શુક્લયજુર્વેદઃ · અધ્યાય 20

સૌત્રામણી યાગે સેકાદ્યાસન્દીહૌત્રાન્તા મન્ત્રાઃ

ક્ષત્રસ્ય યોનિર્ અસિ ક્ષત્રસ્ય નાભિર્ અસિ ।
મા ત્વા હિꣳસીન્ મા મા હિꣳસીઃ

નિ ષસાદ ઘૃતવ્રતો વરુણઃ પસ્ત્યાસ્વ્ આ ।
સામ્રાજ્યાય સુક્રતુઃ ।
મૃત્યોઃ પાહિ ।
વિદ્યોત્ પાહિ

દેવસ્ય ત્વા સવિતુઃ પ્રસવેઽશ્વિનોર્ બાહુભ્યાં પૂષ્ણો હસ્તાભ્યામ્ ।
અશ્વિનોર્ ભૈષજ્યેન તેજસે બ્રહ્મવર્ચસાયાભિ ષિઞ્ચામિ ।
સરસ્વત્યૈ ભૈષજ્યેન વીર્યાયાન્નાદ્યાયાભિ ષિઞ્ચામિ ।
ઇન્દ્રસ્યેન્દ્રિયેણ બલાય શ્રિયૈ યશસેઽભિ ષિઞ્ચામિ

કો ઽસિ કતમો ઽસિ કસ્મૈ ત્વા કાય ત્વા ।
સુશ્લોક સુમઙ્ગલ સત્યરાજન્

શિરો મે શ્રીર્ યશો મુખં ત્વિષિઃ કેશાશ્ ચ શ્મશ્રૂણિ ।
રાજા મે પ્રાણો ઽ અમૃતꣳ સમ્રાટ્ ચક્ષુર્ વિરાટ્ શ્રોત્રમ્

જિહ્વા મે ભદ્રં વાઙ્ મહો મનો મન્યુઃ સ્વરાડ્ ભામઃ ।
મોદાઃ પ્રમોદા ઽ અઙ્ગુલીર્ અઙ્ગાનિ મિત્રં મે સહઃ

બાહૂ મે બલમ્ ઇન્દ્રિયꣳ હસ્તૌ મે કર્મ વીર્યમ્ ।
આત્મા ક્ષત્રમ્ ઉરો મમ

પૃષ્ટીર્ મે રાષ્ટ્રમ્ ઉદરમ્ અꣳસૌ ગ્રીવાશ્ ચ શ્રોણી ।
ઊરૂ ઽ અરત્ની જાનુની વિશો મે ઽઙ્ગાનિ સર્વતઃ

નાભિર્ મે ચિત્તં વિજ્ઞાનં પાયુર્ મે ઽપચિતિર્ ભસત્ ।
આનન્દનન્દાવ્ આણ્ડૌ મે ભગઃ સૌભાગ્યં પસઃ ।
જઙ્ઘાભ્યાં પદ્ભ્યાં ધર્મો ઽસ્મિ વિશિ રાજા પ્રતિષ્ઠિતઃ

પ્રતિ ક્ષત્રે પ્રતિ તિષ્ઠામિ રાષ્ટ્રે પ્રત્ય્ અશ્વેષુ પ્રતિ તિષ્ઠામિ ગોષુ ।
પ્રત્ય્ અઙ્ગેષુ પ્રતિ તિષ્ઠામ્ય્ આત્મન્ પ્રતિ પ્રાણેષુ ક્ષત્રે પ્રતિ તિષ્ઠામિ પુષ્ટે પ્રતિ દ્યાવાપૃથિવ્યોઃ પ્રતિ તિષ્ઠામિ

ત્રયા દેવા ઽ એકાદશ ત્રયસ્ત્રિꣳશાઃ સુરાધસઃ ।
બૃહસ્પતિપુરોહિતા દેવસ્ય સવિતુઃ સવે ।
દેવા દેવૈર્ અવન્તુ મા

પ્રથમા દ્વિતીયૈર્ દ્વિતીયાસ્ તૃતીયૈસ્ તૃતીયાઃ સત્યેન સત્યં યજ્ઞેન યજ્ઞો યજુર્ભિર્ યજૂꣳષિ સામભિઃ સામાન્ય્ ઋગ્ભિર્ ઋચઃ પુરોનુઽવાક્યાભિઃ પુરોઽનુવાક્યા યાજ્યાભિર્ યાજ્યા વષટ્કારૈર્ વષટ્કારા ઽ આહુતિભિર્ આહુતયો મે કામાન્ત્ સમ્ અર્ધયન્તુ ભૂઃ સ્વાહા

