર્ એવાસ્થિરઃ &
તત્રાપિ સ્પૃહયામિ સન્તતસુખાકાઙ્ક્ષી ચિરં સ્થાસ્નવે ભોગાસ્વાદયુતત્વદઙ્ઘ્રિકમલધ્યાનાગ્ર્ય જીવાતવે

હે નાથ પ્રણતાર્તિનાશનપટો શ્રેયોનિધે ધૂર્જટે દુઃખૈકાયતનસ્ય જન્મમરણત્રસ્તસ્ય મે સામ્પ્રતમ્ &
તચ્ ચેષ્ટસ્વ યથા મનોજ્ઞવિષયાસ્વાદપ્રદા ઉત્તમા જીવન્ન્ એવ સમશ્નુવે ઽહમ્ અચલાઃ સિદ્ધીસ્ ત્વદર્ચાપરઃ

નમો મોહમહાધ્વાન્તધ્વંસનાનન્યકર્મણે &
સર્વપ્રકાશાતિશયપ્રકાશાયેન્દુલક્ષ્મણે