શિવમહિમ્નસ્તવ · શ્લોક 21-9

ક્રિયાદક્ષો દક્ષઃ ક્રતુપતિર્ અધીશસ્ તનુભૃતામ્ ઋષીણામ્ આર્ત્વિજ્યં શરણદ સદસ્યાઃ સુરગણાઃ ।
ક્રતુભ્રંશસ્ ત્વત્તઃ ક્રતુફલવિધાનવ્યસનિનો ધ્રુવં કર્તુઃ શ્રદ્ધાવિધુરમ્ અભિચારાય હિ મખાઃ ॥

પ્રજાનાથં પ્રસભમ્ અભિકં સ્વાં દુહિતરં ગતં રોહિદ્ભૂતાં રિરમયિષુમ્ ઋશ્યસ્ય વપુષા ।
ધનુષ્પાણેર્ યાતં દિવમ્ અપિ સપત્રાકૃતમ્ અમું ત્રસન્તં તે ઽદ્યાપિ ત્યજતિ ન મૃગવ્યાધરભસઃ ॥

સ્વલાવણ્યાશંસાધૃતધનુષમ્ અહ્નાય તૃણવત્ પુરઃ પ્લુષ્ટં દૃષ્ટ્વા પુરમથન પુષ્પાયુધમ્ અપિ ।
યદિ સ્ત્રૈણં યમનિરત દેહાર્ધઘટનાદ્ અવૈતિ ત્વામ્ અદ્ધા બત વરદ મુગ્ધા યુવતયઃ ॥

શ્મશાનેષ્વ્ આક્રીડા સ્મરહર પિશાચાઃ સહચરાશ્ ચિતાભસ્માલેપઃ સ્રગ્ અપિ નૃકરોટીપરિકરઃ ।
અમાઙ્ગલ્યં શીલં તવ ભવતુ નામૈવમ્ અખિલં તથાપિ સ્મર્ત્.ર્ણાં વરદ પરમં મઙ્ગલમ્ અસિ ॥

મનઃ પ્રત્યક્ચિત્તે સવિધમ્ અવધાયાત્તમરુતઃ પ્રહૃષ્યદ્રોમાણઃ પ્રમદસલિલોત્સઙ્ગિતદૃશઃ ।
યદ્ આલોક્યાહ્લાદં હ્રદ ઇવ નિમજ્યામૃતમયે દધત્ય્ અન્તસ્ તત્ત્વં કિમ્ અપિ યમિનસ્ તત્ કિલ ભવાન્ ॥

ત્વમ્ અર્કસ્ ત્વં સોમસ્ ત્વમ્ અસિ પવનસ્ ત્વં હુતવહસ્ ત્વમ્ આપસ્ ત્વં વ્યોમ ત્વમ્ ઉ ધરણિર્ આત્મા ત્વમ્ ઇતિ ચ ।
પરિચ્છિન્નામ્ એવં ત્વયિ પરિણતા બિભ્રતિ ગિરં ન વિદ્મસ્ તત્ તત્ત્વં વયમ્ ઇહ તુ યત્ ત્વં ન ભવસિ ॥

ત્રયીં તિસ્રો વૃત્તીસ્ ત્રિભુવનમ્ અથો ત્રીન્ અપિ સુરાન્ નકારાદ્યૈર્ વર્ણૈસ્ ત્રિભિર્ અભિદધત્ તીર્ણવિકૃતિ ।
તુરીયં તે ધામ ધ્વનિભિર્ અવરુન્ધાનમ્ અણુભિઃ સમસ્તં વ્યસ્તં ત્વાં શરણદ ગૃણાતીમ્ ઇતિ પદમ્ ॥

ભવઃ શર્વો રુદ્રઃ પશુપતિર્ અથોગ્રઃ સહમહાંસ્ તથા ભીમેશાનાવ્ ઇતિ યદ્ અભિધાનાષ્ટકમ્ ઇદમ્ ।
અમુષ્મિન્ પ્રત્યેકં પ્રવિચરતિ દેવ શ્રુતિર્ અપિ પ્રિયાયાસ્મૈ ધામ્ને પ્રણિહિતનમસ્યો ઽસ્મિ ભવતે ॥

