સેકોદ્દેશ · શ્લોક 81-100

વિવિધં રમણં નાભૌ ગુહ્યપદ્મે યદાગતમ્ ।
ગુહ્યાદ્વજ્રમણિં યાવત્ સહજાનન્દમચ્યુતમ્

અપ્રતિષ્ઠિતનિર્વાણં મહારાગો ઽક્ષરઃ પ્રભુઃ ।
વિરાગાદ્યચ્ચ્યુતં સૌખ્યં તન્નિર્વાણં પ્રતિષ્ઠિતમ્

શુક્રેન્દૂદય ઉષ્ણીષે પૂર્ણા ગુહ્યે સરોરુહે ।
કલા ષોડશમા યા સા મણિપદ્મે વજ્રમૂર્ધગા

તદૂર્ધ્વં ચ્યુતિકાલઃ સ્યાત્ કૃષ્ણપ્રતિપદાગમે ।
રવિસ્તૂર્ણાપદં યાતિ અમાવસ્યાં વિરાગતઃ

કલા ષોડશમા તસ્ય ઉષ્ણીષકમલે ગતા ।
નષ્ટચન્દ્ર ઇહાખ્યાતો વિરક્તી રાગસૌખ્યતઃ

અધશ્ચન્દ્રામૃતં યાતિ મરણે સર્વદેહિનામ્ ।
ઊર્ધ્વે સૂર્યરજો રાહુવિજ્ઞાનં ભાવલક્ષણે

અતશ્ચન્દ્રામૃતસ્યોર્ધ્વે કર્તવ્યં ગમનં નૃપ ।
અધો ઽર્કરજસો રાહુવિજ્ઞાનસ્યાક્ષરે સુખે

ઊર્ણ્ણાબ્જે સર્વબુદ્ધાનાં ચન્દ્રામૃતસ્ય પૂર્ણિમા ।
અમાર્કરજસો ગુહ્યે કલોષ્ણીષે મણૌ તયોઃ

ઇતિ વજ્રપદં શાસ્તુર્વિપરીતં સર્વદેહિનામ્ ।
અપ્રતિષ્ઠિતનિર્વાણાદ્વિપરીતં યાન્તિ ધાતવઃ

મણૌ ચિત્તં ચ ગુહ્યે વાક્કાયો નાભૌ મહાસુખાત્ ।
ધર્મસમ્ભોગનિર્માણાઃ શુદ્ધકાયાત્ સ્ફરન્ત્યમી

અધોપાયસ્ય રાજેન્દ્ર પ્રજ્ઞા યા ઊર્ધ્વતો ભવેત્ ।
લલાટે કાયવજ્રમસ્યા ગ્રીવહૃન્નાભિપઙ્કજે

વાક્ચિત્તજ્ઞાનવજ્રાણિ નિર્માણાદ્યાત્ સ્ફરન્ત્યમી ।
સ્ફરણં સ્કન્ધધાતૂનાં નિરાવરણતઃ સુખાત્

કર્મમુદ્રાસમાપત્ત્યા જ્ઞાનમુદ્રાવલમ્બનૈઃ ।
મહામુદ્રૈકયોગેન વૃદ્ધિં યાતિ તદક્ષરમ્

વૃદ્ધસ્ય ન ચ સ્યાત્ વૃદ્ધિઃ ક્ષીણસ્ય ક્ષીણતા ન ચ ।
અસ્તંગતસ્ય નાસ્તમનમુદિતસ્યોદયં ન હિ

ન પ્રકાશઃ પ્રકાશસ્ય પિહિતં પિહિતસ્ય ન ।
જાતસ્યૈવ ન જન્મ સ્યાન્ મૃતસ્ય મરણં ન ચ

મુક્તસ્ય ન ચ મુક્તિઃ સ્યાદસ્થિતસ્ય ચ ચાસ્થિતિઃ ।
અભાવો ન હ્યભાવસ્ય ભાવો ભાવસ્ય નૈવ ચ

ક્ષરસ્યાપિ ક્ષરો ન સ્યાદક્ષરસ્ય ન ચાક્ષરઃ ।
સ્વભાવાભાવધર્માણાં માયોત્પાદઃ ક્ષયસ્તથા

ન ક્ષયં યાન્તિ ભૂતાનિ ન જાયન્તે સ્વભાવતઃ ।
નિઃસ્વભાવમિદં વિશ્વં ભાવાભાવૈકલક્ષણમ્

સ્વપ્રજ્ઞાલિઙ્ગિતં ચિત્તં પદ્મે વજ્રમણૌ ગતમ્ ।
તત્ર ચન્દ્રગતસ્પન્દો નિઃસ્પન્દાક્ષરભાવના

કાયવાક્ચિત્તનાડીષુ કાયવાક્ચિત્તભાવના ।
સમાહારસ્ત્રિવજ્રાણાં શઙ્ખિન્યાં જ્ઞાનભાવના