શતપથબ્રાહ્મણમ્ · અધ્યાય 4.5.3

૪.૫.૩ ષોડશીગ્રહઃ
ઇન્દ્રો હ વૈ ષોડશી । તં નુ સકૃદિન્દ્રં ભૂતાન્યત્યરિચ્યન્ત પ્રજા વૈ ભૂતાનિ તા હૈનેન સદૃગ્ભવમિવાસુઃ -

ઇન્દ્રો હ વા ઈક્ષાં ચક્રે । કથં ન્વહમિદં સર્વમતિતિષ્ઠેયમર્વાગેવ મદિદં સર્વં સ્યાદિતિ સ એતં ગ્રહમપશ્યત્તમગૃહ્ણીત સ ઇદં સર્વમેવાત્યતિષ્ઠદર્વાગેવાસ્માદિદં સર્વમભવત્સર્વં હ વા ઇદમતિતિષ્ઠત્યર્વાગેવાસ્માદિદં સર્વં ભવતિ યસ્યૈવં વિદુષ એતં ગ્રહં ગૃહ્ણન્તિ -

તસ્માદેતદૃષિણાભ્યાનૂક્તમ્ । ન તે મહિત્વમનુભૂદધ દ્યૌર્યદન્યયા સ્ફિગ્યા ક્ષામવસ્થા ઇતિ ન હ વા અસ્યાસૌ દ્યૌરન્યતરાં ચન સ્ફિચીમનુબભૂવ તથેદં સર્વમેવાત્યતિષ્ઠદર્વાગેવાસ્માદિદં સર્વમભવત્સર્વં હ વા ઇદમતિતિષ્ઠત્યર્વાગેવાસ્માદિદં સર્વં ભવતિ યસ્યૈવં વિદુષ એતં ગ્રહં ગૃહ્ણન્તિ -

તં વૈ હરિવત્યર્ચા ગૃહ્ણાતિ । હરિવતીષુ સ્તુવતે હરિવતીરનુશંસતિ વીર્યં વૈ હર ઇન્દ્રોઽસુરાણાં સપત્નાનાં સમવૃઙ્ક્ત તથો એવૈષ એતદ્વીર્યં હરઃ સપત્નાનાં સંવૃઙ્ક્તે તસ્માદ્ધરિવત્યર્ચા ગૃહ્ણાતિ હરિવતીષુ સ્તુવતે હરિવતીરનુશંસતિ -

તં વા અનુષ્ટુભા ગૃહ્ણાતિ । ગાયત્રં વૈ પ્રાતઃસવનં ત્રૈષ્ટુભં માધ્યન્દિનં સવનં જાગતં તૃતીયસવનમથાતિરિક્તાનુષ્ટુબત્યેવૈનમેતદ્રેચયતિ તસ્માદનુષ્ટુભા ગૃહ્ણાતિ -

તં વૈ ચતુઃસ્રક્તિના પાત્રેણ ગૃહ્ણાતિ । ત્રયો વા ઇમે લોકાસ્તદિમાનેવ લોકાંસ્તિસૃભિઃ સ્રક્તિભિરાપ્નોત્યત્યેવૈનં ચતુર્થ્યા સ્રક્ત્યા રેચયતિ તસ્માચ્ચતુઃસ્રક્તિના પાત્રેણ ગૃહ્ણાતિ -

તં વૈ પ્રાતઃસવને ગૃહ્ણીયાત્ । આગ્રયણં ગૃહીત્વા સ પ્રાતઃસવને ગૃહીત એતસ્માત્કાલાદુપશેતે તદેનં સર્વાણિ સવનાન્યતિરેચયતિ -

માધ્યન્દિને વૈનં સવને ગૃહ્ણીયાત્ । આગ્રયણં ગૃહીત્વા સો એષા મીમાંસૈવ પ્રાતઃસવન એવૈનં ગૃહ્ણીયાદાગ્રયણં ગૃહીત્વા સ પ્રાતઃસવને ગૃહીત ઐતસ્માત્કાલાદુપશેતે -

અથાતો ગૃહ્ણાત્યેવ । આતિષ્ઠ વૃત્રહન્રથં યુક્તા તે બ્રહ્મણા હરી અર્વાચીનં સુ તે મનો ગ્રાવા કૃણોતુ વગ્નુના ઉપયામગૃહીતોઽસીન્દ્રાય ત્વા ષોડશિન એષ તે યોનિરિન્દ્રાય ત્વા ષોડશિન ઇતિ -

અનયા વા । યુક્ષ્વા હિ કેશિના હરી વૃષણા કક્ષ્યપ્રા અથા ન ઇન્દ્ર સોમપા ગિરામુપશ્રુતિં ચર ઉપયામગૃહીતોઽસીન્દ્રાય ત્વા ષોડશિન એષ તે યોનિરિન્દ્રાય ત્વા ષોડશિન ઇતિ -

અથેત્ય સ્તોત્રમુપાકરોતિ । સોમોઽત્યરેચ્યુપાવર્તધ્વમિત્યત્યેવૈનમેતદ્રેચયતિ તં વૈ પુરાસ્તમયાદુપાકરોત્યસ્તમિતેઽનુશંસતિ તદેનેનાહોરાત્રે સંદધાતિ તસ્માત્પુરાસ્તમયાદુપાકરોત્યસ્તમિતેઽનુશંસતિ -