શતપથબ્રાહ્મણમ્ · અધ્યાય 11.1.1

સંવત્સરો વૈ યજ્ઞઃ પ્રજાપતિઃ। તસ્યૈતદ્દ્વારં યદમાવાસ્યા ચન્દ્રમા એવદ્વારપિધાનઃ -

સ યોઽમાવાસ્યાયામગ્ની આધત્તે યથા વિવૃતાયાં દ્વારિ દ્વારા પુરં પ્રપદ્યેત સ તત એવ સ્વર્ગં લોકમિયાદેવં તદ્યોઽમાવાસ્યાયામાધત્તે -

અથ યો નક્ષત્ર આધત્તે। યથા પિહિતાયાં દ્વાર્યદ્વારા પુરં પ્રપિત્સેત્સ જિહ્મઃ પુરઃ સ્યાદેવં તદ્યો નક્ષત્ર આધત્તે તસ્માન્ન નક્ષત્ર આદધીત -

યદહરેવૈષઃ। ન પુરસ્તાન્ન પશ્ચાદ્દૃશ્યેત તદહરુપવસેત્તર્હિ હ્યેષ ઇમં લોકમાગચ્છતિ તસ્મિન્નિહ વસતિ -

સર્વે દેવા વસન્તિ। સર્વાણિ ભૂતાનિ સર્વા દેવતાઃ સર્વ ઋતવઃ સર્વે સ્તોમાઃ સર્વાણિ પૃષ્ઠાનિ સર્વાણિ છન્દાંસિ -

સર્વેષુ હ વા અસ્ય દેવેષુ। સર્વેષુ ભૂતેષુ સર્વાસુ દેવતાસુ સર્વેષ્વૃતુષુ સર્વેષુ સ્તોમેષુ સર્વેષુ પૃષ્ઠેષુ સર્વેષુ છન્દઃસ્વગ્ની આહિતૌ ભવતો યોઽમાવાસ્યાયામાધત્તે તસ્માદમાવાસ્યાયામેવાગ્ની આદધીત -

યોઽસૌ વૈશાખસ્યામાવાસ્યા। તસ્યામાદધીત સા રોહિણ્યા સમ્પદ્યત આત્મા વૈ પ્રજા પશવો રોહિણ્યાત્મન્યેવૈતત્પ્રજાયાં પશુષુ પ્રતિતિષ્ઠત્યમાવાસ્યા વાઅગ્ન્યાધેયરૂપં તસ્માદમાવાસ્યાયામેવાગ્ની આદધીત પૌર્ણમાસ્યામન્વારભેતામાવાસ્યાયાં દીક્ષેત -