Shatapatha Brahmana · Chapter 10.6.3

१०.६.३ śāṇḍilyāgnyupāsanaṃ brāhmaṇam
satyaṃ brahmetyupāsīta/ atha khalu kratumayo'yaṃ puruṣaḥ sa yāvatkraturayamasmāllokātpraityevaṃ kraturhāmuṃ lokaṃ pretyābhisambhavati -

sa ātmānamupāsīta/ manomayaṃ prāṇaśarīraṃ bhārūpamākāśātmānaṃ kāmarūpiṇaṃ manojavasaṃ satyasaṃkalpaṃ satyadhṛtiṃ sarvagandhaṃ sarvarasaṃ sarvā anu diśaḥ prabhūtaṃ sarvamidamabhyāptamavākkamanādaraṃ yathā vrīhirvā yavo vā śyāmāko vā śyāmākataṇḍulo vaivamayamantarātmanpuruṣo hiraṇmayo yathājyotiradhūmamevaṃ jyāyāndivo jyāyānākāśājjyāyānasyai pṛthivyai jyāyāntsarvebhyo bhūtebhyaḥ sa prāṇasyātmaiṣa ma ātmaitamita ātmānaṃ pretyābhisambhaviṣyāmīti yasya syādaddhā na vicikitsāstīti ha smāha śāṇḍilya evametaditi -