શતપથબ્રાહ્મણમ્ · અધ્યાય 11.6.3

જનકો હ વૈદેહો બહુદક્ષિણેન યજ્ઞેનેજે। સ હ ગવાં સહસ્રમવરુન્ધન્નુવાચૈતા વો બ્રાહ્મણા યો બ્રહ્મિષ્ઠઃ સ ઉદજતામિતિ -

સ હોવાચ। યાજ્ઞવલ્ક્યોઽર્વાચીરેતા ઇતિ તે હોચુસ્ત્વં સ્વિન્નો યાજ્ઞવલ્ક્ય બ્રહ્મિષ્ઠોઽસી૩ ઇતિ સ હોવાચ નમોઽસ્તુ બ્રહ્મિષ્ઠાય ગોકામા એવ વયં સ્મ ઇતિ -

તે હોચુઃ। કો ન ઇમં પ્રક્ષ્યતીતિ સ હોવાચ વિદગ્ધઃ શાકલ્યોઽહમિતિ તં હો પ્રતિખ્યાયોવાચ ત્વાં સ્વિચ્છાકલ્ય બ્રાહ્મણા ઉલ્મુકાવક્ષયણમક્રતા૩ ઇતિ -

સ હોવાચ। કતિ દેવા યાજ્ઞવલ્ક્યેતિ ત્રયશ્ચ ત્રી ચ શતા ત્રયશ્ચ ત્રી ચ સહસ્રેત્યોમિતિ
હોવાચ કત્યેવ દેવા યાજ્ઞવલ્ક્યેતિ ત્રયસ્ત્રિંશદિત્યોમિતિ હોવાચ કત્યેવ દેવા યાજ્ઞવલ્ક્યેતિ ત્રય ઇત્યોમિતિ હોવાચ કત્યેવ દેવા યાજ્ઞવલ્ક્યેતિ દ્વાવિત્યોમિતિ હોવાચ કત્યેવ દેવા યાજ્ઞવલ્ક્યેત્યધ્યર્દ્ધ ઇત્યોમિતિ હોવાચ કત્યેવ દેવા યાજ્ઞવલ્ક્યેત્યેક ઇત્યોમિતિ હોવાચ કતમે તે ત્રયશ્ચ ત્રી ચ શતા ત્રયશ્ચ ત્રી ચ સહસ્રેતિ -

સ હોવાચ। મહિમાન એવૈષામેતે ત્રયસ્ત્રિંશત્ત્વેવ દેવા ઇતિ કતમે તે ત્રયસ્ત્રિંશદિત્યષ્ટૌ વસવ એકાદશ રુદ્રા દ્વાદશાદિત્યાસ્ત એકત્રિંશદિન્દ્રશ્ચૈવપ્રજાપતિશ્ચ ત્રયસ્ત્રિંશાવિતિ -

કતમે વસવ ઇતિ। અગ્નિશ્ચ પૃથિવી ચ વાયુશ્ચાન્તરિક્ષં ચાદિત્યશ્ચ દ્યૌશ્ચ ચન્દ્રમાશ્ચ નક્ષત્રાણિ ચૈતે વસવ એતે હીદં સર્વં વાસયન્તે તે યદિદં સર્વં વાસયન્તે તસ્માદ્વસવ ઇતિ -

કતમે રુદ્રા ઇતિ। દશેમે પુરુષે પ્રાણા આત્મૈકાદશસ્તે યદાસ્માન્મર્ત્યાચ્છરીરાદુત્ક્રામન્ત્યથ રોદયન્તિ તદ્યદ્રોદયન્તિ તસ્માદ્રુદ્રા ઇતિ -

કતમ આદિત્યા ઇતિ। દ્વાદશ માસાઃ સંવત્સરસ્યૈત આદિત્યા એતે હીદં સર્વમાદદાના
યન્તિ તે યદિદં સર્વમાદદાના યન્તિ તસ્માદાદિત્યા ઇતિ -

કતમ ઇન્દ્રઃ કતમઃ પ્રજાપતિરિતિ સ્તનયિત્નુરેવેન્દ્રો યજ્ઞઃ પ્રજાપતિરિતિ કતમ સ્તનયિત્નુરિત્યશનિરિતિ કતમો યજ્ઞ ઇતિ પશવ ઇતિ -

કતમે તે ત્રયો દેવા ઇતિ। ઇમ એવ ત્રયો લોકા એષુ હીમે સર્વે દેવા ઇતિ કતમૌ તૌ
દ્વૌ દેવાવિત્યન્નં ચૈવ પ્રાણશ્ચેતિ કતમોઽધ્યર્ધ ઇતિ યોઽયં પવત ઇતિ કતમ એકો દેવ ઇતિ પ્રાણ ઇતિ -

સ હોવાચ। અનતિપ્રશ્ન્યાં મા દેવતામત્યપ્રાક્ષીઃ પુરેત્તિથ્યૈ મરિષ્યસિ ન તેઽસ્થીનિ ચન ગૃહાન્પ્રાપ્સ્યન્તીતિ સ હ તથૈવ મમાર તસ્ય હાપ્યન્યન્મન્યમાનાઃ પરિમોષિણોઽસ્થીન્યપજહ્રુસ્તસ્માન્નોપવાદી સ્યાદુત હ્યેવંવિત્પરો ભવતિ -