શતપથબ્રાહ્મણમ્ · અધ્યાય 10.6.4

અશ્વાવયવેષુ વિરાડવયવોપાસનં બ્રાહ્મણમ્
૧૦.૬.૪
ઉષા વા અશ્વસ્ય મેધ્યસ્ય શિરઃ સૂર્યશ્ચક્ષુર્વાતઃ પ્રાણો વ્યાત્તમગ્નિર્વૈશ્વાનરઃ સંવત્સર આત્માશ્વસ્ય મેધ્યસ્ય દ્યૌષ્પૃષ્ઠમન્તરિક્ષમુદરં પૃથિવી પાજસ્યં દિશઃ પાર્શ્વે અવાન્તરદિશઃ પર્શવ ઋતવોઽઙ્ગાનિ માસાશ્ચાર્ધમાસાશ્ચ પર્વાણ્યહોરાત્રાણિ પ્રતિષ્ઠા નક્ષત્રાણ્યસ્થીનિ નભો માંસાન્યૂવધ્યં સિકતાઃ સિન્ધવો ગુદા યકૃચ્ચ ક્લોમાનશ્ચ પર્વતા ઓષધયશ્ચ વનસ્પતયશ્ચ લોમાન્યુદ્યન્પૂર્વાર્ધો નિમ્લોચન્જઘનાર્ધો યદ્વિજૃમ્ભતે તદ્વિદ્યોતતે યદ્વિધૂનુતે તત્સ્તનયતિ યન્મેહતિ તદ્વર્ષતિ વાગેવાસ્ય વાગહર્વા અશ્વમ્ પુરસ્તાન્મહિમાઽન્વજાયત તસ્ય પૂર્વે સમુદ્રે યોની રાત્રિરેનમ્પશ્ચાન્મહિમાન્વજાયત તસ્યાપરે સમુદ્રે યોનિરેતૌ વા અશ્વં મહિમાનાવભિતઃ સમ્બભૂવતુર્હયો ભૂત્વા દેવાનવહદ્વાજી ગન્ધર્વાનર્વાસુરાનશ્વો મનુષ્યાન્ત્સમુદ્ર એવાસ્ય બન્ધુઃ સમુદ્રો યોનિઃ - ૧૦.૬.૪.