શુક્લયજુર્વેદઃ · અધ્યાય 8

અગ્નિષ્ટોમે તૃતીયસવનગતા આદિત્યગ્રહાદિ મન્ત્રાઃ – પાશુક અગ્નિષ્ટોમઃ 1-32, ષોડશીયાગઃ 33-37, દ્વાદશાહાદિ 38-

ઉપયામગૃહીતો ઽસિ ।
આદિત્યેભ્યસ્ ત્વા ।
વિષ્ણ ઽ ઉરુગાયૈષ તે સોમસ્ તꣳ રક્ષસ્વ મા ત્વા દભન્

કદા ચન સ્તરીર્ અસિ નેન્દ્ર સશ્ચસિ દાશુષે ।
ઉપોપેન્ નુ મઘવન્ ભૂય ઽ ઇન્ નુ તે દાનં દેવસ્ય પૃચ્યતે ઽ ।
આદિત્યેભ્યસ્ ત્વા

કદા ચન પ્ર યુચ્છસ્ય્ ઉભે નિ પાસિ જન્મની ।
તુરીયાદિત્ય સવનં ત ઽ ઇન્દ્રિયમ્ આ તસ્થાવ્ અમૃતં દિવિ ।
આદિત્યેભ્યસ્ ત્વા

યજ્ઞો દેવાનાં પ્રત્ય્ એતિ સુમ્નમ્ આદિત્યાસો ભવતા મૃડયન્તઃ ।
આ વોઽર્વાચી સુમતિર્ વવૃત્યાદ્ અꣳહોશ્ ચિદ્ યા વરિવોવિત્તરાસત્ ।
આદિત્યેભ્યસ્ ત્વા

વિવસ્વન્ન્ આદિત્યૈષ તે સોમપીથસ્ તસ્મિન્ મત્સ્વ ।
શ્રદ્ અસ્મૈ નરો વચસે દધાતન યદ્ આશીર્દા દમ્પતી વામમ્ અશ્નુતઃ ।
પુમાન્ પુત્રો જાયતે વિન્દતે વસ્વ્ અધા વિશ્વાહાર્ અપ ઽ એધતે ગૃહે

વામમ્ અદ્ય સવિતર્ વામમ્ ઉ શ્વો દિવે-દિવે વામમ્ અસ્મભ્યꣳ સાવીઃ ।
વામસ્ય હિ ક્ષયસ્ય દેવ ભૂરેર્ અયા ધિયા વામભાજઃ સ્યામ

ઉપયામગૃહીતોઽસિ સાવિત્રોઽસિ ચનોધાશ્ ચનોધા ઽ અસિ ચનો મયિ ધેહિ ।
જિન્વ યજ્ઞં જિન્વ યજ્ઞપતિં ભગાય દેવાય ત્વા સવિત્રે

ઉપયામગૃહીતોઽસિ સુશર્માસિ સુપ્રતિષ્ઠાનો બૃહદુક્ષાય નમઃ ।
વિશ્વેભ્યસ્ ત્વા દેવેભ્યઃ ઽ।
એષ તે યોનિર્ વિશ્વેભ્યસ્ ત્વા દેવેભ્યઃ

ઉપયામગૃહીતો ઽસિ બૃહસ્પતિસુતસ્ય દેવ સોમ ત ઽ ઇન્દોર્ ઇન્દ્રિયાવતં પત્નીવતો ગ્રહાઁ૨ ઽ ઋધ્યાસમ્ ।
અહં પરસ્તાદ્ અહમ્ અવસ્તાદ્ યદ્ અન્તરિક્ષં તદ્ ઉ મે પિતાભૂત્ ।
અહꣳ સૂર્યમ્ ઉભયતો દદર્શાહં દેવાનાં પરમં ગુહા યત્

અગ્ના3ઇ પત્નીવન્ત્ સજૂર્ દેવેન ત્વષ્ટ્રા સોમં પિબ સ્વાહા ।
પ્રજાપતિર્ વૃષાસિ રેતોધા રેતો મયિ ધેહિ પ્રજાપતેસ્ ત વૃષ્ણો રેતોધસો રેતોધામ્ અશીય

ઉપયામગૃહીતો ઽસિ હરિર્ અસિ હારિયોજનો હરિભ્યાં ત્વા ।
હર્યોર્ ધાના સ્થ સહસોમા ઽ ઇન્દ્રાય