લોમાનિ પ્રયતિર્ મમ ત્વઙ્ મ ઽ આનતિર્ આગતિઃ ।
માꣳસં મ ઽ ઉપનતિર્ વસ્વ્ અસ્થિ મજ્જા મ ઽ આનતિઃ

યદ્ દેવા દેવહેડનં દેવાસશ્ ચકૃમા વયમ્ ।
અગ્નિર્ મા તસ્માદ્ એનસો વિશ્વાન્ મુઞ્ચત્વ્ અꣳહસઃ

યદિ દિવા યદિ નક્તમ્ એનાꣳસિ ચકૃમા વયમ્ ।
વાયુર્ મા તસ્માદ્ એનસો વિશ્વાન્ મુઞ્ચત્વ્ અꣳહસઃ

યદિ જાગ્રદ્ યદિ સ્વપ્ન ઽ એનાꣳસિ ચકૃમા વયમ્ ।
સૂર્યો મા તસ્માદ્ એનસો વિશ્વાન્ મુઞ્ચત્વ્ અꣳહસઃ

યદ્ ગ્રામે યદ્ અરણ્યે યત્ સભાયાં યદ્ ઇન્દ્રિયે ।
યચ્છૂદ્રે યદ્ અર્યે યદ્ એનશ્ ચકૃમા વયં યદ્ એકસ્યાધિ ધર્મણિ તસ્યાવયજનમ્ અસિ

યદ્ આપો ઽ અઘ્ન્યા ઽ ઇતિ વરુણેતિ શપામહે તતો વરુણ નો મુઞ્ચ ।
અવભૃથ નિચુમ્પુણ નિચેરુર્ અસિ નિચુમ્પુણઃ ।
અવ દેવૈર્ દેવકૃતમ્ એનો ઽયક્ષ્ય્ અવ મર્ત્યૈર્ મર્ત્યકૃતમ્ ।
પુરુરાવ્ણો દેવ રિષસ્ પાહિ

સમુદ્રે તે હૃદયમ્ અપ્સ્વ્ અન્તઃ સં ત્વા વિશન્ત્વ્ ઓષધીર્ ઉતાપઃ ।
સુમિત્રિયા ન ઽ આપ ઽ ઓષધયઃ સન્તુ દુર્મિત્રિયાસ્ તસ્મૈ સન્તુ યો ઽસ્માન્ દ્વેષ્ટિ યં ચ વયં દ્વિષ્મઃ

દ્રુપદાદ્ ઇવ મુમુચાનઃ સ્વિન્નઃ સ્નાતો મલાદ્ ઇવ ।
પૂતં પવિત્રેણેવાજ્યમ્ આપઃ શુન્ધન્તુ મૈનસઃ

ઉદ્ વયં તમસસ્ પરિ સ્વઃ પશ્યન્ત ઽ ઉત્તરમ્ ।
દેવં દેવત્રા સૂર્યમ્ અગન્મ જ્યોતિર્ ઉત્તમમ્

અપો ઽ અદ્યાન્વ્ અચારિષꣳ રસેન સમ્ અસૃક્ષ્મહિ ।
પયસ્વાન્ અગ્ન ઽ આગમં તં મા સꣳ સૃજ વર્ચસા પ્રજયા ચ ધનેન ચ

એધોઽસ્ય્ એધિષીમહિ ।
સમિદ્ અસિ તેજો ઽસિ તેજો મયિ ધેહિ ।
સમાવવર્તિ પૃથિવી સમ્ ઉષાઃ સમ્ ઉ સૂર્યઃ ।
સમ્ ઉ વિશ્વમ્ ઇદં જગત્ ।
વૈશ્વાનરજ્યોતિર્ ભૂયાસં વિભૂન્ કામાન્ વ્યશ્નવૈ ભૂઃ સ્વાહા

અભ્યાદધામિ સમિધમ્ અગ્ને વ્રતપતે ત્વયિ ।
વ્રતં ચ શ્રદ્ધાં ચોપૈમીન્ધે ત્વા દીક્ષિતોઽઅહમ્

