શિવપૂજાસ્તવ · શ્લોક 1-20

પ્રાતઃ શઙ્કરચિન્તનસ્નપનસંસેકાસુસંરોધનૈઃ સન્ધ્યાસંસ્મૃતિમાર્જનાઘશમનોપસ્થાનસન્તર્પણૈઃ
દ્વારસ્યાર્ચનયાગધામગતવિઘ્નોદ્વાસનાદ્યૈઃ પ્રભોર્ યઃ શ્રીમાન્યજનં કરોતિ ભવતસ્તસ્યૈવ સિદ્ધિદ્વયમ્ ॥

એકૈવાર્થત ઈશશક્તિરમિતા યાનેકરૂપા શિવા કાલોપાધિવશાદ્દ્વિજાસ્ત્વનુદિનં બ્રાહ્મ્યાદિરૂપેણ તામ્
ધ્યાયન્ત્યત્ર તુ નિર્મલાત્મશિવયોઃ સન્ધિશ્ચ શૈવી પુરા સન્ધ્યાતઃ શિવ એવ સાધકવરૈર્ધ્યેયઃ સદા નિર્મલઃ ॥

પ્રાતઃ સ્મરામિ હૃદયાબ્જસ્વમધ્યસંસ્થં ચન્દ્રાર્કમાર્ગવિરહોદિતચિત્સ્વરૂપમ્
ધ્યેયં સદા મુનિવરૈરપવર્ગસિદ્ધ્યૈ વિશ્વાત્મકં સદસદન્તમનન્તમીશમ્ ॥

મધ્યન્દિને શતસહસ્રનિશાકરાભં વિશ્વેશ્વરં પરમકારણમપ્રમેયમ્
શમ્ભું સદોદિતમમાયવિયત્સ્વરૂપં કોદણ્ડમધ્યનિલયં નિયતં સ્મરામિ ॥

બ્રહ્માક્ષરં નિશિમુખે ઽમૃતસાગરાભં વિશ્વાધિપં શિવમનૂત્થિતનાદસંસ્થમ્
બોધામૃતં કરણકારણકાર્યહીનં તં બ્રહ્મરન્ધ્રનિલયં નિયતં સ્મરામિ ॥

તેજોનિધાનમચલં શિવમર્ધરાત્રે નિત્યં નિરસ્તવિષયૈઃ પરમાર્થદૃગ્ભિઃ
વિજ્ઞેયમવ્યયમચિન્ત્યમભાવનીયમ્ ઉન્મન્યતીતવિષયં સતતં સ્મરામિ ॥

ક્ષ્માદિગ્રન્થ્યન્તતત્ત્વક્રમનિહિતપદાક્રાન્તસંશુદ્ધવિદ્યા તત્ત્વાન્તવ્યાપિસાદાશિવવિશદપદં ભાવયન્નાત્મરૂપમ્
શૈવજ્ઞાનપ્રસિદ્ધપ્રવરવિધિગતાશેષસત્કૃત્યકારી જીવં હૃદ્યેવ કુર્યાદ્રવિશશિદહનવ્યોમશક્ત્યન્તરસ્થમ્ ॥

આયામૈઃ શ્વનસ્ય ભૌતિકમલં દેહં કલાભિઃ સુધીર્ યઃ પઞ્ચાધ્વવિસર્પિણીભિરનિશં સંશોધ્ય તચ્છમ્બરૈઃ
મન્ત્રાલઙ્કૃતદેહભૃન્નિશિ દિવા સન્ધ્યાસુ સન્તોષયન્ન્ અર્ચાહોમસમાધિભિઃ શિવમસૌ સંયાતિ શૈવં પદમ્ ॥

ય એષ દેવો મહતો મહીયાન્ અણોરણીયાન્ભવભીરુભિઃ સઃ
જ્ઞેયઃ શિવઃ સર્વગતઃ શરીરે ધ્યેયઃ સ પૂજ્યઃ શિવલિઙ્ગમધ્યે ॥

હૃત્પદ્માખ્યશિવાલયે મનસિજે તત્કર્ણિકાખ્યે ક્રિયાપીઠે જ્ઞાનમયં વિશુદ્ધમનસા સંસ્થાપ્ય નાદાત્મના
લિઙ્ગં તચ્ચ સુધામયેન પયસા સંસ્નાપ્ય સમ્યક્પુનો વૈરાગ્યેણ ચ ચન્દનેન વસુભિઃ પુષ્પૈરહિંસાદિભિઃ ॥