યસ્ તે ઽ અશ્વસનિર્ ભક્ષો યો ગોસનિસ્ તસ્ય ત ઽ ઇષ્ટયજુષ સ્તુતસોમસ્ય શસ્તોક્થસ્યોપહૂતસ્યોપહૂતો ભક્ષયામિ

દેવકૃતસ્યૈનસો ઽવયજનમ્ અસિ ।
મનુષ્યકૃતસ્યૈનસો ઽવયજનમ્ અસિ ।
પિતૃકૃતસ્યૈનસો ઽવયજનમ્ અસિ ।
આત્મકૃતસ્યૈનસો ઽવયજનમ્ અસિ ।
એનસઽ-એનસો ઽવયજનમ્ અસિ ।
યચ્ ચાહમ્ એનો વિદ્વાꣳશ્ ચકાર યચ્ ચાવિદ્વાꣳસ્ તસ્ય સર્વસ્યૈનસો ઽવયજનમ્ અસિ

સં વર્ચસા પયસા સં તનૂભિર્ અગન્મહિ મનસા સꣳ શિવેન ।
ત્વષ્ટા સુદત્રો વિ દધાતુ રાયો ઽનુ માર્ષ્ટુ તન્વો યદ્ વિલિષ્ટમ્

સમ્ ઇન્દ્ર ણો મનસા નેષિ ગોભિઃ સꣳ સૂરિભિર્ મઘવન્ત્ સꣳ સ્વસ્ત્યા ।
સં બ્રહ્મણા દેવકૃતં યદ્ અસ્તિ સં દેવાના સુમતૌ યજ્ઞિયાના સ્વાહા

સં વર્ચસા પયસા સં તનૂભિર્ અગન્મહિ મનસા સꣳ શિવેન ।
ત્વષ્ટા સુદત્રો વિદધાતુ રાયો ઽનુ માર્ષ્ટુ તન્વો યદ્ વિલિષ્ટમ્

ધાતા રાતિઃ સવિતેદં જુષન્તાં પ્રજાપતિર્ નિધિપા દેવો ઽ અગ્નિઃ ।
ત્વષ્ટા વિષ્ણુઃ પ્રજયા સꣳરરાણા યજમાનાય દ્રવિણં દધાત સ્વાહા

સુગા વો દેવાઃ સદના ઽ અકર્મ ય ઽ આજગ્મેદꣳ સવનં જુષાણાઃ ।
ભરમાણા વહમાના હવીꣳષ્ય્ અસ્મે ધત્ત વસવો વસૂનિ સ્વાહા

યાઁ૨ ઽ આવહ ઽ ઉશતો દેવ દેવાઁસ્ તાન્ પ્રેરય સ્વે ઽ અગ્ને સધસ્થે ।
જક્ષિવાસઃ પપિવાસશ્ ચ વિશ્વે ઽસું ઘર્મꣳ સ્વરાતિષ્ઠતાનુ સ્વાહા

વયꣳ હિ ત્વા પ્રયતિ ઽ યજ્ઞે અસ્મિન્ન્ અગ્ને હોતારમ્ અવૃણીમહીહ ।
ઋધગ્ અયા ઽ ઋધગ્ ઉતાશમિષ્ઠાઃ પ્રજાનન્ યજ્ઞમ્ ઉપ યાહિ વિદ્વાન્ત્ સ્વાહા

દેવા ગાતુવિદો ગાતું વિત્ત્વા ગાતુમ્ ઇત ।
મનસસ્પત ઽ ઇમં દેવ યજ્ઞꣳ સ્વાહા વાતે ધાઃ

યજ્ઞ યજ્ઞં ગચ્છ યજ્ઞપતિં ગચ્છ સ્વાં યોનિં ગચ્છ સ્વાહા ।
એષ તે યજ્ઞો યજ્ઞપતે સહસૂક્તવાકઃ સર્વવીરસ્ તજ્ જુષસ્વ સ્વાહા

માહિર્ ભૂર્ મા પૃદાકુઃ ।
ઉરુꣳ હિ રાજા વરુણશ્ ચકાર સૂર્યાય પન્થામ્ અન્વેતવા ઽ ઉ ।
અપદે પાદા પ્રતિધાતવે ઽકર્ ઉતાપવક્તા હૃદયાવિધશ્ ચિત્ ।
નમો વરુણાયાભિષ્ઠિતો વરુણસ્ય પાશઃ

