શુક્લયજુર્વેદઃ · અધ્યાય 11

અગ્નિચયને ઉખાદિ સમિદાધ્યન્ત મન્ત્રાઃ

યુઞ્જાનઃ પ્રથમં મનસ્ તત્વાય સવિતા ધિયમ્ ।
અગ્નેર્ જ્યોતિર્ નિચાય્ય પૃથિવ્યા ઽ અધ્ય્ આભરત્

યુક્તેન મનસા વયં દેવસ્ય સવિતુઃ સવે ।
સ્વર્ગ્યાય શક્ત્યા

યુક્ત્વાય સવિતા દેવાન્ત્ સ્વર્યતો ધિયા દિવમ્ ।
બૃહજ્ જ્યોતિઃ કરિષ્યતઃ સવિતા પ્ર સુવાતિ તાન્

યુઞ્જતે મન ઽ ઉત યુઞ્જતે ધિયો વિપ્રા વિપ્રસ્ય બૃહતો વિપશ્ચિતઃ ।
વિ હોત્રા દધે વયુનાવિદ્ એક ઽ ઇન્ મહી દેવસ્ય સવિતુઃ પરિષ્ટુતિઃ

યુજે વાં બ્રહ્મ પૂર્વ્યં નમોભિર્ વિ શ્લોક ઽ એતુ પથ્યેવ સૂરેઃ ।
શૃણ્વન્તુ વિશ્વે ઽ અમૃતસ્ય પુત્રા ઽ આ યે ધામાનિ દિવ્યાનિ તસ્થુઃ

યસ્ય પ્રયાણમ્ અન્વ્ અન્ય ઽ ઇદ્ યયુર્ દેવા દેવસ્ય મહિમાનમ્ ઓજસા ।
યઃ પાર્થિવાનિ વિમમે સ ઽ એતશો રજાસિ દેવઃ સવિતા મહિત્વના

દેવ સવિતઃ પ્ર સુવ યજ્ઞં પ્ર સુવ યજ્ઞપતિં ભગાય ।
દિવ્યો ગન્ધર્વઃ કેતપૂઃ કેતં નઃ પુનાતુ વાચસ્ પતિર્ વાચં નઃ સ્વદતુ

ઇમં નો દેવ સવિતર્ યજ્ઞં પ્ર ણય દેવાવ્યꣳ સખિવિદꣳ સત્રાજિતં ધનજિતꣳ સ્વર્જિતમ્ ।
ઋચા સ્તોમꣳ સમર્ધય ગાયત્રેણ રથન્તરં બૃહદ્ ગાયત્રવર્તનિ સ્વાહા

દેવસ્ય ત્વા સવિતુઃ પ્રસવે ઽશ્વિનોર્ બાહુભ્યાં પૂષ્ણો હસ્તાભ્યામ્ ।
આ દદે ગાયત્રેણ છન્દસાઙ્ગિરસ્વત્ પૃથિવ્યાઃ સધસ્થાદ્ અગ્નિં પુરીષ્યમ્ અઙ્ગિરસ્વદ્ આ ભર ત્રૈષ્ટુભેન છન્દસાઙ્ગિરસ્વત્

અભ્રિર્ અસિ નાર્ય્ અસિ ત્વયા વયમ્ અગ્નિꣳ શકેમ ખનિતુꣳ સધસ્થ આ જાગતેન છન્દસાઙ્ગિરસ્વત્

હસ્ત ઽ આધાય સવિતા બિભ્રદ્ અભ્રિꣳ હિરણ્યયીમ્ ।
અગ્નેર્ જ્યોતિર્ નિચાય્ય પૃથિવ્યા ઽ અધ્ય્ આ ભર ।
આનુષ્ટુભેન છન્દસાઙ્ગિરસ્વત્

પ્રતૂર્તં વાજિન્ન્ આ દ્રવ વરિષ્ઠામ્ અનુ સમ્વતમ્ ।
દિવિ તે જન્મ પરમમ્ અન્તરિક્ષે તવ નાભિઃ પૃથિવ્યામ્ અધિ યોનિર્ ઇત્

