શતપથબ્રાહ્મણમ્ · અધ્યાય 12.3.3

૧૨.૩.૩ પ્રાયશ્ચિત્તસત્રમ્।
દેવા હ વૈ સહસ્રસંવત્સરાય દિદીક્ષિરે। તેષાં પંચ શતાનિ સંવત્સરાણાં પર્યવેતાન્યાસુઃ। અથેદં સર્વમેવ શશ્રામ। યે સ્તોમા યાનિ પૃષ્ઠાનિ યાનિ ચ્છંદાંસિ

તતો દેવા એતદ્યજ્ઞસ્યાયાતયામાપશ્યન્। તેનાયાતયામ્ના યા વેદે વ્યષ્ટિરાસીત્ – તાં વ્યાશ્નુવત। અયાતયામા વા અસ્ય વેદાઃ। અયાતયામ્ન્યા હાસ્ય ત્રય્યા વિદ્યયા આર્ત્વિજ્યં કૃતં ભવતિ। ય એવમેતદ્વેદ

તદેતદ્યજ્ઞસ્યાયાતયામ। ઓશ્રાવયાસ્તુ શ્રૌષડ્યજ યેયજામહે વૌષડિતિ। તાસાં વા એતાસાં પંચાનાં વ્યાહૃતીનાં સપ્તદશાક્ષરાણિ। ઓશ્રાવયેતિ ચતુરક્ષરમ્। અસ્તુ શ્રૌષડિતિ ચતુરક્ષરમ્। યજેતિ દ્વયક્ષરમ્। યેયજામહ ઇતિ પંચાક્ષરમ્

દ્વ્યક્ષરો વષટ્કારઃ। સ એષ સપ્તદશઃ પ્રજાપતિઃ અધિદેવતં ચાધ્યાત્મં ચ પ્રતિષ્ઠિતઃ। સ યો હૈવમેતં સપ્તદશં પ્રજાપતિમધિદેવતં ચાધ્યાત્મં ચ પ્રતિષ્ઠિતં વેદ। પ્રતિતિષ્ઠતિ પ્રજયા પશુભિરસ્મિન્ લોકે। અમૃતત્વેનામુષ્મિન્

તે હ દેવા ઊચુઃ। ઉપ તં યજ્ઞક્રતું જાનીત। યઃ સહસ્રસંવત્સરસ્ય પ્રતિમા। કો હિ તસ્મૈ મનુષ્યો યઃ સહસ્રસંવત્સરેણ સમાપ્નુયાદિતિ

તે વિશ્વજિતમેવ સર્વપૃષ્ઠં પૃષ્ઠ્યસ્ય ષડહસ્યાંજઃસવમપશ્યન્। તે હિ સ્તોમા ભવન્તિ। તાનિ પૃષ્ઠાનિ। તાનિ ચ્છન્દાંસિ

પૃષ્ઠ્યમેવ ષડહં દ્વાદશાહસ્યાંજઃસવમપશ્યન્। તે હિ સ્તોમા ભવન્તિ। તાનિ પૃષ્ઠાનિ। તાનિ ચ્છન્દાંસિ

દ્વાદશાહમેવ સંવત્સરસ્યાંજઃસવમપશ્યન્। તે હિ સ્તોમા ભવન્તિ. તાનિ પૃષ્ઠાનિ। તાનિ ચ્છંદાંસિ

સંવત્સરમેવ તાપશ્ચિતસ્યાંજઃસવમપશ્યન્। તે હિ સ્તોમા ભવન્તિ। તાનિ પૃષ્ઠાનિ। તાનિ ચ્છંદાંસિ

તાપશ્ચિતમેવ સહસ્રસંવત્સરસ્યાંજઃસવમપશ્યન્। તે હિ સ્તોમા ભવન્તિ। તાનિ પૃષ્ઠાનિ। તાનિ ચ્છંદાંસિ

સ વૈ સંવત્સરં દીક્ષાભિરેતિ। સંવત્સરમુપસદ્ભિઃ। સંવત્સરં સુત્યાભિઃ

સ યત્સંવત્સરં દીક્ષાભિરેતિ। પૂર્વાર્દ્ધમેવ તેન સહસ્રસંવત્સરસ્યાવરુન્દ્ધે। અથ યત્સંવત્સરમુપસદ્ભિઃ મધ્યમેવ તેન સહસ્રસંવત્સરસ્યાવરુન્ધે। અથ યત્સંવત્સરં સુત્યાભિઃ। ઉત્તરાર્દ્ધમેવ તેન સહસ્રસંવત્સરસ્યાવરુન્ધે

સ વૈ દ્વાદશ માસાન્દીક્ષાભિરેતિ દ્વાદશોપસદ્ભિઃ। દ્વાદશ સુત્યાભિઃ। તત્ષટ્ત્રિંશત્। ષટ્ત્રિંશદક્ષરા વૈ બૃહતી। બૃહત્યા વૈ દેવાઃ સ્વર્ગે લોકે ઽયતંત। બૃહત્યા સ્વર્ગં લોકમાપ્નુવન્। તથો એવૈષ એતદ્બૃહત્યૈવ સ્વર્ગે લોકે યતતે। બૃહત્યા સ્વર્ગં લોકમાપ્નોતિ। અથ યો બૃહત્યાં કામઃ। તમેવૈતેનૈવંવિદવરુન્ધે

તદ્વા એતત્ત્રયં સહ ક્રિયતે। અગ્નિરર્ક્યં મહદુક્થ્યમ્। સ યત્સંવત્સરં દીક્ષાભિરેતિ, સંવત્સરમુપસદ્ભિઃ। તેનાસ્યાગ્ન્યર્કાવાપ્તૌ ભવતઃ। અથ યત્સંવત્સરં સુત્યાભિરેતિ, તેનો એવાસય મહદુક્થ્યમાપ્તં ભવન્તિ। સ વા એષ એવ સહસ્રસંવત્સરસ્ય પ્રતિમા, યત્તાપશ્ચિતઃ। એષ પ્રજાનાં પ્રજાત્યૈ। યત્તાપશ્ચિતઃ