યત્ર બ્રહ્મ ચ ક્ષત્રં ચ સમ્યઞ્ચો ચરતઃ સહ ।
તં લોકં પુણ્યં પ્રજ્ઞેષં યત્ર દેવાઃ સહાગ્નિના

યત્રેન્દ્રશ્ ચ વાયુશ્ ચ સમ્યઞ્ચો ચરતઃ સહ ।
તં લોકં પુણ્યં પ્રજ્ઞેષં યત્ર સેદિર્ ન વિદ્યતે

અꣳશુના તે અꣳશુઃ પૃચ્યતાં પરુષા પરુઃ ।
ગન્ધસ્ તે સોમમ્ અવતુ મદાય રસોઽઅચ્યુતઃ

સિઞ્ચન્તિ પરિ ષિઞ્ચન્ત્ય્ ઉત્ સિઞ્ચન્તિ પુનન્તિ ચ ।
સુરાયૈ બભ્ર્વૈ મદે કિંત્વો વદતિ કિંત્વઃ

ધાનાવન્તં કરમ્ભિણમ્ અપૂપવન્તમ્ ઉક્થિનમ્ ।
ઇન્દ્ર પ્રાતર્ જુષસ્વ નઃ

બૃહદ્ ઇન્દ્રાય ગાયત મરુતો વૃત્રહન્તમમ્ ।
યેન જ્યોતિર્ અજનયન્ન્ ઋતાવૃધો દેવં દેવાય જાગૃવિ

અધ્વર્યો ઽ અદ્રિભિઃ સુતꣳ સોમં પવિત્ર ઽ આ નય ।
પુનીહીન્દ્રાય પાતવે

યો ભૂતાનામ્ અધિપતિર્ યસ્મિંલ્લોકા ઽ અધિ શ્રિતાઃ ।
ય ઽ ઈશે મહતો મહાꣳસ્ તેન ગૃહ્ણામિ ત્વામ્ અહં મયિ ગૃહ્ણામિ ત્વામ્ અહમ્

ઉપયામગૃહીતો ઽસ્ય્ અશ્વિભ્યાં ત્વા સરસ્વત્યૈ ત્વેન્દ્રાય ત્વા સુત્રામ્ણેઽ ।
એષ તે યોનિર્ અશ્વિભ્યાં ત્વા સરસ્વત્યૈ ત્વેન્દ્રાય ત્વા સુત્રામ્ણે

પ્રાણપા મે ઽઅપાનપાશ્ ચક્ષુષ્પાઃ શ્રોત્રપાશ્ ચ મે ।
વાચો મે વિશ્વભેષજો મનસો ઽસિ વિલાયકઃ

અશ્વિનકૃતસ્ય તે સરસ્વતિકૃતસ્યેન્દ્રેણ સુત્રામ્ણા કૃતસ્ય ।
ઉપહૂત ઽઉપહૂતસ્ય ભક્ષયામિ

સમિદ્ધ ઽ ઇન્દ્ર ઽ ઉષસામ્ અનીકે પુરોરુચા પૂર્વકૃદ્ વાવૃધાનઃ ।
ત્રિભિર્ દેવૈસ્ ત્રિꣳશતા વજ્રબાહુર્ જઘાન વૃત્રં વિ દુરો વવાર

નરાશꣳસઃ પ્રતિ શૂરો મિમાનસ્ તનૂનપાત્ પ્રતિ યજ્ઞસ્ય ધામ ।
ગોભિર્ વપાવાન્ મધુના સમઞ્જન્ હિરણ્યૈશ્ ચન્દ્રી યજતિ પ્રચેતાઃ

ઈડિતો દેવૈર્ હરિવાꣳ૨ઽ અભિષ્ટિર્ આજુહ્વાનો હવિષા શર્ધમાનઃ ।
પુરંદરો ગોત્રભિદ્ વજ્રબાહુર્ આ યાતુ યજ્ઞમ્ ઉપ નો જુષાણઃ

જુષાણો બર્હિર્ હરિવાન્ ન ઽ ઇન્દ્રઃ પ્રાચીનꣳ સીદત્ પ્રદિશા પૃથિવ્યાઃ ।
ઉરુપ્રથાઃ પ્રથમાનꣳ સ્યોનમ્ આદિત્યૈર્ અક્તં વસુભિઃ સજોષાઃ

