શિવપૂજાસ્તવ · શ્લોક 41-47

શુચીશરક્તપાનિલેન્દ્રમૃત્યુકેન્દુસંસ્થિતાન્ પયોધરાર્કવાતવહ્નિસન્નિભાનિનેક્ષણાન્
યુગાનનાન્વરાભયત્રિશૂલશક્તિયુક્કરાન્ નમઃ શિવાઙ્ગસમ્ભવાન્હૃદાદિમન્ત્રવિગ્રહાન્ ॥

ભોગાઙ્ગાર્ચનમાત્મનઃ શિવગુણપ્રાપ્ત્યર્થમૈક્યં પ્રભોર્ અઙ્ગાનાં પુનરર્ચકસ્ય શિવસંયોગાય શુદ્ધાત્મનઃ
તૃપ્તસ્યાન્નનિવેદનામ્બુમુખવાસાદિપ્રદાનં મનસ્ તૃપ્ત્યર્થં શિવભાવમઙ્ગલકરં ચિત્રં તત્રાર્ચાફલમ્ ॥

પવિત્રભૂતસ્ય પવિત્રદાનં તાપત્રયઘ્નં સકલાર્થસિદ્ધ્યૈ
જપશ્ચ ભક્ત્યા પ્રણતિઃ શિવસ્ય બ્રહ્મેન્દ્રવિષ્ણ્વાદિપદત્વહેતુઃ ॥

અર્ચને સકલં જપે સકલાકલં સતતોદિતં નિષ્કલં સકલાધ્વગં પરિપૂર્ણમાત્મસમર્પણે
વ્યોમ્નિ સુસ્ફટિકપ્રભં ભવને કલાસહિતં હરં યો હિ વેત્તિ પરં શિવં શિવ એવ સો ઽસ્ત્ર ન સંશયઃ ॥

ભૂયઃ પૂજનમીશસન્નિધિકરં સમ્પ્રાર્થનં સ્વેશયોર્ અન્યોન્યં ત્વવલોકનાય ભુવને ભોગાય સાદાશિવે
ઈશાગ્ન્યર્ચનમર્પણં ક્ષપયિતું બન્ધત્રયં કર્મણો જ્ઞેયં સ્વાત્મનિવેદનં પરશિવે સ્થિત્યર્થમેવાત્મનઃ ॥

અશુદ્ધતત્ત્વૌઘબહિષ્ક્રિયાર્થં પરાઙ્મુખાર્ઘ્યં પરમેશ્વરસ્ય
યસ્મિન્નવસ્થાનકરં વિસર્ગં કુર્વન્સ શૈવં પદમભ્યુપેતિ ॥

વિપ્રોત્તુઙ્ગશ્ચોલદેશી ચ સૂરિઃ શમ્ભોઃ પૂજાસ્તોત્રમેતત્પવિત્રમ્
સિદ્ધાન્તજ્ઞો જ્ઞાનશમ્ભુઃ શિવોક્ત્યા ચક્રે ભક્ત્યા ભુક્તયે મુક્તયે ચ ॥