શિવ પુરાણ · અધ્યાય 2.3.10

નારદ ઉવાચ ॥
વિષ્ણુશિષ્ય મહાભાગ વિધે શૈવવર પ્રભો ॥
શિવલીલામિમાં વ્યાસાત્પ્રીત્યા મે વક્તુમર્હસિ

સતીવિરહયુક્શંમ્ભુઃ કિં ચક્રે ચરિતન્તથા ॥
તપઃ કર્તું કદાયાતો હિમવત્પ્રસ્થમુત્તમમ્

શિવાશિવશિવાદો ઽભૂત્કથં કામક્ષયશ્ચ મે ॥
તપઃ કૃત્વા કથમ્પ્રાપ શિવં શમ્ભું ચ પાર્વતી

તત્સર્વમપરં ચાપિ શિવસચ્ચરિતં પરમ્ ॥
વક્તુમર્હસિ મે બ્રહ્મન્મહાનન્દકરં શુભમ્

સૂત ઉવાચ ॥
ઇતિ શ્રુત્વા નારદસ્ય પ્રશ્નં લોકાધિપોત્તમઃ ॥
વિધિઃ પ્રોવાચ સુપ્રીત્યા સ્મૃત્વા શિવપદામ્બુજમ્

બ્રહ્મોવાચ ॥ દેવર્ષે શૈવવર્યાય તદ્યશઃ શૃણુ ચાદરાત્ ॥
પાવનં મઙ્ગલકરં ભક્તિવર્ધનમુત્તમમ્

આગત્ય સ્વગિરિં શમ્ભુઃ પ્રિયાવિરહકાતરઃ ॥
સસ્માર સ્વપ્રિયાં દેવીં સતીં પ્રાણાધિકાં હૃદા

ગણાનાભાષ્ય શોચંસ્તાં તદ્ગુણાન્પ્રે મવર્ધનાન્ ॥
વર્ણયામાસ સુપ્રીત્યા દર્શયઁલ્લૌકિકીં ગતિમ્

દિગમ્બરો બભૂવાથ ત્યક્ત્વા ગાર્હસ્થ્યસદ્ગતિમ્ ॥
પુનર્બભ્રામ લોકન્વૈ સર્વાઁલ્લીલાવિશારદઃ

દર્શનમ્પ્રાપ્ય કુત્રાપિ સતીવિરહદુઃખિતઃ ॥
પુનશ્ચ ગિરિમાયાતશ્શંકરો ભક્તશંકરઃ

સમાધાય મનો યત્નાત્સમાધિન્દુઃખનાશિનમ ॥
ચકાર ચ દદર્શાસૌ સ્વરૂપં નિજમવ્યયમ્

ઇત્થં ચિરતરં સ્થાણુસ્તસ્થૌ ધ્વસ્તગુણત્રયઃ ॥
નિર્વિકારી પરમ્બ્રહ્મ માયાધીશસ્સ્વયંપ્રભુઃ

તતસ્સમાધિન્તત્ત્યાજ વ્યતીય હ્યમિતાસ્સમાઃ ॥
યદા તદા બભૂવાશુ ચરિતં તદ્વદામિ વઃ

પ્રભોર્લલાટદેશાત્તુ યત્પૃષચ્છ્રમસંભવમ્ ॥
પપાત ધરણૌ તત્ર સ બભૂવ શિશુર્દ્રુતમ્

ચતુર્ભુજોઽરુણાકારો રમણીયાકૃતિર્મુને ॥
અલૌકિકદ્યુતિઃ શ્રીમાઁસ્તેજસ્વી પરદુસ્સહઃ

રુરોદ સ શિશુસ્તસ્ય પુરો હિ પરમેશિતુઃ ॥
પ્રાકૃતાત્મજવત્તત્ર ભવાચારરતસ્ય હિ

તદા વિચાર્ય સુધિયા ધૃત્વા સુસ્ત્રીતનું ક્ષિતિઃ ॥
આવિર્બભૂવ તત્રૈવ ભયમાનીય શંકરાત્

તમ્બાલં દ્રુતમુત્થાય ક્રોડયાં નિદધે વરમ્ ॥
સ્તન્યં સાપાયયત્પ્રીત્યા દુગ્ધં સ્વોપરિસમ્ભવમ્

ચુચુમ્બ તન્મુખં સ્નેહાત્સ્મિત્વા ક્રીડયદાત્મજમ્ ॥
સત્યભાવાત્સ્વયં માતા પરમેશહિતાવહા

તદ્દૃષ્ટ્વા ચરિતં શમ્ભુઃ કૌતુકી સૂતિકૃત્કૃતી ॥
અન્તર્યામી વિહસ્યાથોવાચ જ્ઞાત્વા રસાં હરઃ

ધન્યા ત્વં ધરણિ પ્રીત્યા પાલયૈતં સુતં મમ ॥
ત્વય્યુદ્ભૂતંશ્રમજલાન્મહાતેજસ્વિનો વરમ્

મમ શ્રમકભૂર્બાલો યદ્યપિ પ્રિયકૃત્ક્ષિતે ॥
ત્વન્નામ્ના સ્યાદ્ભવેત્ખ્યાતસ્ત્રિતાપરહિતસ્સદા

અસૌ બાલઃ કુદાતા હિ ભવિષ્યતિ ગુણી તવ ॥
મમાપિ સુખદાતા હિ ગૃહાણૈનં યથારુચિ

બ્રહ્મોવાચ ॥
ઇત્યુક્ત્વા વિરરામાથ કિંચિદ્વિરહમુક્તધીઃ ॥
લોકાચારકરો રુદ્રો નિર્વિકારી સતામ્પ્રિયઃ

અપિ ક્ષિતિર્જગામાશુ શિવાજ્ઞામધિગમ્ય સા ॥
સ્વસ્થાનં સસુતા પ્રાપ સુખમાત્યંતિકં ચ વૈ

સ બાલો ભૌમ ઇત્યાખ્યાં પ્રાપ્ય ભૂત્વા યુવા દ્રુતમ્ ॥
તસ્યાં કાશ્યાં ચિરં કાલં સિષેવે શંકરમ્પ્રભુમ્

વિશ્વેશ્વરપ્રસાદેન ગ્રહત્વં પ્રાપ્ય ભૂમિજઃ ॥
દિવ્યં લોકં જગામાશુ શુક્રલોકાત્પરં વરમ્

ઇત્યુક્તં શમ્ભુચરિતં સતીવિરહસંયુતમ્॥
તપસ્યાચરણં શમ્ભોશ્શૃણુ ચાદરતો મુને

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતીખણ્ડે ભૌમોત્પત્તિશિવલીલાવર્ણનં નામ દશમોઽધ્યાયઃ