સેકોદ્દેશ · શ્લોક 141-160

તસ્માત્ સર્વપ્રયત્નેન ચ્યુતિરાગં વિવર્જયેત્ ।
યેનાક્ષરસુખં યાતિ યોગી સંસારબન્ધનાત્

કામુકો ઽપિ વિરાગાન્ન કામશાસ્ત્રં સમીહતે ।
મયોક્તે કિં પુનસ્તન્ત્રે યોગી દુઃખં સમીહતે

શુક્રાક્ષરસ્વભાવેન સાધયેત્ પરમાક્ષરમ્ ।
આધારે ચ્યુતિમાપન્ને આધેયસ્ય વિરાગતા

આધારાધેયસંબન્ધો યાવન્નાક્ષરતાં વ્રજેત્ ।
ચિત્તમક્ષરતાપ્રાપ્તં નાધારાધેયલક્ષણમ્

અક્ષરોદ્ભવકાયસ્ય ઊર્ણ્ણાચક્રગતસ્ય તુ ।
આલિકાલિસમાયોગો હૂંકારો નેષ્યતે નૃપ

બિમ્બં શૂન્યોદ્ભવં હેતુઃ ફલમક્ષરજં સુખમ્ ।
ફલેન મુદ્રિતો હેતુર્હેતુના મુદ્રિતં ફલમ્

શૂન્યતા બિમ્બધૃગ્ઘેતુઃ કરુણાક્ષરધૃક્ ફલમ્ ।
શૂન્યતાકરુણાભિન્નં બોધિચિત્તં તદચ્યુતમ્

નિર્વાણરહિતં બિમ્બં સંસારાતીતમક્ષરમ્ ।
શાશ્ચતોચ્છેદનિર્મુત્તસ્તતોર્યોગો ઽદ્વયો ઽપરઃ

અભાવો નાસ્તિ બિમ્બસ્ય અભાવોદ્ભૂતલક્ષણાત્ ।
ભાવો નાસ્ત્યક્ષરસ્યાપિ ભાવસમ્ભૂતલક્ષણાત્

ભાવાભાવસમાયોગો વજ્રયોગો ઽદ્વયો ઽપરઃ ।
રૂપારૂપવિનિર્મુક્તઃ પ્રતિસેનેવ દર્પણે

બિમ્બં ન ભવમાયાતિ નાપિ નિર્વાણમક્ષરમ્ ।
અન્યોન્યાલિઙ્ગિતં શાન્તં નપુંસકપદં પરમ્

પ્રજ્ઞાહેતોરજાતત્વાત્ પ્રજ્ઞાહેતૂદ્ભવં ફલમ્ ।
પ્રજ્ઞાહેતોરજાતત્વાત્ પ્રજ્ઞાજાતં ન હેતુજમ્

અતો ન હેતુજં જ્ઞાનં પ્રજ્ઞાજ્ઞાનમનુત્તરમ્ ।
ફલેન હેતુનાન્યોન્યં ન પરસ્પરમુદ્રણમ્

હેતુઃ ફલં ચ યત્ સર્વં તત્ પ્રતીત્યસમુદ્ભવમ્ ।
અન્યોન્યમુદ્રિતં બિમ્બં નોત્પન્નં ન ચ નિર્વૃતમ્

પ્રજ્ઞા ચાત્યન્તનિર્વૃતા ઉત્પન્નશ્ચ પરો ઽક્ષરઃ ।
હેતુફલવિનિર્મુક્તિર્ન પરસ્પરમુદ્રણમ્

અજાતસ્યાનિરુદ્ધસ્ય યજ્જ્ઞેયસ્યેહ દર્શનમ્ ।
તત્ સ્વચિત્તસ્ય નાન્યસ્ય બાહ્યજ્ઞેયવિભાગતઃ

અતો ન ચાત્મનાત્માનં મુદ્રિતું શક્યતે ક્વચિત્ ।
કિં છિનત્તિ મહાખડ્ગ આત્માનમાત્મધારયા

બન્ધ્યાદુહિતૃસંગેન સ્વપ્ને સૌખ્યં યથા ભવેત્ ।
ગગનોદ્ભવબિમ્બેન સેવિતેન તથાત્મનઃ

ન પ્રજ્ઞા નાપ્યુપાયો ઽસૌ સહજઃ પ્રજ્ઞયા સહ ।
આપૂર્ણશ્ચૈવ સૌખ્યેન સર્વાવરણવર્જિતઃ

આકાશવન્નિરાવરણો વિષયેન્દ્રિયવર્જિતઃ ।
સર્વતઃ સર્વભૂતસ્થ અચ્છેદ્યો ભેદવર્જિતઃ