શતપથબ્રાહ્મણમ્ · અધ્યાય 10.6.2

૧૦.૬.૨ પુરુષસ્યાગ્ન્યર્કોક્થવિધોપાસનં બ્રાહ્મણમ્
દ્વયં વા ઇદમત્તા ચૈવાદ્યં ચ। તદ્યદોભયં સમાગચ્છત્યત્તૈવાખ્યાયતે નાદ્યમ્ -

સ વૈ યઃ સોઽત્તાગ્નિરેવ સઃ। તસ્મિન્યત્કિં ચાભ્યાદધત્યાહિતય એવાસ્ય તા આહિતયો હ વૈ તા આહુતય ઇત્યાચક્ષતે પરોઽક્ષં પરોઽક્ષકામા હિ દેવાઃ -

આદિત્યો વા અત્તા। તસ્ય ચન્દ્રમા એવાહિતયશ્ચન્દ્રમસં હ્યાદિત્ય આદધતીત્યધિદેવતમ્ -

અથાધ્યાત્મમ્। પ્રાણો વા અત્તા તસ્યાન્નમેવાહિતયોઽન્નં હિ પ્રાણ આદધતીતિ ન્વગ્નેઃ -

અથાર્કસ્ય। અગ્નિર્વા અર્કસ્તસ્યાહુતય એવ કમાહુતયો હ્યગ્નયે કમ્ -

આદિત્યો વા અર્કઃ। તસ્ય ચન્દ્રમા એવ કં ચન્દ્રમા હ્યાદિત્યાય કમિત્યધિદેવતમ્ -

અથાધ્યાત્મમ્। પ્રાણો વા અર્કસ્તસ્યાન્નમેવ કમન્નં હિ પ્રાણાય કમિતિ ન્વેવાર્કસ્ય -

અથોક્થસ્ય અગ્નિર્વા ઉક્તસ્યાહુતય એવ થમાહુતિભિર્હ્યગ્નિરુત્તિષ્ઠતિ -

આદિત્યો વા ઉક્ તસ્ય ચન્દ્રમા એવ થં ચન્દ્રમસા હ્યાદિત્ય ઉત્તિષ્ઠતીત્યધિદેવતમ્ -

અથાધ્યાત્મમ્। પ્રાણો વા ઉક્તસ્યાન્નમેવ થમન્નેન હિ પ્રાણ ઉત્તિષ્ઠતીતિ ન્વેવોક્થસ્ય સ એષોઽગ્નિવિધોઽર્કવિધ ઉક્થવિધો યત્પુરુષઃ સ યો હૈતમેવમગ્નિવિધમર્કવિધમુક્થવિધં પુરુષમુપાસ્તે વિદુષો હૈવાસ્યૈવં ભ્રાતૃવ્યો મ્લાયતિ -

પ્રાણેન વા અગ્નિર્દીપ્યતે અગ્નિના વાયુર્વાયુનાદિત્ય આદિત્યેન ચન્દ્રમાશ્ચન્દ્રમસા નક્ષત્રાણિ નક્ષત્રૈર્વિદ્યુદેતાવતી વૈ દીપ્તિરસ્મિંશ્ચ લોકેઽમુષ્મિંશ્ચ સર્વાં હૈતાં દીપ્તિં દીપ્યતેઽસ્મિંશ્ચ લોકેઽમુષ્મિંશ્ચ ય એવં વેદ -