અગ્નેર્ અનીકમ્ અપ ઽ આ વિવેશાપાં નપાત્ પ્રતિરક્ષન્ન્ અસુર્યમ્ ।
દમે-દમે સમિધં યક્ષ્ય્ અગ્ને પ્રતિ તે જિહ્વા ઘૃતમ્ ઉચ્ ચરણ્યત્ સ્વાહા

સમુદ્રે તે હૃદયમ્ અપ્સ્વ્ અન્તઃ સં ત્વા વિશન્ત્વ્ ઓષધીર્ ઉતાપઃ ।
યજ્ઞસ્ય ત્વા યજ્ઞપતે સૂક્તોક્તૌ નમોવાકે વિધેમ યત્ સ્વાહા

દેવીર્ આપ ઽ એષ વો ગર્ભસ્ તꣳ સુપ્રીતꣳ સુભૃતં બિભૃત ।
દેવ સોમૈષ તે લોકસ્ તસ્મિઞ્ છં ચ વક્ષ્વ પરિ ચ વક્ષ્વ

અવભૃથ નિચુમ્પુણ નિચેરુર્ અસિ નિચુમ્પુણઃ ।
અવ દેવૈર્ દેવકૃતમ્ એનો ઽયાસિષમ્ અવ મર્ત્યૈર્ મર્ત્યકૃતં પુરુરાવ્ણો દેવ રિષસ્ પાહિ ।
દેવાના સમિદ્ અસિ

એજતુ દશમાસ્યો ગર્ભો જરાયુણા સહ ।
યથાયં વાયુર્ એજતિ યથા સમુદ્ર ઽ એજતિ ।
એવાયં દશમાસ્યો ઽ અસ્રજ્ જરાયુણા સહ

યસ્યૈ તે યજ્ઞિયો ગર્ભો યસ્યૈ યોનિર્ હિરણ્યયી ।
અઙ્ગાન્ય્ અહ્રુતા યસ્ય તં માત્રા સમ્ અજીગમꣳ સ્વાહા

પુરુદસ્મો વિષુરૂપ ઽ ઇન્દુર્ અન્તર્ મહિમાનમ્ આનઞ્જ ધીરઃ ।
એકપદીં દ્વિપદીં ત્રિપદીં ચતુષ્પદીમ્ અષ્ટાપદીં ભુવનાનુ પ્રથન્તા સ્વાહા

મરુતો યસ્ય હિ ક્ષયે પાથા દિવો વિમહસઃ ।
સ સુગોપાતમો જનઃ

મહી દ્યૌઃ પૃથિવી ચ ન ઽ ઇમં યજ્ઞં મિમિક્ષતામ્ ।
પિપૃતાં નો ભરીમભિઃ

આ તિષ્ઠ વૃત્રહન્ રથં યુક્તા તે બ્રહ્મણા હરી ।
અર્વાચીનꣳ સુ તે મનો ગ્રાવા કૃણોતુ વગ્નુના ।
ઉપયામગૃહીતો ઽસીન્દ્રાય ત્વા ષોડશિને ।
ઽ એષ તે યોનિર્ ઇન્દ્રાય ત્વા ષોડશિને

યુક્ષ્વા હિ કેશિના હરી વૃષણા કક્ષ્યપ્રા ।
અથા ન ઽ ઇન્દ્ર સોમપા ગિરામ્ ઉપશ્રુતિં ચર ।
ઉપયામગૃહીતો ઽસીન્દ્રાય ત્વા ષોડશિને ।
ઽ એષ તે યોનિર્ ઇન્દ્રાય ત્વા ષોડશિને

ઇન્દ્રમ્ ઇદ્ ધરી વહતો ઽપ્રતિધૃષ્ટશવસમ્ ।
ઋષીણાં ચ સ્તુતીર્ ઉપ યજ્ઞં ચ માનુષાણામ્ ।
ઉપયામગૃહીતો ઽસીન્દ્રાય ત્વા ષોડશિને ।
ઽ એષ તે યોનિર્ ઇન્દ્રાય ત્વા ષોડશિને

