શતપથબ્રાહ્મણમ્ · અધ્યાય 13.2.4

પ્રજાપતિરકામયત ઉભૌ લોકાવભિજયેયં દેવલોકં ચ મનુષ્યલોકં ચેતિ સ એતાન્પશૂનપશ્યદ્ગ્રામ્યાંશ્ચારણ્યાંશ્ચ તાનાલભત તૈરિમૌ લોકાવવારુન્દ્ધ ગ્રામ્યૈરેવ પશુભિરિમં લોકમવારુન્દ્ધારણ્યૈરમુમયં વૈ લોકો મનુષ્યલોકોઽથાસૌ દેવલોકો યદ્ગ્રામ્યાન્પશૂનાલભત ઇમમેવ તૈર્લોકં યજમાનોઽવરુન્દ્ધે યદારણ્યાનમું તૈઃ -

સ યદ્ગ્રામ્યૈઃ સંસ્થાપયેત્ સમધ્વાનઃ ક્રામેયુઃ સમન્તિકં ગ્રામયોર્ગ્રામાન્તૌ સ્યાતાં નર્ક્ષીકાઃ પુરુષવ્યાઘ્રાઃ પરિમોષિણ આવ્યાધિન્યસ્તસ્કરા અરણ્યેષ્વાજાયેરન્યદારણ્યૈર્વ્યધ્વાનઃ ક્રામેયુર્વિદૂરં ગ્રામયોર્ગ્રામાન્તૌ સ્યાતામૃક્ષીકાઃ પુરુષવ્યાઘ્રાઃ પરિમોષિણ આવ્યાધિન્યસ્તસ્કરા અરણ્યેષ્વાજાયેરન્ -

તદાહુઃ અપશુર્વા એષ યદારણ્યો નૈતસ્ય હોતવ્યં યજ્જુહુયાત્ક્ષિપ્રં યજમાનમરણ્યં મૃતં હરેયુરરણ્યભાગા હ્યારણ્યાઃ પશવો યન્ન જુહુયાદ્યજ્ઞવેશસં સ્યાદિતિ પર્યગ્નિકૃતાનેવોત્સૃજન્તિ તન્નૈવ હુતં નાહુતં ન યજમાનમરણ્યં મૃતં હરન્તિ ન યજ્ઞવેશસં ભવતિ -

ગ્રામ્યૈઃ સંસ્થાપયતિ વિ પિતાપુત્રાવવસ્યતઃ સમધ્વાનઃ ક્રામન્તિ સમન્તિકં ગ્રામયોર્ગ્રામાન્તૌ ભવતો નર્ક્ષીકાઃ પુરુષવ્યાઘ્રાઃ પરિમોષિણ આવ્યાધિન્યસ્તસ્કરા અરણ્યેષ્વાજાયન્તે -