શતપથબ્રાહ્મણમ્ · અધ્યાય 11.1.3

પૌર્ણમાસેનેષ્ટ્વા। ઇન્દ્રાય વિમૃધેઽનુનિર્વપતિ તેન યથેષ્ટ્યૈવં યજત આમાવાસ્યેનેષ્ટ્વાદિત્યૈ ચરુમનુનિર્વપતિ તેન યથેષ્ટ્યૈવં યજતે -

સ યત્પૌર્ણમાસેનેષ્ટ્વા ઇન્દ્રાય વિમૃધેઽનુનિર્વપતીન્દ્રો વૈ યજ્ઞસ્ય દેવતાથૈતદગ્નીષોમીયં પૌર્ણમાસં હવિર્ભવતિ તત્ર નેન્દ્રાય ત્વેતિ કિં ચન ક્રિયત એતેનો હાસ્યૈતત્સેન્દ્રં હવિર્ભવત્યેતેન સેન્દ્રો યજ્ઞોઽથ યદ્વિમૃધે ત્વેતિ સર્વા ઉ હિ મૃધો નાષ્ટ્રાઃ પૌર્ણમાસેન હન્તિ -

અથ યદામાવાસ્યેનેષ્ટ્વા। અદિત્યૈ ચરુમનુનિર્વપત્યેષ વૈ સોમો રાજા દેવાનામન્નં યચ્ચન્દ્રમાઃ સ યત્રૈષ એતાં રાત્રિં ન પુરસ્તાન્ન પશ્ચાદ્દદૃશે તેનૈતદનદ્ધેવ હવિર્ભવતિ તેનાપ્રતિષ્ઠિતમિયં વૈ પૃથિવ્યદિતિઃ સેયમદ્ધા સેયં પ્રતિષ્ઠિતૈતેનો હાસ્યૈતદદ્ધેવ હવિર્ભવત્યેતેન પ્રતિષ્ઠિતમેતન્નુ તદ્યસ્માદનુનિર્વપત્યથ યસ્માન્નાનુ નિર્વપેત્ -

સ યત્પૌર્ણમાસેનેષ્ટ્વા ઇન્દ્રાય વિમૃધેઽનુનિર્વપતિ સેન્દ્રો મે યજ્ઞોઽસદિતિ સર્વો વૈ યજ્ઞ ઇન્દ્રસ્યૈવ સ યત્સર્વો યજ્ઞ ઇન્દ્રસ્યૈવૈતેનો હાસ્યેતત્સેન્દ્રં હવિર્ભવત્યેતેન સેન્દ્રો યજ્ઞઃ -

અથ યદામાવાસ્યેનેષ્ટ્વા। અદિત્યૈ ચરુમનુનિર્વપત્યામાવાસ્યં વા અનુનિર્વાપ્યં પૌર્ણમાસેન વા ઇન્દ્રો વૃત્રમહંસ્તસ્મા એતદ્વૃત્રં જઘ્નુષે દેવા એતદ્ધવિરનુનિરવપન્યદામાવાસ્યં કિમનુનિર્વાપ્યેઽનુ નિર્વપેદિતિ તસ્માન્ન્નાનુ નિર્વપેત્ -

સ યત્પૌર્ણમાસેનેષ્ટ્વા। અથાન્યદ્ધવિરનુનિર્વપત્યામાવાસ્યેનેષ્ટ્વાઽથાન્યદ્ધવિરનુનિર્વપતિ દ્વિષન્તં હ સ ભ્રાતૃવ્યં પ્રત્યુચ્છ્રયતેઽથ યઃ પૌર્ણમાસીં યજત આમાવાસ્યેનામાવાસ્યામસપત્ના હૈવાસ્યાનુપબાધા શ્રીર્ભવતિ -

પૌર્ણમાસેન વૈ દેવાઃ। પૌર્ણમાસીં યજમાના આમાવાસ્યેનામાવાસ્યાં ક્ષિપ્ર એવ પાપ્માનમપાઘ્નત ક્ષિપ્રે પ્રાજાયન્ત સ યો હૈવં વિદ્વાન્પૌર્ણમાસેનૈવ પૌર્ણમાસીં યજત આમાવાસ્યેનામાવાસ્યાં ક્ષિપ્ર એવ પાપ્માનમપહતે ક્ષિપ્રે પ્રજાયતે સ યદ્યનુ નિર્વપેદ્દદ્યાદ્દક્ષિણાં નાદક્ષિણં હવિઃ સ્યાદિતિ હ્યાહુર્દર્શપૂર્ણમાસયોર્હ્યેવૈષા દક્ષિણા યદન્વાહાર્ય ઇતિ ન્વનુનિર્વાપ્યસ્યાથાભ્યુદિતસ્ય -