નમો નેદિષ્ઠાય પ્રિયદવ દવિષ્ઠાય ચ નમો નમઃ ક્ષોદિષ્ઠાય સ્મરહર મહિષ્ઠાય ચ નમઃ ।
નમો વર્ષિષ્ઠાય ત્રિનયન યવિષ્ઠાય ચ નમો નમઃ સર્વસ્મૈ તે તદ્ ઇદમ્ ઇતિ સર્વાય ચ નમઃ ॥

બહુલરજસે વિશ્વોત્પત્તૌ ભવાય નમો નમઃ પ્રબલતમસે તત્સંહારે હરાય નમો નમઃ ।
જનસુખકૃતે સત્ત્વોત્પત્તૌ મૃદાય નમો નમઃ પ્રમહસિ પદે નિસ્ત્રૈગુણ્યે શિવાય નમો નમઃ ॥

કૃશપરિણતિ ચેતઃ ક્લેશવશ્યં ક્વ ચેદં ક્વ ચ તવ ગુણસીમોલ્લઙ્ઘિની શાશ્વદૃદ્ધિઃ ।
ઇતિ ચકિતમ્ અનન્દીકૃત્ય માં ભક્તિર્ આધાદ્ વરચ ચરણયોસ્ તે વાક્યપુષ્પોપહારમ્ ॥

અસિતગિરિસમં સ્યાત્ કજ્જલં સિન્ધુપાત્રે સુરતરુવરશાખા લેખની પત્રમ્ ઉર્વી ।
લિખતિ યદિ ગૃહીત્વા શારદા સર્વકાલં તદ્ અપિ તવ ગુણાનામ્ ઈશ પારં ન યાતિ ॥

અસુરસુરમુનીન્દ્રૈર્ અર્ચિતસ્યેન્દુમૌલેઃ પ્રથિતગુણમહિમ્નો નિર્ગુણસ્યેશ્વરસ્ય ।
સકલગુણવરિષ્ઠઃ પુષ્પદન્તાભિધાનો રુચિરમ્ અલઘુવૃત્તૈઃ સ્તોત્રમ્ એતચ્ ચકાર ॥

અહરાહર્ અનવદ્યં ધૂર્જટે સ્તોત્રમ્ એતત્ પઠતિ પરમભક્ત્યા શુદ્ધચિત્તઃ પુમાન્ યઃ ।
સ ભવતિ શિવલોકે રુદ્રતુલ્યઃ સદાત્મા પ્રચુરતરધનાયુઃ પુત્રવાન્ કીર્તિમાંશ્ ચ ॥

મહેશાન્ નાપરો દેવો મહિમ્નો નાપરા સ્તુતિઃ ।
અઘોરાન્ નાપરો મન્ત્રો નાસ્તિ તત્ત્વં ગુરોઃ પરમ્ ॥

દીક્ષા દાનં તપસ્ તીર્થં જ્ઞાનં યાગાદિકાઃ ક્રિયાઃ ।
મહિમ્નસ્ તવ પાઠસ્ય કલાં નાર્હન્તિ ષોડશીમ્ ॥

આસમાપ્તમ્ ઇદં સ્તોત્રં પુણ્યં ગન્ધર્વભાષિતમ્ ।
અનૌપમ્યં મનોહારિ શિવમ્ ઈશ્વરવર્ણનમ્ ॥

કુસુમદશનનામા સર્વગન્ધર્વરાજઃ શિશુશશધરમૌલેર્ દેવદેવસ્ય દાસઃ ।
સ ખલુ નિજમહિમ્નો ભ્રષ્ટ એવાસ્ય રોષાત્ સ્તવનમ્ ઇદમ્ અકાર્ષીદ્ દિવ્યદિવ્યં મહિમ્નઃ ॥

સુરગુરુમ્ અભિપૂજ્ય સ્વર્ગમોક્ષૈકહેતું પઠતિ યદિ મનુષ્યઃ પ્રાઞ્જલિર્ નાન્યચેતાઃ ।
વ્રજતિ શિવસમીપં કિન્નરૈઃ સ્તૂયમાનઃ સ્તવનમ્ ઇદમ્ અમોઘં પુષ્પદન્તપ્રણીતમ્ ॥

શ્રીપુષ્પદન્તમુખપઙ્કજનિર્ગતેન સ્તોત્રેણ કિલ્બિષહરેણ હરપ્રિયેણ ।
કણ્ઠસ્થિતેન પઠિતેન ગૃહસ્થિતેન સમ્પ્રીણિતો ભવતિ ભૂતપતિર્ મહેશઃ ॥