યુઞ્જાથાꣳ રાસભં યુવમ્ અસ્મિન્ યામે વૃષણ્વસૂ ।
અગ્નિં ભરન્તમ્ અસ્મયુમ્

યોગે-યોગે તવસ્તરં વાજે-વાજે હવામહે ।
સખાય ઽ ઇન્દ્રમૂતયે

પ્રતૂર્વન્ન્ એહ્ય્ અવક્રામન્ન્ અશસ્તો રુદ્રસ્ય ગાણપત્યં મયોભૂર્ એહિ ।
ઉર્વ્ અન્તરિક્ષં વીહિ ।
સ્વસ્તિગવ્યૂતિર્ અભયાનિ કૃણ્વન્ પૂષ્ણા સયુજા સહ

પૃથિવ્યાઃ સધસ્થાદ્ અગ્નિં પુરીષ્યમ્ અઙ્ગિરસ્વદ્ આ ભર ।
અગ્નિં પુરીષ્યમ્ અઙ્ગિરસ્વદ્ અચ્છેમઃ ।
ઽ અગ્નિં પુરીષ્યમ્ અઙ્ગિરસ્વદ્ ભરિષ્યામઃ

અન્વ્ અગ્નિર્ ઉષસામ્ અગ્રમ્ અખ્યદ્ અન્વ્ અહાનિ પ્રથમો જાતવેદાઃ ।
અનુ સૂર્યસ્ય પુરુત્રા ચ રશ્મીન્ અનુ દ્યાવાપૃથિવી ઽ આ તતન્થ

આગત્ય વાજ્ય્ અધ્વાનꣳ સર્વા મૃધો વિધૂનુતે ।
અગ્નિꣳ સધસ્થે મહતિ ચક્ષુષા નિ ચિકીષતે

આક્રમ્ય વાજિન્ પૃથિવીમ્ અગ્નિમ્ ઇચ્છ રુચા ત્વમ્ ।
ભૂમ્યા વૃક્ત્વાય નો બ્રૂહિ યતઃ ખનેમ તં વયમ્

દ્યૌસ્ તે પૃષ્ઠં પૃથિવી સધસ્થમ્ આત્માન્તરિક્ષꣳ સમુદ્રો યોનિઃ ।
વિખ્યાય ચક્ષુષા ત્વમ્ અભિ તિષ્ઠ પૃતન્યતઃ

ઉત્ ક્રામ મહતે સૌભગાયાસ્માદ્ આસ્થાનાદ્ દ્રવિણોદા વાજિન્ ।
વયꣳ સ્યામ સુમતૌ પૃથિવ્યા ઽ અગ્નિં ખનન્ત ઽ ઉપસ્થે ઽ અસ્યાઃ

ઉદ્ અક્રમીદ્ દ્રવિણોદા વાજ્ય્ અર્વાકઃ સુ લોકꣳ સુકૃતં પૃથિવ્યામ્ ।
તતઃ ખનેમ સુપ્રતીકમ્ અગ્નિꣳ સ્વો રુહાણા ઽ અધિ નાકમ્ ઉત્તમમ્

આ ત્વા જિઘર્મિ મનસા ઘૃતેન પ્રતિક્ષિયન્તં ભુવનાનિ વિશ્વા ।
પૃથું તિરશ્ચા વયસા બૃહન્તં વ્યચિષ્ઠમ્ અન્નૈ રભસં દૃશાનમ્

આ વિશ્વતઃ પ્રત્યઞ્ચં જિઘર્મ્ય્ અરક્ષસા મનસા તજ્ જુષેત ।
મર્યશ્રી સ્પૃહયદ્વર્ણો ઽ અગ્નિર્ નાભિમૃશે તન્વા જર્ભુરાણઃ

પરિ વાજપતિઃ કવિર્ અગ્નિર્ હવ્યાન્ય્ અક્રમીત્ ।
દધદ્ રત્નાનિ દાશુષે

પરિ ત્વાગ્ને પુરં વયં વિપ્રꣳ સહસ્ય ધીમહિ ।
ધૃષદ્વર્ણં દિવે-દિવે હન્તારં ભઙ્ગુરાવતામ્