યસ્માન્ ન જાતઃ પરો ઽ અન્યો ઽ અસ્તિ ય ઽ આવિવેશ ભુવનાનિ વિશ્વા ।
પ્રજાપતિઃ પ્રજયા સꣳરરાણસ્ ત્રીણિ જ્યોતીષિ સચતે સ ષોડશી

ઇન્દ્રશ્ ચ સમ્રાડ્ વરુણશ્ ચ રાજા તૌ તે ભક્ષં ચક્રતુર્ અગ્ર્ ઽ એતમ્ ।
તયોર્ અહમ્ અનુ ભક્ષં ભક્ષયામિ વાગ્ દેવી જુષાણા સોમસ્ય તૃપ્યતુ ।
સહ પ્રાણેન સ્વાહા

અગ્ને પવસ્વ સ્વપા ઽ અસ્મે વર્ચઃ સુવીર્યમ્ ।
દધદ્ રયિં મયિ પોષમ્ ।
ઉપયામગૃહીતો ઽસ્ય્ અગ્નયે ત્વા વર્ચસે ।
ઽ એષ તે યોનિર્ અગ્નયે ત્વા વર્ચસે ।
અગ્ને વર્ચસ્વિન્ વર્ચસ્વાꣳસ્ ત્વં દેવેષ્વ્ અસિ વર્ચસ્વાન્ અહં મનુષ્યેષુ ભૂયાસમ્

ઉત્તિષ્ઠન્ન્ ઓજસા સહ પીત્વી શિપ્રે ઽ અવેપયઃ ।
સોમમ્ ઇન્દ્ર ચમૂ સુતમ્ ।
ઉપયામગૃહીતો ઽસીન્દ્રાય ત્વૌજસે ।
ઽ એષ તે યોનિર્ ઇન્દ્રાય ત્વૌજસે ।
ઇન્દ્રૌજિષ્ઠૌજિષ્ઠસ્ ત્વં દેવેષ્વ્ અસ્ય્ ઓજિષ્ઠો ઽહં મનુષ્યેષુ ભૂયાસમ્

અદૃશ્રમ્ અસ્ય કેતવો વિ રશ્મયો જનાꣳ ઽ અનુ ।
ભ્રાજન્તો અગ્નયો યથા ।
ઉપયામગૃહીતો ઽસિ સૂર્યાય ત્વા ભ્રાજાય ।
એષ તે યોનિઃ સૂર્યાય ત્વા ભ્રાજાય ।
સૂર્ય ભ્રાજિષ્ઠ ભ્રાજિષ્ઠસ્ ત્વં દેવેષ્વ્ અસિ ભ્રાજિષ્ઠો ઽહં મનુષ્યેષુ ભૂયાસમ્

ઉદ્ ઉ ત્યં જાતવેદસં દેવં વહન્તિ કેતવઃ ।
દૃશે વિશ્વાય સૂર્યમ્ ।
ઉપયામગૃહીતો ઽસિ સૂર્યાય ત્વા ભ્રાજાય ।
એષ તે યોનિઃ સૂર્યાય ત્વા ભ્રાજાય ।
(સૂર્ય ભ્રાજિષ્ઠ ભ્રાજિષ્ઠસ્ ત્વં દેવેષ્વ્ અસિ ભ્રાજિષ્ઠો ઽહં મનુષ્યેષુ ભૂયાસમ્ )॥ ?

આજિઘ્રકલશં મહ્યાત્વાવિશન્ત્વિન્દવઃ।
પુનરૂર્જા નિવર્ત્તસ્વ સા નઃ સહસ્રં ધુક્ષ્વોરુધારા પયસ્વતી પુનર્ માવિશતાદ્ રયિઃ

ઇડે રન્તે હવ્યે કામ્યે ચન્દ્રે જ્યોતે ઽદિતે સરસ્વતિ મહિ વિશ્રુતિ ।
એતા તે ઽ અઘ્ન્યે નામાનિ દેવેભ્યો મા સુકૃતં બ્રૂતાત્

વિ ન ઇન્દ્ર મૃધો જહિ નીચા યચ્છ પૃતન્યતઃ ।
યો ઽ અસ્માઁ૨ ઽ અભિદાસત્ય્ અધરં ગમયા તમઃ ।
ઉપયામગૃહીતો ઽસીન્દ્રાય ત્વા વિમૃધે ।
ઽ એષ તે યોનિર્ ઇન્દ્રાય ત્વા વિમૃધે

