શતપથબ્રાહ્મણમ્ · અધ્યાય 12.3.1

૧૨.૩.૧.
યદ્બાલાકે ત્રિવૃદેતિ સર્વમન્યોન્યમભિસંપદ્યમાનમ્। કથં સ્વિદ્યજ્ઞઃ પુરુષઃ પ્રજાપતિરન્યોઽન્યં નાતિરિચ્યન્ત એતે

યદૂર્ધ્વાઃ સ્તોમા અનુયન્તિ યજ્ઞમભ્યાવર્તં સામભિઃ કલ્પમાનાઃ। કથં સ્વિત્તે પુરુષમાવિશન્તિ કથં પ્રાણૈઃ સયુજો ભવન્તિ।

પ્રાયણીયોઽતિરાત્રશ્ચતુર્વિંશમહશ્ચત્વારોઽભિપ્લવાઃ પૃષ્ઠ્ય ઇત્યેતે। કથં સ્વિત્તે પુરુષમાવિશન્તિ કથં પ્રાણૈઃ સયુજો ભવન્તિ

અભિજિતા સ્વરસામાનોઽભિક્લૃપ્તા ઉભયતો વિષુવન્તમુપયન્તિ। કથંસ્વિત્તે પુરુષમાવિશન્તિ કથં પ્રાણૈઃ સયુજો ભવન્તિ

ત્રિવૃત્પ્રાયાઃ સપ્તદશાભિક્લૃપ્તાસ્ત્રયસ્ત્રિંશાંતાશ્ચતુરુત્તરેણ। કથં સ્વિત્તે પુરુષમાવિશન્તિ કથં પ્રાણૈઃ સયુજો ભવન્તિ ઇતિ

શિરસ્ત્રિવૃત્ પંચદશોઽસ્ય ગ્રીવા ઉર આહુઃ સપ્તદશાભિક્લૃપ્તમ્। એકવિંશમુદરં કલ્પયન્તિ પાર્શ્વે પર્શૂસ્ત્રિણવેનાભિકલૃપ્તે

અભિપ્લવા ઉભયતોઽસ્ય બાહૂ પૃષ્ઠ્યં પૃષ્ઠ્ય ઇતિ ધીરા વદન્તિ। અનૂકમસ્ય ચતુરુત્તરેણ સંવત્સરે બ્રાહ્મણાઃ કલ્પયન્તિ

કર્ણાવસ્યાભિજિદ્વિશ્વજિચ્ચાક્ષ્યા બાહુઃ સ્વરસામાઽભિકલૃપ્તે। નસ્યં પ્રાણં વિષુવન્તમાહુર્ગોઆયુષી પ્રાણાવેતાવવાંચૌ

અઙ્ગાન્યસ્ય દશરાત્રમાહુર્મુખં મહાવ્રતં સંવત્સરે બ્રાહ્મણાઃ કલ્પયન્તિ। સર્વસ્તોમં સર્વસામાનમેતં સંવત્સરમધ્યાત્મં પ્રવિષ્ટમ્। સમં ધીર આત્મના કલ્પયિત્વા બ્રધ્નસ્યાસ્તે વિષ્ટપેઽજાતશોકઃ