ત્વમ્ અગ્ને દ્યુભિસ્ ત્વમ્ આશુશુક્ષણિસ્ ત્વમ્ અદ્ભ્યસ્ ત્વમ્ અશ્મનસ્ પરિ ।
ત્વં વનેભ્યસ્ ત્વમ્ ઓષધીભ્યસ્ ત્વં નૃણાં નૃપતે જાયસે શુચિઃ

દેવસ્ય ત્વા સવિતુઃ પ્રસવેઽશ્વિનોર્ બાહુભ્યાં પૂષ્ણો હસ્તાભ્યામ્ ।
પૃથિવ્યાઃ સધસ્થાદ્ અગ્નિં પુરીષ્યમ્ અઙ્ગિરસ્વત્ ખનામિ ।
જ્યોતિષ્મન્તં ત્વાગ્ને સુપ્રતીકમ્ અજસ્રેણ ભાનુના દીદ્યતમ્ ।
શિવં પ્રજાભ્યો ઽહિꣳસન્તં પૃથિવ્યા સધસ્થાદ્ અગ્નિં પુરીષ્યમ્ અઙ્ગિરસ્વત્ ખનામઃ

અપાં પૃષ્ઠમ્ અસિ યોનિર્ અગ્નેઃ સમુદ્રમ્ અભિતઃ પિન્વમાનમ્ ।
વર્ધમાનો મહાꣳ૨ઽ આ ચ પુષ્કરે દિવો માત્રયા વરિમ્ણા પ્રથસ્વ

શર્મ ચ સ્થો વર્મ ચ સ્થો ઽચ્છિદ્રે બહુલે ઽ ઉભે ।
વ્યચસ્વતી સં વસાથાં ભૃતમ્ અગ્નિં પુરીષ્યમ્

સંવસાથા સ્વર્વિદા સમીચી ઽ ઉરસા ત્મના ।
અગ્નિમ્ અન્તર્ ભરિષ્યન્તી જ્યોતિષ્મન્તમ્ અજસ્રમ્ ઇત્

પુરીષ્યો સિ વિશ્વભરા ઽ અથર્વા ત્વા પ્રથમો નિર્ અમન્થદ્ અગ્ને ।
ત્વામ્ અગ્ને પુષ્કરાદ્ અધ્ય્ અથર્વા નિર્ અમન્થત ।
મૂર્ધ્નો વિશ્વસ્ય વાઘતઃ

તમ્ ઉ ત્વા દધ્યઙ્ઙ્ ઋષિઃ પુત્ર ઽ ઈધે અથર્વણઃ ।
વૃત્રહણં પુરંદરમ્

તમ્ ઉ ત્વા પાથ્યો વૃષા સમીધે દસ્યુહન્તમમ્ ।
ધનંજયꣳ રણે-રણે

સીદ હોતઃ સ્વ ઽ ઉ લોકે ચિકિત્વાન્ સાદયા યજ્ઞꣳ સુકૃતસ્ય યોનૌ ।
દેવાવીર્ દેવાન્ હવિષા યજાસ્ય્ અગ્ને બૃહદ્ યજમાને વયો ધાઃ

નિ હોતા હોતૃષદને વિદાનસ્ ત્વેષો દીદિવાꣳ૨ ઽ અસદત્ સુદક્ષઃ ।
અદબ્ધવ્રતપ્રમતિર્ વસિષ્ઠઃ સહસ્રમ્ભરઃ શુચિજિહ્વો ઽ અગ્નિઃ

સꣳ સીદસ્વ મહાꣳ૨ ઽ અસિ શોચસ્વ દેવવીતમઃ ।
વિ ધૂમમ્ ઽ અગ્ને અરુષં મિયેધ્ય સૃજ પ્રશસ્ત દર્શતમ્

અપો દેવીર્ ઉપસૃજ મધુમતીર્ અયક્ષ્માય પ્રજાભ્યઃ ।
તાસામ્ આસ્થાનાદ્ ઉજ્ જિહતામ્ ઓષધયઃ સુપિપ્પલાઃ

