સેકોદ્દેશ · શ્લોક 161-174

સ્વયમ્ભૂર્વજ્રસત્ત્વો ઽસૌ મહાર્થઃ પરમાક્ષરઃ ।
મહારાગો મહાસત્ત્વઃ સર્વસત્ત્વરતિંકરઃ

બોધિસત્ત્વો મહાદ્વેષઃ ક્લેશક્ષયી મહારિપુઃ ।
સમયસત્ત્વો મહામોહો મૂઢધીમોહસૂદનઃ

વજ્રયોગો મહાક્રોધઃ ક્રુદ્ધમારમહારિપુઃ ।
કાલચક્રો મહાલોભઃ ક્ષરલોભનિષૂદનઃ

વજ્રમભેદ્યમિત્યાહ મહાર્થં ભગવાનિહ ।
સત્ત્વં ત્રિભવસ્યૈકતા તદુક્તં પરમાક્ષરમ્

પરમાક્ષરસુખાપૂર્ણો ભૂમિભિઃ પરિપૂરિતઃ ।
મહારાગો મહાસત્ત્વઃ સર્વસત્ત્વરતિંકરઃ

બોધૌ વ્યવસ્થિતઃ સત્ત્વો બોધિસત્ત્વસ્તતો ઽચલઃ ।
ક્લેશાદિદ્વેષસંઘાનાં મહાદ્વેષો મહારિપુઃ

સમયશ્ચન્દ્રામૃતં શુક્રમચ્યુતિસ્તસ્ય ભક્ષણમ્ ।
સમયસત્ત્વો ઽનયા વૃત્ત્યા મૂઢધીમોહસૂદનઃ

એકત્વં સર્વવજ્રાણાં પ્રજ્ઞાકાયાક્ષરૈઃ સહ ।
મહાક્રોધો મહાશત્રુર્મારાણાં ક્રોધરૂપિણામ્

મહાક્ષરસુખોપાયાત્ સત્ત્વાર્થં ન ત્યજેત્ ક્વચિત્ ।
સત્ત્વાન્ મોક્તું મહાલોભઃ ક્ષરલોભનિષૂદનઃ

એતે હ્યુક્તાઃ ષડાકારા અક્ષરજ્ઞાનવેદના ।
વિજ્ઞાનરૂપસંસ્કારસંજ્ઞાઃ સ્કન્ધકુલાનિ તે

જ્ઞાનાગ્ન્યમ્બરપૃથિવીવાયૂદકા યથાક્રમમ્ ।
મનશ્ચક્ષુઃશ્રુતિકાયનાસજિહ્વાસ્તથૈવ ચ

શબ્દરસધર્મધાતુકગન્ધસ્પ્રષ્ટવ્યરૂપિણઃ ।
ક્રોધરાટ્ ષણ્મુખો ભીમઃ ષટ્કુલૈઃ પરિશોધિતઃ

કાયગુહ્યેન્દ્રિયચિત્તં ત્રિવિધં મણ્ડલં સદા ।
પ્રજ્ઞોપાયત્રિવજ્રાણાં જાયતે વજ્રસત્ત્વતા

ઇદં સેકસ્ય સાધનં પરમાક્ષરસાધનમ્ ।
નાડીકુલસમાયુક્તમુદ્દેશાચ્ચન્દ્ર ભાષિતમ્