શાસ્ત્રવાર્ત્તાસમુચ્ચય · અધ્યાય 8.1

અન્યે ત્વ્ અદ્વૈતમ્ ઇચ્છન્તિ સદ્બ્રહ્માદિવ્યપેષયા
સતો યદ્ ભેદકં નાન્યત્ તચ્ ચ તન્માત્રમ્ એવ હિ ॥

યથા વિશુદ્ધમ્ આકાશં તિમિરોપપ્લુતો જનઃ
સંકીર્ણમ્ ઇવ માત્રાભિર્ ભિન્નાભિર્ અભિમન્યતે ॥

તથેદમ્ અમલં બ્રહ્મ નિર્વિકલ્પમ્ અવિદ્યયા
કલુષત્વમ્ ઇવાપન્નં ભેદરૂપં પ્રકાશતે ॥

અત્રાપ્ય્ એવં વદન્ત્ય્ અન્યે અવિદ્યા ન સતઃ પૃથક્
તચ્ ચ તન્માત્રમ્ એવેતિ ભેદાભાસો ઽનિબન્ધનઃ ॥

સૈવાથાભેદરૂપાપિ ભેદાભાસનિબન્ધનમ્
પ્રમાણમ્ અન્તરેણૈતદ્ અવગન્તું ન શક્યતે ॥

ભાવે ઽપિ ચ પ્રમાણસ્ય પ્રમેયવ્યતિરેકતઃ
નનુ નાદ્વૈતમ્ એવેતિ તદભાવે ઽપ્રમાણકમ્ ॥

વિદ્યાવિદ્યાદિભેદાચ્ ચ સ્વતન્ત્રેણૈવ બાધ્યતે
તત્સંશયાદિયોગાચ્ ચ પ્રતીત્યા ચ વિચિન્ત્યતામ્ ॥

અન્યે વ્યાખ્યાનયન્ત્ય્ એવં સમભાવપ્રસિદ્ધયે
અદ્વૈતદેશના શાસ્ત્રે નિર્દિષ્ટા ન તુ તત્ત્વતઃ ॥

ન ચૈતત્ બાધ્યતે યુક્ત્યા સચ્છાસ્ત્રાદિવ્યવસ્થિતેઃ
સંસારમોક્ષભાવાચ્ ચ તદર્થં યત્નસિદ્ધિતઃ ॥

અન્યથા તત્ત્વતો ઽદ્વૈતે હન્ત સંસારમોક્ષયોઃ
સર્વાનુષ્ઠાનવૈયર્થ્યમ્ અનિષ્ટં સમ્પ્રસજ્યતે ॥