સં તે વાયુર્ માતરિશ્વા દધાતૂત્તાનાયા હૃદયં યદ્ વિકસ્તમ્ ।
યો દેવાનાં ચરસિ પ્રાણથેન કસ્મૈ દેવ વષડ્ અસ્તુ તુભ્યમ્

સુજાતો જ્યોતિષા સહ શર્મ વરૂથમ્ આસદત્ સ્વઃ ।
વાસો ઽ અગ્ને વિશ્વરૂપꣳ સંવ્યયસ્વ વિભાવસો

ઉદ્ ઉ તિષ્ઠ સ્વધ્વરાવા નો દેવ્યા ધિયા ।
દૃશે ચ ભાસા બૃહતા શુશુક્વનિર્ આગ્ને યાહિ સુશસ્તિભિઃ

ઊર્ધ્વ ઽ ઊ ષુ ણ ઽ ઊતયે તિષ્ઠા દેવો ન સવિતા ।
ઊર્ધ્વો વાજસ્ય સનિતા યદ્ અઞ્જિભિર્ વાઘદ્ભિર્ વિહ્વયામહે

સ જાતો ગર્ભો ઽ અસિ રોદસ્યોર્ અગ્ને ચારુર્ વિભૃત ઽ ઓષધીષુ ।
ચિત્રઃ શિશુઃ પરિ તમાસ્ય્ અક્તૂન્ પ્ર માતૃભ્યો ઽ અધિ કનિક્રદદ્ ગાઃ

સ્થિરો ભવ વીડ્વ્ અઙ્ગ ઽ આશુર્ ભવ વાજ્ય્ અર્વન્ ।
પૃથુર્ ભવ સુષદસ્ ત્વમ્ અગ્નેઃ પુરીષવાહણઃ

શિવો ભવ પ્રજાભ્યો માનુષીભ્યસ્ ત્વમ્ અઙ્ગિરઃ ।
મા દ્યાવાપૃથિવી ઽ અભિ શોચીર્ માન્તરિક્ષં મા વનસ્પતીન્

પ્રૈતુ વાજી કનિક્રદન્ નાનદદ્ રાસભઃ પત્વા ।
ભરન્ન્ અગ્નિં પુરીષ્યં મા પાદ્ય્ આયુષઃ પુરા ।
વૃષાગ્નિં વૃષણં ભરન્ન્ અપાં ગર્ભꣳ સમુદ્રિયમ્ ।
અગ્ન ઽ આયાહિ વીતયે

ઋતꣳ સત્યમ્ ઋતꣳ સત્યમ્ ।
અગ્નિં પુરીષ્યમ્ અઙ્ગિરસ્વદ્ ભરામઃ ।
ઓષધયઃ પ્રતિ મોદધ્વમ્ અગ્નિમ્ એતꣳ શિવમ્ આયન્તમ્ અભ્ય્ અત્ર યુષ્માઃ ।
વ્યસ્યન્ વિશ્વા ઽ અનિરા ઽ અમીવા નિષીદન્ નો ઽ અપ દુર્મતિં જહિ

ઓષધયઃ પ્રતિ ગૃભ્ણીત પુષ્પવતીઃ સુપિપ્પલાઃ ।
અયં વો ગર્ભ ઽ ઋત્વિયઃ પ્રત્નꣳ સધસ્થમ્ આસદત્

વિ પાજસા પૃથુના શોશુચાનો બાધસ્વ દ્વિષો રક્ષસો ઽ અમીવાઃ ।
સુશર્મણો બૃહતઃ શર્મણિ સ્યામ્ અગ્નેર્ અહꣳ સુહવસ્ય પ્રણીતૌ

આપો હિ ષ્ઠા મયોભુવસ્ તા ન ઽ ઊર્જે દધાતન ।
મહે રણાય ચક્ષસે

યો વઃ શિવતમો રસસ્ તસ્ય ભાજયતેહ નઃ ।
ઉશતીર્ ઇવ માતરઃ

તસ્મા ઽ અરં ગમામ વો યસ્ય ક્ષયાય જિન્વથ ।
આપો જનયથા ચ નઃ

મિત્રઃ સꣳસૃજ્ય પૃથિવીં ભૂમિં ચ જ્યોતિષા સહ ।
સુજાતં જાતવેદસમ્ અયક્ષ્માય ત્વા સꣳ સૃજામિ પ્રજાભ્યઃ

