શતપથબ્રાહ્મણમ્ · અધ્યાય 10.6.3

૧૦.૬.૩ શાણ્ડિલ્યાગ્ન્યુપાસનં બ્રાહ્મણમ્
સત્યં બ્રહ્મેત્યુપાસીત। અથ ખલુ ક્રતુમયોઽયં પુરુષઃ સ યાવત્ક્રતુરયમસ્માલ્લોકાત્પ્રૈત્યેવં ક્રતુર્હામું લોકં પ્રેત્યાભિસમ્ભવતિ -

સ આત્માનમુપાસીત। મનોમયં પ્રાણશરીરં ભારૂપમાકાશાત્માનં કામરૂપિણં મનોજવસં સત્યસંકલ્પં સત્યધૃતિં સર્વગન્ધં સર્વરસં સર્વા અનુ દિશઃ પ્રભૂતં સર્વમિદમભ્યાપ્તમવાક્કમનાદરં યથા વ્રીહિર્વા યવો વા શ્યામાકો વા શ્યામાકતણ્ડુલો વૈવમયમન્તરાત્મન્પુરુષો હિરણ્મયો યથાજ્યોતિરધૂમમેવં જ્યાયાન્દિવો જ્યાયાનાકાશાજ્જ્યાયાનસ્યૈ પૃથિવ્યૈ જ્યાયાન્ત્સર્વેભ્યો ભૂતેભ્યઃ સ પ્રાણસ્યાત્મૈષ મ આત્મૈતમિત આત્માનં પ્રેત્યાભિસમ્ભવિષ્યામીતિ યસ્ય સ્યાદદ્ધા ન વિચિકિત્સાસ્તીતિ હ સ્માહ શાણ્ડિલ્ય એવમેતદિતિ -