ઇન્દ્રં દુરઃ કવષ્યો ધાવમાના વૃષાણં યન્તુ જનયઃ સુપત્નીઃ ।
દ્વારો દેવીર્ અભિતો વિ શ્રયન્તાꣳ સુવીરા વીરં પ્રથમાના મહોભિઃ

ઉષાસાનક્તા બૃહતી બૃહન્તં પયસ્વતી સુદુઘે શૂરમ્ ઇન્દ્રમ્ ।
તન્તું તતં પેશસા સંવયન્તી દેવાનાં દેવં યજતઃ સુરુક્મે

દૈવ્યા મિમાના મનુષઃ પુરુત્રા હોતારાવ્ ઇન્દ્રં પ્રથમા સુવાચા ।
મૂર્દ્ધન્ યજ્ઞસ્ય મધુના દધાના પ્રાચીનં જ્યોતિર્ હવિષા વૃધાતઃ

તિસ્રો દેવીર્ હવિષા વર્ધમાના ઽ ઇન્દ્રં જુષાણા જનયો ન પત્નીઃ ।
અચ્છિન્નં તન્તું પયસા સરસ્વતીડા દેવી ભારતી વિશ્વતૂર્તિઃ

ત્વષ્ટા દધચ્છુષ્મમ્ ઇન્દ્રાય વૃષ્ણે ઽપાકો ઽચિષ્ટુર્ યશસે પુરૂણિ ।
વૃષા યજન્ વૃષણં ભૂરિરેતા મૂર્ધન્ યજ્ઞસ્ય સમ્ અનક્તુ દેવાન્

વનસ્પતિર્ અવસૃષ્ટો ન પાશૈસ્ ત્મન્યા સમઞ્જઞ્છમિતા ન દેવઃ ।
ઇન્દ્રસ્ય હવ્યૈર્ જઠરં પૃણાનઃ સ્વદાતિ યજ્ઞં મધુના ઘૃતેન

સ્તોકાનાં ઇન્દું પ્રતિ શૂર ઽ ઇન્દ્રો વૃષાયમાણો વૃષભસ્ તુરાષાટ્ ।
ઘૃતપ્રુષા મનસા મોદમાનાઃ સ્વાહા દેવા ઽ અમૃતા માદયન્તામ્

આ યાત્વ્ ઇન્દ્રો ઽવસ ઽ ઉપ ન ઽ ઇહ સ્તુતઃ સધમાદસ્તુ શૂરઃ ।
વાવૃધાનસ્ તવિષીર્ યસ્ય પૂર્વીર્ દ્યૌર્ ન ક્ષત્રમ્ અભિભૂતિ પુષ્યાત્

આ ન ઽ ઇન્દ્રો દૂરાદ્ આ ન ઽ આસાદ્ અભિષ્ટિકૃદ્ અવસે યાસદ્ ઉગ્રઃ ।
ઓજિષ્ઠેભિર્ નૃપતિર્ વજ્રબાહુઃ સંગે સમત્સુ તુર્વણિઃ પૃતન્યૂન્

આ ન ઇન્દ્રો હરિભિર્ યાત્વ્ અચ્છાર્વાચીનો ઽવસે રાધસે ચ ।
તિષ્ઠાતિ વજ્રી મઘવા વિરપ્શીમં યજ્ઞમ્ અનુ નો વાજસાતૌ

ત્રાતારમ્ ઇન્દ્રમ્ અવિતારમ્ ઇન્દ્રꣳ હવે-હવે સુહવꣳ શૂરમ્ ઇન્દ્રમ્ ।
હ્વયામિ શક્રં પુરુહૂતમ્ ઇન્દ્રꣳ સ્વસ્તિ નો મઘવા ધાત્વ્ ઇન્દ્રઃ

ઇન્દ્રઃ સુત્રામા સ્વવાꣳ૨ઽ અવોભિઃ સુમૃડીકો ભવતુ વિશ્વવેદાઃ ।
બાધતાં દ્વેષો ઽ અભયં કૃણોતુ સુવીર્યસ્ય પતયઃ સ્યામ

તસ્ય વયꣳ સુમતૌ યજ્ઞિયસ્યાપિ ભદ્રે સૌમનસે સ્યામ ।
સ સુત્રામા સ્વવાꣳ૨ઽ ઇન્દ્રો ઽ અસ્મે આરાચ્ચિદ્ દ્વેષઃ સનુતર્ યુયોતુ