રુદ્રાઃ સꣳસૃજ્ય પૃથિવીં બૃહજ્ જ્યોતિઃ સમ્ ઈધિરે ।
તેષાં ભાનુર્ અજસ્ર ઽ ઇચ્ છુક્રો દેવેષુ રોચતે

સꣳસૃષ્ટા વસુભી રુદ્રૈર્ ધીરૈઃ કર્મણ્યાં મૃદમ્ ।
હસ્તાભ્યાં મૃદ્વીં કૃત્વા સિનીવાલી કૃણોતુ તામ્

સિનીવાલી સુકપર્દા સુકુરીરા સ્વૌપશા ।
સા તુભ્યમ્ અદિતે મહ્યોખાં દધાતુ હસ્તયોઃ

ઉખાં કૃણોતુ શક્ત્યા બાહુભ્યામ્ અદિતિર્ ધિયા ।
માતા પુત્રં યથોપસ્થે સાગ્નિં બિભર્તુ ગર્ભ ઽ આ ।
મખસ્ય શિરોઽસિ

વસવસ્ ત્વા કૃણ્વન્તુ ગાયત્રેણ છન્દસાઽઙ્ગિરસ્વદ્ ધ્રુવાસિ પૃથિવ્યસિ ।
ધારયા મયિ પ્રજા રાયસ્પોષં ગૌપત્યꣳ સુવીર્યꣳ સજાતાન્ યજમાનાય ।
રુદ્રાસ્ ત્વા કૃણ્વન્તુ ત્રૈષ્ટુભેન છન્દસાઽઙ્ગિરસ્વદ્ ધ્રુવાસ્ય્ અન્તરિક્ષમ્ અસિ ।
ધારયા મયિ પ્રજાꣳ રાયસ્પોષં ગૌપત્યꣳ સુવીર્યꣳ સજાતાન્ યજમાનાય ।
આદિત્યાસ્ ત્વા કૃણ્વન્તુ જાગતેન છન્દસાઽઙ્ગિરસ્વદ્ ધ્રુવાસિ દ્યૌર્ અસિ ।
ધારયા મયિ પ્રજા રાયસ્પોષં ગૌપત્યꣳ સુવીર્યꣳ સજાતાન્ યજમાનાય ।
વિશ્વે ત્વા દેવા વૈશ્વાનરાઃ કૃણ્વન્ત્વ્ આનુષ્ટુભેન છન્દસાઙ્ગિરસ્વદ્ ધ્રુવાસિ દિશોઽસિ ।
ધારયા મયિ પ્રજા રાયસ્પોષં ગૌપત્યꣳ સુવીર્યꣳ સજાતાન્ યજમાનાય

અદિત્યૈ રામ્નાસિ ।
અદિતિષ્ ટે બિલં ગૃભ્ણાતુ ।
કૃત્વાય સા મહીમ્ ઉખાં મૃન્મયીં યોનિમ્ અગ્નયે ।
પુત્રેભ્યઃ પ્રાયચ્છદ્ અદિતિઃ શ્રપયાન્ ઇતિ

વસવસ્ ત્વા ધૂપયન્તુ ગાયત્રેણ છન્દસાઙ્ગિરસ્વત્ ।
રુદ્રાસ્ ત્વા ધૂપયન્તુ ત્રૈષ્ટુભેન છન્દસાઙ્ગિરસ્વત્ ।
આદિત્યાસ્ ત્વા ધૂપયન્તુ જાગતેન છન્દસાઙ્ગિરસ્વત્ ।
વિશ્વે ત્વા દેવા વૈશ્વાનરા ધૂપયન્ત્વ્ આનુષ્ટુભેન છન્દસાઙ્ગિરસ્વત્ ।
ઇન્દ્રસ્ ત્વા ધૂપયતુ ।
વરુણસ્ ત્વા ધૂપયતુ ।
વિષ્ણુ ત્વા ધૂપયતુ

