શતપથબ્રાહ્મણમ્ · અધ્યાય 11.2.2

ગાયત્રીમનુવાક્યામન્વાહ। ત્રિપદા વૈ ગાયત્રી ત્રય ઇમે લોકા ઇમાનેવૈતલ્લોકાન્દેવાઃ પ્રત્યષ્ઠાપયન્ -

અથ ત્રિષ્ટુભા યજતિ। ચતુષ્પદા વૈ ત્રિષ્ટુપ્ચતુષ્પાદાઃ પશવસ્તત્પશૂનેવૈતદેષુ લોકેષુ પ્રતિષ્ઠિતેષુ દેવાઃ પ્રત્યષ્ઠાપયન્ -

દ્વ્યક્ષરો વષટ્કારઃ। દ્વિપાદ્વૈ પુરુષસ્તત્પુરુષમેવૈતદ્દ્વિપાદમેષુ પશુષુ પ્રતિષ્ઠિતેષુ પ્રત્યષ્ઠાપયન્ -

સોઽયં દ્વિપાત્પુરુષઃ। પશુષુ પ્રતિષ્ઠિત એવમેવૈષ એતલ્લોકાન્પ્રતિષ્ઠાપયતિ લોકેષુ પ્રતિષ્ઠિતેષુ પશૂન્પ્રતિષ્ઠાપયતિ પશુષુ પ્રતિષ્ઠિતેષ્વાત્માનં પ્રતિષ્ઠાપયત્યેવમેષ પુરુષઃ પશુષુ પ્રતિષ્ઠિતો ય એવં વિદ્વાન્યજતે -

અથ યદ્વષટ્કૃતે જુહોતિ એષ વૈ વષટ્કારો ય એષ તપતિ સ એષ મૃત્યુસ્તદેનમુપરિષ્ટાન્મૃત્યોઃ સંસ્કરોતિ તદેનમતો જનયતિ સ એતં મૃત્યુમતિમુચ્યતે યજ્ઞો વા અસ્યાત્મા ભવતિ તદ્યજ્ઞ એવ ભૂત્વૈતન્મૃત્યુમતિમુચ્યત એતેનો હાસ્ય સર્વે યજ્ઞક્રતવ એતં મૃત્યુમતિમુક્તાઃ -

અથ યામેતામાહુતિં જુહોતિ। એષા હ વા અસ્યાહુતિરમુષ્મિંલોક આત્મા ભવતિ સ યદૈવંવિદસ્માલ્લોકાત્પ્રૈત્યથૈનમેષાહુતિરેતસ્ય પૃષ્ઠે સત્યાહ્વયત્યેહ્યહં વૈ ત ઇહાત્માસ્મીતિ તદ્યદાહ્વયતિ તસ્માદાહુતિર્નામ -