વાચસ્ પતિં વિશ્વકર્માણમૂતયે મનોજુવં વાજે ઽ અદ્યા હુવેમ ।
સ નો વિશ્વાનિ હવનાનિ જોષદ્ વિશ્વશમ્ભૂર્ અવસે સાધુકર્મા ।
ઉપયામગૃહીતો ઽસીન્દ્રાય ત્વા વિશ્વકર્મણે ।
ઽ એષ તે યોનિર્ ઇન્દ્રાય ત્વા વિશ્વકર્મણે

વિશ્વકર્મન્ હવિષા વર્ધનેન ત્રાતારમ્ ઇન્દ્રમ્ અકૃણોર્ અવધ્યમ્ ।
તસ્મૈ વિશઃ સમનમન્ત પૂર્વીર્ અયમ્ ઉગ્રો વિહવ્યો યથાસત્ ।
ઉપયામગૃહીતો ઽસીન્દ્રાય ત્વા વિશ્વકર્મણે ।
ઽ એષ તે યોનિર્ ઇન્દ્રાય ત્વા વિશ્વકર્મણે

ઉપયામગૃહીતો ઽસ્ય્ અગ્નયે ત્વા ગાયત્રચ્છન્દસં ગૃહ્ણામિ ।
ઇન્દ્રાય ત્વા ત્રિષ્ટુપ્છન્દસં ગૃહ્ણામિ ।
વિશ્વેભ્યસ્ ત્વા દેવેભ્યો જગચ્છન્દસં ગૃહ્ણામિ ।
અનુષ્ટુપ્ તે ઽભિગરઃ

વ્રેશીનાં ત્વા પત્મન્ન્ આ ધૂનોમિ કુકૂનનાનાં ત્વા પત્મન્ન્ આ ધૂનોમિ ભન્દનાનાં ત્વા પત્મન્ન્ આ ધૂનોમિ મદિન્તમાનાં ત્વા પત્મન્ન્ આ ધૂનોમિ મધુન્તમાનાં ત્વા પત્મન્ન્ આ ધૂનોમિ શુક્રં ત્વા શુક્ર ઽ આ ધૂનોમ્ય્ અહ્નો રૂપે સૂર્યસ્ય રશ્મિષુ

કકુભꣳ રૂપં વૃષભસ્ય રોચતે બૃહચ્ છુક્રઃ શુક્રસ્ય પુરોગાઃ સોમઃ સોમસ્ય પુરોગાઃ ।
યત્ તે સોમાદાભ્યં નામ જાગૃવિ તસ્મૈ ત્વા ગૃહ્ણામિ તસ્મૈ તે સોમ સોમાય સ્વાહા

ઉશિક્ ત્વં દેવ સોમાગ્નેઃ પ્રિયં પાથો ઽપીહિ ।
વશી ત્વં દેવ સોમેન્દ્રસ્ય પ્રિયં પાથો ઽપીહિ ।
અસ્મત્સખા ત્વં દેવ સોમ વિશ્વેષાં દેવાનાં પ્રિયં પાથો ઽપીહિ

ઇહ રતિર્ ઇહ રમધ્વમ્ ઇહ ધૃતિર્ ઇહ સ્વધૃતિઃ સ્વાહા ।
ઉપસૃજન્ ધરુણં માત્રે ધરુણો માતરં ધયન્ ।
રાયસ્પોષમ્ અસ્માસુ દીધરત્ સ્વાહા

સત્રસ્ય ઽ ઋદ્ધિર્ અસ્ય્ અગન્મ જ્યોતિર્ અમૃતા ઽ અભૂમ દિવં પૃથિવ્યા ઽ અધ્ય્ આરુહામાવિદામ દેવાન્ત્ સ્વર્ જ્યોતિઃ

યુવં તમ્ ઇન્દ્રાપર્વતા પુરોયુધા યો નઃ પૃતન્યાદ્ અપ તં-તમ્ ઇદ્ ધતં વજ્રેણ તં-તમ્ ઇદ્ ધતમ્ ।
દૂરે ચત્તાય છન્ત્સદ્ ગહનં યદ્ ઇનક્ષત્ ।
અસ્માકꣳ શત્રૂન્ પરિ શૂર વિશ્વતો દર્મા દર્ષીષ્ટ વિશ્વતઃ ।
ભૂર્ ભુવઃ સ્વઃ સુપ્રજાઃ પ્રજાભિઃ સ્યામ સુવીરા વીરૈઃ સુપોષાઃ પોષૈઃ

