શતપથબ્રાહ્મણમ્ · અધ્યાય 13.1.3

યથા વૈ હવિષોઽહુતસ્ય સ્કન્દેત્ એવમેતત્પશોઃ સ્કન્દતિ યં નિક્તમનાલબ્ધમુત્સૃજન્તિ યત્સ્તોકીયા જુહોતિ સર્વહુતમેવૈનં જુહોત્યસ્કન્દાયાસ્કન્નં હિ તદ્યદ્ધુતસ્ય સ્કન્દતિ સહસ્રં જુહોતિ સહસ્રસમ્મિતો વૈ સ્વર્ગો લોકઃ સ્વર્ગસ્ય લોકસ્યાભિજિત્યૈ -

તદાહુઃ યન્મિતા જુહુયાત્પરિમિતમવરુન્ધીતેત્યમિતા જુહોત્યપરિમિતસ્યૈવાવરુદ્ધ્યા ઉવાચ હ પ્રજાપતિ સ્તોકીયાસુ વા અહમશ્વમેધં સંસ્થાપયામિ તેન સંસ્થિતેનૈવાત ઊર્ધ્વં ચરામીતિ -

અગ્નયે સ્વાહેતિ અગ્નય એવૈનં જુહોતિ સોમાય સ્વાહેતિ સોમાયૈવૈનં જુહોત્યપામ્મોદાય સ્વાહેત્યદ્ભ્ય એવૈનં જુહોતિ સવિત્રે સ્વાહેતિ સવિત્ર એવૈનં જુહોતિ વાયવે સ્વાહેતિ વાયવ એવૈનં જુહોતિ વિષ્ણવે સ્વાહેતિ વિષ્ણવ એવૈનં જુહોતીન્દ્રાય સ્વાહેતીન્દ્રાયૈવૈનં જુહોતિ બૃહસ્પતયે સ્વાહેતિ બૃહસ્પતય એવૈનં જુહોતિ મિત્રાય સ્વાહેતિ મિત્રાયૈવૈનં જુહોતિ વરુણાય સ્વાહેતિ વરુણાયૈવૈનં જુહોત્યેતાવન્તો વૈ સર્વે દેવાસ્તેભ્ય એવૈનં જુહોતિ પરાચીર્જુહોતિ પરાઙિવ વૈ સ્વર્ગો લોકઃ સ્વર્ગસ્ય લોકસ્યાભિજિત્યૈ -

ઈશ્વરો વા એષઃ પરાઙ્પ્રદઘોર્યઃ પરાચીરાહુતીર્જુહોતિ પુનરાવર્તતેઽસ્મિન્નેવ લોકે પ્રતિતિષ્ઠત્યેતાં હ વાવ સ યજ્ઞસ્ય સંસ્થિતિમુવાચાસ્કન્દાયાસ્કન્નં હિ તદ્યદ્ધુતસ્ય સ્કન્દતિ -

યથા વૈ હવિષોઽહુતસ્ય સ્કન્દેત્ એવમેતત્પશો સ્કન્દતિ યમ્પ્રોક્ષિતમનાલબ્ધમુત્સૃજન્તિ યદ્રૂપાણિ જુહોતિ સર્વહુતમેવૈનં જુહોત્યસ્કન્દાયાસ્કન્નં હિ તદ્યદ્ધુતસ્ય સ્કન્દતિ હિઙ્કારાય સ્વાહા હિઙ્કૃતાય સ્વાહેત્યેતાનિ વા અશ્વસ્ય રૂપાણિ તાન્યેવાવરુન્દ્ધે -

તદાહુઃ અનાહુતિર્વૈ રૂપાણિ નૈતા હોતવ્યા ઇત્યથો ખલ્વાહુરત્ર વા અશ્વમેધઃ સંતિષ્ઠતે યદ્રૂપાણિ જુહોતિ હોતવ્યા એવેતિ બહિર્ધા વા એતમાયતનાત્કરોતિ ભ્રાતૃવ્યમસ્મૈ જનયતિ યસ્યાનાયતનેઽન્યત્રાગ્નેરાહુતીર્જુહોતિ -

સાવિત્ર્યા એવેષ્ટેઃ પુરસ્તાદનુદ્રુત્ય સકૃદેવ રૂપાણ્યાહવનીયે જુહોત્યાયતન એવાહુતીર્જુહોતિ નાસ્મૈ ભ્રાતૃવ્યં જનયતિ યજ્ઞમુખે યજ્ઞમુખે જુહોતિ યજ્ઞસ્ય સંતત્યા અવ્યવચ્છેદાય -

તદાહુઃ યદ્યજ્ઞમુખે યજ્ઞમુખે જુહુયાત્પશુભિર્વ્યૃધ્યેત પાપીયાન્ત્સ્યાત્સકૃદેવ હોતવ્યા ન પશુભિર્વ્યૃધ્યતે ન પાપીયાન્ભવત્યષ્ટાચત્વારિંશતં જુહોત્યષ્ટાચત્વારિંશદક્ષરા જગતી જાગતાઃ પશવો જગત્યૈવાસ્મૈ પશૂનવરુન્દ્ધ એકમતિરિક્તં જુહોતિ તસ્માદેકઃ પ્રજાસ્વર્ધુકઃ -