અદિતિષ્ ટ્વા દેવી વિશ્વદેવ્યાવતી પૃથિવ્યાઃ સધસ્થે ઽ અઙ્ગિરસ્વત્ ખનત્વ્ અવટ ।
દેવાનામ્ ત્વા પત્નીર્ દેવીર્ વિશ્વદેવ્યાવતીઃ પૃથિવ્યાઃ સધસ્થે ઽ અઙ્ગિરસ્વદ્ દધતૂખે ।
ધિષણાસ્ ત્વા દેવીર્ વિશ્વદેવ્યાવતીઃ પૃથિવ્યાઃ સધસ્થે ઽ અઙ્ગિરસ્વદ્ અભીન્ધતામ્ ઉખે ।
વરૂત્રીષ્ ટ્વા દેવીર્ વિશ્વદેવ્યાવતીઃ પૃથિવ્યાઃ સધસ્થે ઽ અઙ્ગિરસ્વચ્ છ્રપયન્તૂખે ।
ગ્નાસ્ ત્વા દેવીર્ વિશ્વદેવ્યાવતીઃ પૃથિવ્યાઃ સધસ્થે ઽ અઙ્ગિરસ્વત્ પચન્તૂખે ।
જનયસ્ ત્વાચ્છિન્નપત્રા દેવીર્ વિશ્વદેવ્યાવતીઃ પૃથિવ્યાઃ સધસ્થે ઽ અઙ્ગિરસ્વત્ પચન્તૂખે

મિત્રસ્ય ચર્ષણીધૃતોઽવો દેવસ્ય સાનસિ ।
દ્યુમ્નં ચિત્રશ્રવસ્તમમ્

દેવસ્ ત્વા સવિતોદ્વપતુ સુપાણિઃ સ્વઙ્ગુરિઃ સુબાહુર્ ઉત શક્ત્યા ।
અવ્યથમાના પૃથિવ્યામ્ આશા દિશ ઽ આ પૃણ

ઉત્થાય બૃહતી ભવોદ્ ઉ તિષ્ઠ ધ્રુવા ત્વમ્ ।
મિત્રૈતાં તઽઉખાં પરિ દદામ્ય્ અભિત્ત્યા ઽએષા મા ભેદિ

વસવસ્ ત્વા છૃન્દન્તુ ગાયત્રેણ છન્દસાઙ્ગિરસ્વત્ ।
રુદ્રાસ્ ત્વા છૃન્દન્તુ ત્રૈષ્ટુભેન છન્દસાઙ્ગિરસ્વત્ ।
આદિત્યાસ્ ત્વા છૃન્દન્તુ જાગતેન છન્દસાઙ્ગિરસ્વત્ ।
વિશ્વે ત્વા દેવા વૈશ્વાનરા ઽ આ છૃન્દન્ત્વ્ આનુષ્ટુભેન છન્દસાઙ્ગિરસ્વત્

આકૂતિમ્ અગ્નિં પ્રયુજꣳ સ્વાહા ।
મનો મેધામ્ અગ્નિં પ્રયુજꣳ સ્વાહા ।
ચિત્તં વિજ્ઞાતમ્ અગ્નિં પ્રયુજꣳ સ્વાહા ।
વાચો વિધૃતિમ્ અગ્નિં પ્રયુજꣳ સ્વાહા ।
પ્રજાપતયે મનવે સ્વાહા ।
ઽ અગ્નયે વૈશ્વાનરાય સ્વાહા

વિશ્વો દેવસ્ય નેતુર્ મર્તો વુરીત સખ્યમ્ ।
વિશ્વો રાય ઽ ઇષુધ્યતિ દ્યુમ્નં વૃણીત પુષ્યસે સ્વાહા