પરમેષ્ઠ્ય્ અભિધીતઃ ।
પ્રજાપતિર્ વાચિ વ્યાહૃતાયામ્ ।
અન્ધો ઽ અચ્છેતઃ ।
સવિતા સન્યામ્ ।
વિશ્વકર્મા દીક્ષાયામ્ ।
પૂષા સોમક્રયણ્યામ્

ઇન્દ્રશ્ ચ મરુતશ્ ચ ક્રયાયોપોત્થિતઃ ।
ઽ અસુરઃ પણ્યમાનઃ ।
મિત્રઃ ક્રીતઃ ।
વિષ્ણુઃ શિપિવિષ્ટ ઽ ઊરાવ્ આસન્નઃ ।
વિષ્ણુર્ નરન્ધિષઃ પ્રોહ્યમાણઃ

સોમ ઽ આગતઃ ।
વરુણ ઽ આસન્દ્યામ્ આસન્નઃ ।
ઽ અગ્નિર્ આગ્નીધ્રે ।
ઽ ઇન્દ્રો હવિર્ધાને ।
ઽ અથર્વોપાવહ્રિયમાણઃ

વિશ્વે દેવા ઽ અꣳશુષુ ન્યુપ્તઃ ।
વિષ્ણુર્ આપ્રીતપા ઽ આપ્યાય્યમાનઃ ।
યમઃ સૂયમાનઃ ।
વિષ્ણુઃ સંભ્રિયમાણઃ ।
વાયુઃ પૂયમાનઃ ।
શુક્રઃ પૂતઃ ।
શુક્રં ક્ષીરશ્રીઃ ।
મન્થી સક્તુશ્રીઃ

વિશ્વે દેવાશ્ ચમસેષૂન્નીતઃ ।
ઽ અસુર્ હોમાયોદ્યતઃ ।
રુદ્રો હૂયમાનઃ ।
વાતો ઽભ્યાવૃત્તઃ ।
નૃચક્ષાઃ પ્રતિખ્યાતઃ ।
ભક્ષો ભક્ષ્યમાણઃ ।
પિતરો નારાશꣳસાઃ સન્નઃ

સિન્ધુર્ અવભૃથાયોદ્યતઃ ।
સમુદ્રો ઽભ્યવહ્રિયમાણઃ ।
સલિલઃ પ્રપ્લુતઃ ।
યયોર્ ઓજસા સ્કભિતા રજાꣳસિ વીર્યેભિર્ વીરતમા શવિષ્ઠા ।
યા પત્યેતે ઽ અપ્રતીતા સહોભિર્ વિષ્ણૂ ઽ અગન્ વરુણા પૂર્વહૂતૌ

દેવાન્ દિવમ્ અગન્ યજ્ઞસ્ તતો મા દ્રવિણમ્ અષ્ટુ મનુષ્યાન્ અન્તરિક્ષમ્ અગન્ યજ્ઞસ્ તતો મા દ્રવિણમ્ અષ્ટુ પિતૄન્ પૃથિવીમ્ અગન્ યજ્ઞસ્ તતો મા દ્રવિણમ્ અષ્ટુ યં કં ચ લોકમ્ અગન્ યજ્ઞસ્ તતો મે ભદ્રં અભૂત્

ચતુસ્ત્રિꣳશત્ તન્તવો યે વિતત્નિરે ય ઽ ઇમં યજ્ઞꣳ સ્વધયા દદન્તે ।
તેષાં છિન્નꣳ સમ્ વ્ એતદ્ દધામિ સ્વાહા ઘર્મો ઽ અપ્ય્ એતુ દેવાન્

યજ્ઞસ્ય દોહો વિતતઃ પુરુત્રા સો ઽ અષ્ટધા દિવમ્ અન્વા તતાન ।
સ યજ્ઞ ધુક્ષ્વ મહિ મે પ્રજયાꣳ રાયસ્પોષં વિશ્વમ્ આયુર્ અશીય સ્વાહા

આ પવસ્વ હિરણ્યવદ્ અશ્વવત્ સોમ વીરવત્ ।
વાજં ગોમન્તમ્ આ ભર સ્વાહા ॥