શતપથબ્રાહ્મણમ્ · શ્લોક 10.3-3

અર્કસ્ય વનસ્પતિરૂપગ્રહણમ્

શ્વેતકેતુર્હારુણેયઃ યક્ષ્યમાણ આસ તં હ પિતોવાચ કાનૃત્વિજોઽવૃથા ઇતિ સ હોવાચાયં ન્વેવ મે વૈશ્વાવસવ્યો હોતેતિ તં હ પપ્રચ્છ વેત્થ બ્રાહ્મણ વૈશ્વાવસવ્ય -

ચત્વારિ મહાન્તી૩ ઇતિ વેદ ભો૩ ઇતિ હોવાચ વેત્થ ચત્વારિ મહતાં મહાન્તી૩ ઇતિ વેદ ભો૩ ઇતિ હોવોચ વેત્થ ચત્વારિ વ્રતાનિ૩ ઇતિ વેદ ભો૩ ઇતિ હોવાચ વેત્થ ચત્વારિ વ્રતાનાં વ્રતાની૩ ઇતિ વેદ ભો૩ ઇતિ હોવાચ વેત્થ ચત્વારિ ક્યાની૩ ઇતિ વેદ ભો૩ ઇતિ હોવાચ વેત્થ ચત્વારિ ક્યાનાં ક્યાની૩ ઇતિ વેદ ભો૩ ઇતિ હોવાચ વેત્થ ચતુરોઽર્કા૩ ઇતિ વેદ ભો૩ ઇતિ હોવાચ વેત્થ ચતુરોઽર્કાણામર્કા૩ ઇતિ વેદ ભો૩ ઇતિ હોવાચ -

વેત્થાર્કમિતિ અથ વૈ નો ભવાન્વક્ષ્યતીતિ વેત્થાર્કપર્ણે ઇત્યથ વૈ નો ભવાન્વક્ષ્યતીતિ વેત્થાર્કપુષ્પે ઇત્યથ વૈ નો ભવાન્વક્ષ્યતીતિ વેત્થાર્કકોશ્યાવિત્યથ વૈ નો ભવાન્વક્ષ્યતીતિ વેત્થાર્કસમુદ્ગાવિત્યથ વૈ નો ભવાન્વક્ષ્યતીતિ વેત્થાર્કધાના ઇત્યથ વૈ નો ભવાન્વક્ષ્યતીતિ વેત્થાર્કાષ્ઠીલામિત્યથ વૈ નો ભવાન્વક્ષ્યતીતિ વેત્થાર્કમૂલમિત્યથ વૈ નો ભવાન્વક્ષ્યતીતિ -

સ હ વૈ યત્તદુવાચ વેત્થ ચત્વારિ મહાન્તિ વેત્થ ચત્વારિ મહતામ્મહાન્તીત્યગ્નિર્મહાંસ્તસ્ય મહતો મહદોષધયશ્ચ વનસ્પતયશ્ચ તદ્ધ્યસ્યાન્નં વાયુર્મહાંસ્તસ્ય મહતો મહદાપસ્તદ્ધ્યસ્યાન્નમાદિત્યોમહાંસ્તસ્ય મહતો મહચ્ચન્દ્રમાસ્તદ્ધ્યસ્યાન્નં પુરુષો મહાંસ્તસ્ય મહતોમહત્પશવસ્તદ્ધ્યસ્યાન્નમેતાન્યેવ ચત્વારિ મહાન્ત્યેતાનિ ચત્વારિ મહતામ્મહાન્ત્યેતાન્યેવ ચત્વારિ વ્રતાન્યેતાનિ ચત્વારિ વ્રતાનાં વ્રતાન્યેતાન્યેવ ચત્વારિ ક્યાન્યેતાનિ ચત્વારિ ક્યાનાં ક્યાન્યેત એવ ચત્વારોઽર્કા એતે ચત્વારોઽર્કાણામર્કાઃ -

અથ હ વૈ યત્તદુવાચ વેત્થાર્કમિતિ પુરુષં હૈવ તદુવાચ વેત્થાર્કપર્ણે ઇતિ કર્ણૌ હૈવ તદુવાચ વેત્થાર્કપુષ્પે ઇત્યક્ષિણી હૈવ તદુવાચ વેત્થાર્કકોશ્યાવિતિ નાસિકે હૈવ તદુવાચ વેત્થાર્કસમુદ્ગાવિત્યોષ્ઠૌ હૈવ તદુવાચ વેત્થાર્કધાના ઇતિ દન્તાન્હૈવ તદુવાચ વેત્થાર્કાષ્ઠીલામિતિ જિહ્વાં હૈવ તદુવાચ વેત્થાર્કમૂલમિત્યન્નં હૈવ તદુવાચ સ એષોઽગ્નિરર્કો યત્પુરુષઃ સ યો હૈતમેવમગ્નિમર્કં પુરુષમુપાસ્તેઽયમહમગ્નિરર્કોઽસ્મીતિ વિદ્યયા હૈવાસ્યૈષ આત્મન્નગ્નિરર્કશ્ચિતો ભવતિ-