શતપથબ્રાહ્મણમ્ · અધ્યાય 13.5.3

૧૩.૫.૩ વપાપ્રચરણમ્
ઐન્દ્રાગ્નસ્ય વપાયાં હુતાયામ્ તદન્વિતરા જુહુયુરિતિ હ સ્માહતુઃ સૌમાપૌ માનુતન્તવ્યાવિન્દ્રાગ્ની વૈ સર્વે દેવાસ્તદેવૈનાન્યથાદેવતં પ્રીણાતીતિ -

કાયસ્ય વપાયાં હુતાયામ્ તદન્વિતરા જુહુયુરિતિ હ સ્માહ શૈલાલિઃ પ્રજાપતિર્વૈ કઃ પ્રજાપતિમુ વા અનુ સર્વે દેવાસ્તદેવૈનાન્યથાદેવતં પ્રીણાતીતિ -

એકવિંશતિં ચાતુર્માસ્યદેવતા અનુદ્રુત્ય એકવિંશતિધા કૃત્વા પ્રચરેયુરિતિ હ સ્માહ ભાલ્લવેયઃ એતાવન્તો વૈ સર્વે દેવા યાવત્યશ્ચાતુર્માસ્યદેવતાસ્તદેવૈનાન્યથાદેવતમ્પ્રીણાતીતિ -

નાનૈવ ચરેયુઃ ઇતીન્દ્રોતઃ શૌનકઃ કિમુત ત્વરેરંસ્તદેવૈનાન્યથાદેવતમ્પ્રીણાતીત્યેતદહ તેષાં વચોઽન્યા ત્વેવાત સ્થિતિઃ -

અથ હોવાચ યાજ્ઞવલ્ક્યઃ સકૃદેવ પ્રાજાપત્યાભિઃ પ્રચરેયુઃ સકૃદ્દેવદેવત્યાભિસ્તદેવૈનાન્યથાદેવતં પ્રીણાત્યઞ્જસા યજ્ઞસ્ય સંસ્થામુપૈતિ ન હ્વલતીતિ -

હુતાસુ વપાસુ પ્રપદ્યાધ્વર્યૂ રજતેન પાત્રેણ પ્રાજાપત્યં મહિમાનમુત્તરં ગ્રહં ગૃહ્ણાતિ તસ્ય પુરોરુગ્યઃ પ્રાણતો નિમિષતો મહિત્વેતિ વિપર્યસ્તે યાજ્યાનુવાક્યેઽઅયાતયામતાયા એષ એવ પ્રૈષો વષટ્કૃતે જુહોતિ યસ્તે રાત્રૌ સમ્વત્સરે મહિમા સમ્બભૂવેતિ નાનુવષટ્કરોતિ તસ્યોક્તં બ્રાહ્મણમ્ -

નાન્યેષાં પશૂનાં તેદન્યા અવદ્યન્તિ અવદ્યન્ત્યશ્વસ્ય દક્ષિણતોઽન્યેષામ્પશૂનામવદ્યન્ત્યુત્તરતોઽશ્વસ્ય પ્લક્ષશાખાસ્વન્યેષાં પશૂનામવદ્યન્તિ વેતસશાખાસ્વશ્વસ્ય -

તદુ હોવાચ સાત્યયજ્ઞિઃ ઇતરથૈવ કુર્યુઃ પથ એવ નાપોદિત્યમિતિ પૂર્વા ત્વેવ સ્થિતિરુક્થ્યો યજ્ઞસ્તેનાન્તરિક્ષલોકમૃધ્નોતિ સર્વસ્તોમોઽતિરાત્રઽઉત્તમમહર્ભવતિ સર્વં વૈ સર્વસ્તોમોઽતિરાત્રઃ સર્વમશ્વમેધઃ સર્વસ્યાપ્તૈ સર્વસ્યાવરુદ્ધ્યૈ -

તસ્ય ત્રિવૃદ્બહિષ્પવમાનમ્ પઞ્ચદશાન્યાજ્યાનિ સપ્તદશો માધ્યન્દિનઃ પવમાનઽએકવિંશાનિ પૃષ્ઠાનિ ત્રિણવસ્તૃતીયઃ પવમાનસ્ત્રયસ્ત્રિંશમગ્નિષ્ટોમસામૈકવિંશાન્યુક્થાન્યેકવિંશઃ ષોડશી પઞ્ચદશી રાત્રિસ્ત્રિવૃત્સન્ધિર્યદ્દ્વિતીયસ્યાહ્નઃ પૃષ્ઠ્યસ્ય ષડહસ્ય તચ્છસ્ત્રમતિરાત્રો યજ્ઞસ્તેનામું લોકમૃધ્નોતિ -

એકવિંશતિઃ સવનીયાઃ પશવઃ સર્વ આગ્નેયાસ્તેષાં સમાનં કર્મેત્યુ હૈકઽઆહુશ્ચતુર્વિંશતિં ત્વેવૈતાન્ગવ્યાનાલભેત્ દ્વાદશભ્યો દેવતાભ્યો દ્વાદશ માસાઃ સમ્વત્સરઃ સર્વં સમ્વત્સરઃ સર્વમશ્વમેધઃ સર્વસ્યાપ્તૈ સર્વસ્યાવરુદ્ધ્યૈ -