આ મન્દ્રૈર્ ઇન્દ્ર હરિભિર્ યાહિ મયૂરરોમભિઃ ।
મા ત્વા કે ચિન્ નિ યમન્ વિં ના પાશિનો ઽતિ ધન્વેવ તાꣳ૨ઽ ઇહિ

એવેદ્ ઇન્દ્રં વૃષણં વજ્રબાહું વસિષ્ઠાસો ઽ અભ્ય્ અર્ચન્ત્ય્ અર્કૈઃ ।
સ ન સ્તુતો વીરવદ્ ધાતુ ગોમદ્ યૂયં પાત સ્વસ્તિભિઃ સદા નઃ

સમિદ્ધો ઽ અગ્નિર્ અશ્વિના તપ્તો ઘર્મો વિરાટ્ સુતઃ ।
દુહે ધેનુઃ સરસ્વતી સોમꣳ શુક્રમ્ ઇહેન્દ્રિયમ્

તનૂપા ભિષજા સુતે ઽશ્વિનોભા સરસ્વતી ।
અધ્વા રજાꣳસીન્દ્રિયમ્ ઇન્દ્રાય પથિભિર્ વહાન્

ઇન્દ્રાયેન્દુꣳ સરસ્વતી નરાશꣳસેન નગ્નહુમ્ ।
અધાતામ્ અશ્વિના મધુ ભેષજં ભિષજા સુતે

આજુહ્વાના સરસ્વતીન્દ્રાયેન્દ્રિયાણિ વીર્યમ્ ।
ઇડાભિર્ અશ્વિનાવ્ ઇષꣳ સમૂર્જꣳ સꣳ રયિં દધુઃ

અશ્વિના નમુચેઃ સુતꣳ સોમꣳ શુક્રં પરિસ્રુતા ।
સરસ્વતી તામ્ આભરદ્ બર્હિષેન્દ્રાય પાતવે

કવષ્યો ન વ્યચસ્વતીર્ અશ્વિભ્યાં ન દુરો દિશઃ ।
ઇન્દ્રો ન રોદસી ઽ ઉભે દુહે કામાન્ત્ સરસ્વતી

ઉષાસાનક્તાશ્વિના દિવેન્દ્રꣳ સાયમ્ ઇન્દ્રિયૈઃ ।
સંજાનાને સુપેશસા સમ્ અઞ્જાતે સરસ્વત્યા

પાતં નો ઽ અશ્વિના દિવા પાહિ નક્તꣳ સરસ્વતિ ।
દૈવ્યા હોતારા ભિષજા પાતામ્ ઇન્દ્રꣳ સચા સુતે

તિસ્રસ્ ત્રેધા સરસ્વત્ય્ અશ્વિના ભારતીડા ।
તીવ્રં પરિસ્રુતા સોમમ્ ઇન્દ્રાય સુષુવુર્ મદમ્

અશ્વિના ભેષજં મધુ ભેષજં નઃ સરસ્વતી ।
ઇન્દ્રે ત્વષ્ટા યશઃ શ્રિયꣳ રૂપꣳ-રૂપમ્ અધુઃ સુતે

ઋતુથેન્દ્રો વનસ્પતિઃ શશમાનઃ પરિસ્રુતા ।
કીલાલમ્ અશ્વિભ્યાં મધુ દુહે ધેનુઃ સરસ્વતી

ગોભિર્ ન સોમમ્ અશ્વિના માસરેણ પરિસ્રુતા ।
સમ્ અધાતꣳ સરસ્વત્યા સ્વાહેન્દ્રે સુતં મધુ

અશ્વિના હવિર્ ઇન્દ્રિયં નમુચેર્ ધિયા સરસ્વતી ।
આ શુક્રમ્ આસુરાદ્ વસુ મઘમ્ ઇન્દ્રાય જભ્રિરે

યમ્ અશ્વિના સરસ્વતી હવિષેન્દ્રમ્ અવર્ધયન્ ।
સ બિભેદ વલં મઘં નમુચાવ્ આસુરે સચા

તમ્ ઇન્દ્રꣳ સચાશ્વિનોભા સરસ્વતી ।
દધાના ઽ અભ્ય્ અનૂષત હવિષા યજ્ઞ ઽ ઇન્દ્રિયૈઃ

ય ઽ ઇન્દ્ર ઽ ઇન્દ્રિયં દધુઃ સવિતા વરુણો ભગઃ ।
સ સુત્રામા હવિષ્પતિર્ યજમાનાય સશ્ચત

