શિવપૂજાસ્તવ · શ્લોક 21-40

શ્વેતાસૃક્કૃષ્ણપીતસ્ફટિકશશિસુવર્ણારુણાલ્યગ્નિવર્ણૈર્ બ્રહ્માઙ્ગૈર્વ્યક્તમૂર્તિર્ભવહરશિવસંયોગતઃ સ્ફાટિકાભઃ
ઐક્યાન્મન્ત્રાર્થયોરિત્યખિલશિવમતેષ્વાહસર્વાર્થહેતુર્ વક્ત્રાણાં વર્ણભેદશ્ચિદચિદધિપતેશ્ચિત્રમેતત્સ્વરૂપમ્ ॥

ઈશાનેન વિયન્મયેન ધવલપ્રખ્યેન સર્વપ્રભોર્ વ્યાપ્તં વક્ત્રચતુષ્ટયં પુરુષહૃદ્ગુહ્યાજમન્ત્રાત્મકમ્
તેનેદં ધવલપ્રભં શિવવિદઃ પૂર્વાદિકાષ્ઠાભૃતાં વર્ણાનુગ્રહહેતુતઃ પ્રતિમુખં પીતાદિવર્ણં વિદુઃ ॥

ઈશતત્પુરુષાઘોર વામાજવદનં શિવમ્
બાલયૌવનવૃદ્ધસ્ત્રી નરાકારં નમામ્યહમ્ ॥

ત્રિશૂલખટ્વાઙ્ગધરઃ સશક્તિર્ વરાબ્જહસ્તો ઽભયપાણિરીશઃ
સેન્દીવરાહિર્ડમરુપ્રસક્તઃ સબીજપૂરઃ સુભગો ઽક્ષસૂત્રી ॥

બોધાનન્દમયી વિભોર્ભવભયપ્રધ્વંસકૃચ્છક્તયસ્ તિસ્રસ્તાઃ પરિણામતશ્ચ વિવૃતિર્નિઃશેષબીજસ્ય હિ
તપૂર્ણં પ્રકૃતિઃ કલાદ્યભિમુખી દીર્ઘાક્ષસૂત્રં મનઃ શમ્ભોરસ્ત્રનિકાય આગમપરૈર્જ્ઞેયઃ પરો નાપરઃ ॥

ઈશાનં સર્વાસાં વિદ્યાનામીશ્વરં ચ ભૂતાનામ્ ।
બ્રહ્માધિપતિં બ્રહ્મત્વાન્નિષ્કલરૂપં સદાશિવં નૌમિ ॥

તત્પુરુષં ભક્તાનાં શૈવજ્ઞાનપ્રદં મહદેવમ્ ।
રુદ્રં શિવત્વસિદ્ધ્યૈ તત્ત્વપ્રેરકમહં વન્દે ॥

અથ ઘોરમઘોરં પશુપાશનિરાકરણં ઘોરઘોરતરમ્ ।
સર્વસ્માચ્છરણમહં શર્વં બહુરૂપિણં વન્દે ॥

વામં જ્યેષ્ઠં રૌદ્રં કલવિકરણં બલવિકરણં કાન્તમ્ ।
બલપ્રમથનં સર્વભૂતદમનં મનોન્મનમહં વન્દે ॥

સદ્યોજાતં સર્વજ્ઞં પ્રણતાનાં ભવભયાપહરમ્ ।
અતિભવયોજકમમલં ભવોદ્ભવં નૌમિ જગદધિપમ્ ॥

શ્રીમન્મૂલમનૂત્થનાદશિખયા બ્રહ્માદિસાદાશિવ સ્થાનત્યાગગતિક્રમોર્ધ્વવિલસદ્વ્યોમાન્તસંસ્થાય તે
બોધાનન્દમયાય સર્વવિભવે નિત્યાય વિશ્વાત્મને શુદ્ધાયામલતેજસે ચ મહતે તસ્મૈ પરસ્મૈ નમઃ ॥

ચન્દ્રયુગ્મગુણાર્થમાત્રતદર્ધતદ્દલષોડશ દ્વ્યુત્તરત્રિદશાબ્ધિષષ્ટિભુજઙ્ગમશ્રવણક્ષમા
દર્શનેષુકરાંશભાવમિતોન્મની પરમાસનં યસ્ય તં પ્રણતો ઽસ્મિ નિષ્કલમવ્યયં પરમં શિવમ્ ॥

આદિપઞ્ચમમૃત્યુભૂષણચન્દ્રખણ્ડગુણાશ્રદૃગ્ ભાનુગધ્વનિસીરભાસ્કરસેન્દુવૃત્તહલાકૃતિઃ
સાંશુમત્ત્રિશિખદ્વિબિમ્બગતદ્વિકુબ્જગ ઉન્મના પાતુ વઃ સકલાપરઃ સકલાકલઃ સકલઃ શિવઃ ॥

નિષ્કલં શિવરુદ્રપુદ્ગલભૂષણાર્ધહિમાંશુમદ્ રોધિદણ્ડતદન્તશક્તિચતુષ્ટયેશ્વરયોગિનમ્
શઙ્કરં વસુસાગરાઙ્ગુલચારિણં રસશૂન્યગં સર્વમન્ત્રપતિં પ્રાસાદમહં નતો ઽસ્મિ ષડધ્વગમ્ ॥

ચિદ્વ્યક્તિસંસ્થિત્યવલોકરોધૈર્ મુદ્રોત્તરૈરઙ્ગશિવૈકભાવૈઃ ।
પાદાચમાર્ઘ્યપ્રસવપ્રદાનૈસ્ ત્વદર્ચનં જન્મફલં મહેશ ॥

આવાહનં સ્વાત્મનિ ચિત્પ્રકાશસ્ તત્ર સ્થિતિઃ સ્થાપનમીશ્વરસ્ય ।
સાન્નિધ્યમાત્મેશ્વરસન્નિધાનં સંરોધનં સ્વસ્ય શિવે નિરોધઃ ॥

નમો ઽસ્તુ સંજ્ઞાનહૃદે ભવાય નમો ગુણૈશ્વર્યવિશિષ્ટમૂર્તયે ।
નમો ઽપરાધીનવશિત્વરૂપશિખાય તેજઃકવચાત્મને નમઃ ॥

નમઃ પશૂનાં મલકૃતનક્ષમાસહપ્રતાપાસ્ત્રધરાય શૂલિને ।
નમો ઽવિકારાય ષડઙ્ગમૂર્તયે સદાશિવાયામૃતરૂપિણે નમઃ ॥

સ્વભાવશુદ્ધસ્ય શિવસ્ય પાદમાચામમાત્મીયવિશુદ્ધિહેતોઃ ।
અર્ઘ્યપ્રદાનં કુસુમાર્પણં ચ સદેશધામાપ્તિનિમિત્તમેતત્ ॥

સ્નાનં સ્વાત્મમલાપહં શુભમયૈર્ગન્ધૈઃ સમાલેપનં સદ્વસ્ત્રાભરણં સુગન્ધિકુસુમૈર્માલાભિરભ્યર્ચનમ્
સાલઙ્કારસદાશિવસ્ય વિધિવદ્ધૂપપ્રદાનં ત્વણોર્ ભોગાર્થં હિ સદેશધામ્નિ વિમલં દીપં શિવજ્ઞાનદમ્ ॥