શતપથબ્રાહ્મણમ્ · અધ્યાય 13.2.8

દેવા વા ઉદઞ્ચઃ સ્વર્ગં લોકં ન પ્રાજાનંસ્તમશ્વઃ પ્રાજાનાદ્યદશ્વેનોદઞ્ચો યન્તિ સ્વર્ગસ્ય લોકસ્ય પ્રજ્ઞાત્યૈ વાસોઽધિવાસં હિરણ્યમિત્યશ્વાયોપસ્તૃણન્તિ યથા નાન્યસ્મૈ પશવે તસ્મિન્નેનમધિ સંજ્ઞપયન્ત્યન્યૈરેવૈનં તત્પશુભિર્વ્યાકુર્વન્તિ -

ઘ્નન્તિ વા એતત્પશુમ્ યદેનં સંજ્ઞપયન્તિ પ્રાણાય સ્વાહાપાનાય સ્વાહા વ્યાનાય સ્વાહેતિ સંજ્ઞપ્યમાન આહુતીર્જુહોતિ પ્રાણાનેવાસ્મિન્નેતદ્દધાતિ તથો હાસ્યૈતેન જીવતૈવ પશુનેષ્ટં ભવતિ -

અમ્બે અમ્બિકેઽમ્બાલિકે ન મા નયતિ કશ્ચનેતિ પત્નીરુદાનયત્યહ્વતૈવૈના એતદથો મેધ્યા એવૈનાઃ કરોતિ -

ગણાનાં ત્વા ગણપતિં હવામહ ઇતિ પત્ન્યઃ પરિયન્ત્યપહ્નુવત એવાસ્મા એતદતો ન્યેવાસ્મૈ હ્નુવતેઽથો ધુવત એવૈનં ત્રિઃ પરિયન્તિ ત્રયો વા ઇમે લોકા એભિરેવૈનં લોકૈર્ધુવતે ત્રિઃ પુનઃ પરિયન્તિ ષટ્સમ્પદ્યન્તે ષડ્વા ઋતવ ઋતુભિરેવૈનં ધુવતે -

અપ વા એતેભ્યઃ પ્રાણાઃ ક્રામન્તિ યે યજ્ઞે ધુવનં તન્વતે નવ કૃત્વઃ પરિયન્તિ નવ વૈ પ્રાણાઃ પ્રાણાનેવાત્મન્દધતે નૈભ્યઃ પ્રાણા અપક્રામન્ત્યાહમજાનિ ગર્ભધમા ત્વમજાસિ ગર્ભધમિતિ પ્રજા વૈ પશવો ગર્ભઃ પ્રજામેવ પશૂનાત્મન્ધત્તે તા ઉભૌ ચતુરઃ પદઃ સમ્પ્રસારયાવેતિ મિથુનસ્યાવરુદ્ધ્યૈ સ્વર્ગે લોકે પ્રોર્ણુવાથામિત્યેષ વૈ સ્વર્ગો લોકો યત્ર પશું સંજ્ઞપયન્તિ તસ્માદેવમાહ વૃષા વાજી રેતોધા રેતો દધાત્વિતિ મિથુનસ્યૈવાવરુદ્ધ્યૈ -