સવિતા વરુણો દધદ્ યજમાનાય દાશુષે ।
આદત્ત નમુચેર્ વસુ સુત્રામા બલમ્ ઇન્દ્રિયમ્

વરુણઃ ક્ષત્રમ્ ઇન્દ્રિયં ભગેન સવિતા શ્રિયમ્ ।
સુત્રામા યશસા બલં દધાના યજ્ઞમ્ આશત

અશ્વિના ગોભિર્ ઇન્દ્રિયમ્ અશ્વેભિર્ વીર્યં બલમ્ ।
હવિષેન્દ્રꣳ સરસ્વતી યજમાનમ્ અવર્દ્ધયન્

તા નાસત્યા સુપેશસા હિરણ્યવર્તની નરા ।
સરસ્વતી હવિષ્મતીન્દ્ર કર્મસુ નો ઽવત

તા ભિષજા સુકર્મણા સા સુદુઘા સરસ્વતી ।
સ વૃત્રહા શતક્રતુર્ ઇન્દ્રાય દધુર્ ઇન્દ્રિયમ્

યુવꣳ સુરામમ્ અશ્વિના નમુચાવ્ આસુરે સચા ।
વિપિપાનાઃ સરસ્વતીન્દ્રં કર્મસ્વ્ આવત

પુત્રમ્ ઇવ પિતરાવ્ અશ્વિનોભેન્દ્રાવથુઃ કાવ્યૈર્ દꣳસનાભિઃ ।
યત્ સુરામં વ્યપિબઃ શચીભિઃ સરસ્વતી ત્વા મઘવન્ન્ અભિષ્ણક્

યસ્મિન્ન્ અશ્વાસ ઽ ઋષભાસ ઽ ઉક્ષણો વશા મેષા ઽ અવસૃષ્ટાસ ઽ આહુતાઃ ।
કીલાલપે સોમપૃષ્ઠાય વેધસે હૃદા મતિં જનયે ચારુમ્ અગ્નયે

અહાવ્ય્ અગ્ને હવિર્ આસ્યે તે સ્રુચીવ ઘૃતં ચમ્વીવ સોમઃ ।
વાજસનિꣳ રયિમ્ અસ્મે સુવીરં પ્રશસ્તં ધેહિ યશસં બૃહન્તમ્

અશ્વિના તેજસા ચક્ષુઃ પ્રાણેન સરસ્વતી વીર્યમ્ ।
વાચેન્દ્રો બલેનેન્દ્રાય દધુર્ ઇન્દ્રિયમ્

ગોમદ્ ઊ ષુ ણાસત્યા અશ્વાવદ્ યાતમ્ અશ્વિના ।
વર્તી રુદ્રા નૃપાય્યમ્

ન યત્ પરો નાન્તરઽ આદધર્ષદ્ વૃષણ્વસૂ ।
દુઃશꣳસો મર્ત્યો રિપુઃ

તા ન ઽ આ વોઢમ્ અશ્વિના રયિં પિશઙ્ગસંદૃશમ્ ।
ધિષ્ણ્યા વરિવોવિદમ્

પાવકા નઃ સરસ્વતી વાજેભિર્ વાજિનીવતી ।
યજ્ઞં વષ્ટુ ધિયાવસુઃ

ચોદયિત્રી સૂનૃતાનાં ચેતન્તી સુમતીનામ્ ।
યજ્ઞં દધે સરસ્વતી

મહો ઽ અર્ણઃ સરસ્વતી પ્ર ચેતયતિ કેતુના ।
ધિયો વિશ્વા વિ રાજતિ

ઇન્દ્રા યાહિ ચિત્રભાનો સુતા ઽ ઇમે ત્વાયવઃ ।
અણ્વીભિસ્ તના પૂતાસઃ

ઇન્દ્રા યાહિ ધિયેષિતો વિપ્રજૂતઃ સુતાવતઃ ।
ઉપ બ્રહ્માણિ વાઘતઃ

ઇન્દ્રા યાહિ તૂતુજાન ઽ ઉપ બ્રહ્માણિ હરિવઃ ।
સુતે દધિષ્વ નશ્ ચનઃ

અશ્વિના પિબતાં મધુ સરસ્વત્યા સજોષસા ।
ઇન્દ્રઃ સુત્રામા વૃત્રહા જુષન્તાꣳ સોમ્યં મધુ ॥