પ્રાણાયામભવેન ધૂપવિધિના ચિદ્દીપદાનેન યઃ પ્રત્યાહારમયેન સોમહવિષા સૌષુમ્નજાપેન ચ
તચ્ચિત્તે બહુધારણાભિરમલધ્યાનોદ્ભવૈર્ભૂષણૈસ્ તત્સામ્યાણિનિવેદનેન યજતે ધન્યઃ સ એવામલઃ ॥

ચન્દ્રસ્રાવિસુધામયેન હવિષા નાભિસ્થકુણ્ડે ઽનલં સન્તર્પ્યેશમયં શિવાસ્પદગતવ્યોમ્નિ સ્થિતે સર્વગે
કન્દોદ્ભૂતશિવાણુનાદશિખયા વૃત્ત્યાત્મસંવેદનં શૈવે જ્યોતિષિ યઃ કરોતિ પુરુષો મુક્તઃ સ એવાક્ષયઃ ॥

યથાવદાત્માશ્રયવસ્તુમન્ત્ર સ્વાયત્તલિઙ્ગાદિષુ શોધિતેષુ
સિદ્ધાન્તમાર્ગસ્થિતસાધકાનાં ત્વત્પૂજનં નાત્ર વિલોમતો ઽસ્તુ ॥

ધારિકાભિધશક્તિબીજમનન્તપઙ્કજકુડ્મલં પુણ્યબોધવિરાગભૂતિપદં વિલોમચતુષ્ટયમ્
ગાત્રકં છદનદ્વયં કમલં સકેસરકર્ણિકં શક્તિમણ્ડલસઙ્ઘયુક્તમહં નમામિ શિવાસનમ્ ॥

પૃથ્વીકન્દં કાલતત્ત્વાન્તનાલં લોકૌઘં તત્કણ્ટકં ભાવસૂત્રમ્
ગ્રન્થિગ્રન્થિં શુદ્ધવિદ્યાસરોજં વિદ્યેશાનારૂઢપત્રાષ્ટકં ચ ॥

વામાદિશક્તિગતકેસરકર્ણિકાઢ્યમ્ અર્કાદિબિમ્બસહિતં વરયોગપીઠમ્
તત્ર સ્થિતં હૃદયમન્ત્રગતાત્મમન્ત્ર મૂર્તિં ચ બિન્દુગતમીશમહં નમામિ ॥

તત્કન્દં શતકોટિયોજનમિતં નાલં પરાર્ધાન્તકં ગ્રન્થિઃ કોટિપરાર્ધપશ્ચિમસહસ્રો ઽબ્જં ચ તલ્લક્ષકમ્ ।
મૂર્તિસ્તસ્ય ચ કોટિરીશ્વરમયી તસ્યાર્બુદસ્યાર્બુદામ્ભોજં મન્ત્રમયં સદાશિવવપુસ્તદ્વાનમેયઃ શિવઃ ॥

યસ્યામૌષધભૂષણધ્વનિમયી મૂર્તિઃ પરા બૈન્દવી ધ્યેયા શઙ્કરમન્ત્રતન્ત્રનિરતૈર્જ્ઞાનક્રિયાઙ્ગી શિવા
સર્વૈશ્વર્યસુખપ્રદા નિરુપમા સાદાશિવી નિર્મલા નાદાખ્યાય સદાશિવાય મહતે શાન્તાય તસ્મૈ નમઃ ॥

ધ્યેયઃ સદા ગગનમણ્ડલમધ્યવર્તી નિર્વિઘ્નશુદ્ધશિવયોગિહૃદમ્બુજસ્થઃ
ઈશોર્ધ્વનિષ્કલશિવાન્તવપુઃ સદેશો બિન્દુઃ સ્વરોદ્ભવકલાભુવનેશગર્ભઃ ॥

યો ઽસાવીશાનમૂર્ધા નરમુખકમલો ઽઘોરહૃદ્વામગુહ્યઃ સદ્યોમૂર્તિઃ પુરેશાનનહૃદયપદઃ ષડ્વિધાધ્વસ્વરૂપઃ
ભૂતામ્ભોરાશિસિદ્ધિસ્મરભુજગકલાકૢપ્તદેહઃ ક્રિયેચ્છા દૃઙ્માસાર્ધામ્બકં તં કબિલગતમહં નૌમિ વિદ્યાશરીરમ્ ॥