શાસ્ત્રવાર્ત્તાસમુચ્ચય · અધ્યાય 6.3

પરિણામો ઽપિ નો હેતુઃ ક્ષણિકત્વપ્રસાધને
સર્વદૈવાન્યથાત્વે ઽપિ તથાભાવોપલબ્ધિતઃ ॥

નાર્થાન્તરગમો યસ્માત્ સર્વથૈવ ન ચાગમઃ
પરિણામઃ પ્રમાસિદ્ધઃ ઇષ્ટશ્ ચ ખલુ પણ્ડિતૈઃ ॥

યચ્ ચેદમ્ ઉચ્યતે બ્રૂમો ઽતાદવસ્થ્યમનિત્યતામ્
એતત્ તદ્ એવ ન ભવત્ય્ અતો ઽન્યત્વે ધ્રુવો ઽન્વયઃ ॥

તદ્ એવ ન ભવત્ય્ એતત્ તચ્ ચ ન ભવતીતિ ચ
વિરુદ્ધં હન્ત કિંચાન્યદ્ આદિમત્ તત્ પ્રસજ્યતે ॥

ક્ષીરનાશશ્ ચ દધ્ય્ એવ યદ્ દૃષ્ટં ગોરસાન્વિતમ્
ન તુ તૈલાદ્યતઃ સિદ્ધ પરિણમો ઽન્વયાવહઃ ॥

નાસત્ સજ્જાયતે જાતુ સચ્ ચાસત્ સર્વથૈવ હિ
શક્ત્યભાવાદ્ અતિવ્યાપ્તેઃ સત્સ્વભાવત્વહાનિતઃ ॥

નિત્યેતરદતો ન્યાયાત્ તત્ તથાભાવતો હિ તત્
પ્રતીતિસચિવાત્ સમ્યક્ પરિણામેન ગમ્યતે ॥