સંવિત્સિદ્ધિ · શ્લોક 381-400

એવં વ્યવસ્થિતાનેક પ્રકારાકારવત્તયા ॥

પ્રત્યક્ષસ્ય પ્રપઞ્ચસ્ય તદ્ભાવો ઽશક્યનિહ્નવઃ ॥

આગમઃ કાર્યનિષ્ઠત્વાદ્ ઈદૃશે ઽર્થે ન તુ પ્રમા ॥

પ્રામાણ્યે ઽપ્ય્ અન્વયાયોગ્ય પદાર્થત્વાન્ નન્ બોધકઃ ॥

નાસત્ પ્રતીતેર્ બાધાચ્ ચ ન સદ્ ઇત્ય્ અપિ યન્ ન તત્ ॥

પ્રતીતેર્ એવ સત્ કિં ન બાધાન્ નાસત્ કુતો જગત્ ॥

તસ્માદ્ અવિદ્યયૈવેયમ્ અવિદ્યા ભવતાશ્રિતા ॥

કિંચ ભેદપ્રપઞ્ચસ્ય ધર્મો મિથ્યાત્વલક્ષણઃ ॥

મિથ્યા વા પરમાર્થો વા નાદ્યઃ કલ્પો ઽયમ્ અઞ્જસા ॥

તન્મિથ્યાત્વે પ્રપઞ્ચસ્ય સત્યત્વં દૂરપહ્નવમ્ ॥

પારમાર્થ્યે ઽપિ તેનૈવ તવાદ્વૈતં વિહન્યતે ॥

સર્વાન્ય્ એવ પ્રમાણાનિ સ્વં સ્વમ્ અર્થં યથોદિતમ્ ॥

અસતો ઽર્થાન્તરેભ્યશ્ ચ વ્યવચ્છિન્દન્તિ ભાન્તિ નઃ ॥

તથા હીહ ઘટો ઽસ્તીતિ યેયં ધીર્ ઉપજાયતે ॥

સા તદા તસ્ય નાભાવં પટત્વં વાનુમન્યતે ॥

નન્વ્ અસ્તીતિ યદ્ ઉક્તં કિં તન્માત્રં ઘટ ઇત્ય્ અપિ ॥

અર્થાન્તરં વા તન્માત્રે સદદ્વૈતં પ્રસજ્યતે ॥

અર્થાન્તરત્વે સિદ્ધં તત્ સદસદ્ભ્યાં વિલક્ષણમ્ ॥

યદ્ય્ એવમ્ અસ્તિ બ્રહ્મેતિ બ્રહ્મૌપનિષદં મતમ્ ॥

ઘટવત્સદસત્ત્વાભ્યામ્ અનિર્વાચ્યં તવાપતેત્ ॥