મા સુ ભિત્થા મા સુ રિષો ઽમ્બ ધૃષ્ણુ વીરયસ્વ સુ ।
અગ્નિશ્ ચેદં કરિષ્યથઃ

દૃꣳહસ્વ દેવિ પૃથિવિ સ્વસ્તય ઽ આસુરી માયા સ્વધયા કૃતાસિ ।
જુષ્ટં દેવેભ્ય ઽ ઇદમ્ અસ્તુ હવ્યમ્ અરિષ્ટા ત્વમ્ ઉદ્ ઇહિ યજ્ઞે ઽ અસ્મિન્

દ્ર્વન્ન સર્પિરાસુતિઃ પ્રત્નો હોતા વરેણ્યઃ ।
સહસસ્ પુત્રો ઽ અદ્ભુતઃ

પરસ્યા ઽ અધિ સંવતો વરાꣳ ઽ અભ્ય્ આતર ।
યત્રાહમ્ અસ્મિ તાꣳ ઽ અવ

પરમસ્યાઃ પરાવતો રોહિદ્ અશ્વ ઽ ઇહા ગહિ ।
પુરીષ્યઃ પુરુપ્રિયોઽગ્ને ત્વં તરા મૃધઃ

યદ્ અગ્ને કાનિ કાનિ ચિદ્ આ તે દારૂણિ દધ્મસિ ।
સર્વં તદ્ અસ્તુ તે ઘૃતં તજ્ જુષસ્વ યવિષ્ઠ્ય

યદ્ અત્ત્ય્ ઉપજિહ્વિકા યદ્ વમ્રો ઽ અતિસર્પતિ ।
સર્વં તદ્ અસ્તુ તે ઘૃતં તજ્ જુષસ્વ યવિષ્ઠ્ય

અહર્-અહર્ અપ્રયાવં ભરન્તોઽશ્વાયેવ તિષ્ઠતે ઘાસમ્ અસ્મૈ ।
રાયસ્પોષેણ સમ્ ઇષા મદન્તો ઽગ્ને મા તે પ્રતિવેશા રિષામ

નાભા પૃથિવ્યાઃ સમિધાને ઽ અગ્નૌ રાયસ્પોષાય બૃહતે હવામહે ।
ઇરંમદં બૃહદુક્થ્યં યજત્રં જેતારમ્ અગ્નિં પૃતનાસુ સાસહિમ્

યાઃ સેના ઽ અભીત્વરીર્ આવ્યાધિનીર્ ઉગણા ઽ ઉત ।
યે સ્તેના યે ચ તસ્કરાસ્ તાꣳસ્ તે ઽ અગ્ને ઽપિ દધામ્ય્ આસ્યે

દꣳષ્ટ્રાભ્યાં મલિમ્લૂન્ જમ્ભ્યૈસ્ તસ્કરાꣳ ઽઉત ।
હનુભ્યાꣳ સ્તેનાન્ ભગવસ્ તાꣳસ્ ત્વં ખાદ સુખાદિતાન્

યે જનેષુ મલિમ્લવ સ્તેનાસસ્ તસ્કરા વને ।
યે કક્ષેષ્વ્ અઘાયવસ્ તાꣳસ્ તે દધામિ જમ્ભયોઃ

યો ઽ અસ્મભ્યમ્ અરાતીયાદ્ યશ્ ચ નો દ્વેષતે જનઃ ।
નિન્દાદ્ યો ઽ અસ્માન્ ધિપ્સાચ્ ચ સર્વં તં ભસ્મસા કુરુ

સꣳશિતં મે બ્રહ્મ સꣳશિતં વીર્યં બલમ્ ।
સꣳશિતં ક્ષત્રં જિષ્ણુ યસ્યાહમ્ અસ્મિ પુરોહિતઃ

ઉદ્ એષાં બાહૂ ઽ અતિરમ્ ઉદ્ વર્ચો ઽ અથો બલમ્ ।
ક્ષિણોમિ બ્રહ્મણામિત્રાન્ ઉન્ નયામિ સ્વાꣳ અહમ્

અન્નપતે ઽન્નસ્ય નો દેહ્ય્ અનમીવસ્ય શુષ્મિણઃ ।
પ્ર-પ્ર દાતારં તારિષ ઽઊર્જં નો ધેહિ દ્વિપદે ચતુષ્પદે ॥