શાસ્ત્રવાર્ત્તાસમુચ્ચય · અધ્યાય 6.2

અર્થક્રિયાસમર્થત્વં ક્ષણિકે યચ્ ચ ગીયતે
ઉત્પત્ત્યનન્તરં નાશાદ્ વિજ્ઞેયં તદયુક્તિમત્ ॥

અર્થક્રિયા યતો ઽસૌ વા તદન્યા વા દ્વયી ગતિઃ
તત્ત્વે ન તત્ર સામર્થ્યમ્ અન્યતસ્ તત્સમુદ્ભવાત્ ॥

ન સ્વસંધારણે ન્યાયાત્ જન્માનન્તરનાશતઃ
ન ચ નાશે ઽપિ સદ્યુક્ત્યા તદ્ધેતોસ્ તત્સમુદ્ભવાત્ ॥

અન્યત્વે ઽન્યસ્ય સામર્થ્યમ્ અન્યત્રેતિ ન સંગતમ્
તતો ઽન્યભાવ એવૈતન્ નાસૌ ન્યાય્યો દલં વિના ॥

નાસત્ સત્ જાયતે યસ્માદ્ અન્યસત્ત્વસ્થિતાવ્ અપિ
તસ્યૈવ તુ તથાભાવે નન્વ્ અસિદ્ધો ઽન્વયઃ કથમ્ ॥

ભૂતિર્ યૈષાં ક્રિયા સોક્તા ન ચાસૌ યુજ્યતે ક્વચિત્
કર્તૃભોક્તૃસ્વભાવત્વ વિરોધાદ્ ઇતિ ચિન્ત્યતામ્ ॥

ન ચાતીતસ્ય સામર્થ્યં તસ્યામ્ ઇતિ નિદર્શિતમ્
ન ચાન્યો લૌકિકઃ કશ્ચિચ્ છબ્દાર્થો ઽત્રેત્યયુક્તિમત્ ॥