શતપથબ્રાહ્મણમ્ · અધ્યાય 13.3.2

પરમેણ વા એષ સ્તોમેન જિત્વા ચતુષ્ટોમેન કૃતેનાયાનામુત્તરેઽહન્નેકવિંશે પ્રતિષ્ઠાયાં પ્રતિતિષ્ઠત્યેકવિંશાત્પ્રતિષ્ઠાયા ઉત્તરમહરૃતૂનન્વારોહત્યૃતવો વૈ પૃષ્ઠાન્યૃતવઃ સંવત્સર ઋતુષ્વેવ સંવત્સરે પ્રતિતિષ્ઠતિ -

શક્વર્યઃ પૃષ્ઠં ભવન્તિ અન્યદન્યચ્છન્દોઽન્યેઽન્યે વા અત્ર પશવ આલભ્યન્ત ઉતેવ ગ્રામ્યા ઉતેવારણ્યા યચ્છક્વર્યઃ પૃષ્ઠં ભવન્ત્યશ્વસ્યૈવ સર્વત્વાયાન્યે પશવ આલભ્યન્તેઽન્યેઽન્યે હિ સ્તોમાઃ ક્રિયન્તે -

તદાહુઃ નૈતે સર્વે પશવો યદજાવયશ્ચારણ્યાશ્ચૈતે વૈ સર્વે પશવો યદ્ગવ્યા ઇતિ ગવ્યા ઉત્તમેઽહન્નાલભત એતે વૈ સર્વે પશવો યદ્ગવ્યાઃ સર્વાનેવ પશૂનાલભતે વૈશ્વદેવા ભવન્તિ વૈશ્વદેવો વા અશ્વોઽશ્વસ્યૈવ સર્વત્વાય બહુરૂપા ભવન્તિ તસ્માદ્બહુરૂપાઃ પશવો નાનારૂપા ભવન્તિ તસ્માન્નાનારૂપાઃ પશવઃ -