સંવિત્સિદ્ધિ · શ્લોક 321-340

ન ચેચ્ ચેષ્ટાવિશેષેણ પરો બોદ્ધાનુમીયતે ॥

વ્યવહારો ઽવલુપ્યેત સર્વો લૌકિકવૈદિકઃ ॥

ન ચૌપાધિકભેદેન મેયમાતૃવિભાગધીઃ ॥

સ્વશરીરે ઽપિ તત્પ્રાપ્તેઃ શિરઃપાણ્યાદિભેદતઃ ॥

યથા તત્ર શિરઃપાણિ પાદાદૌ વેદનોદયે ॥

અનુસન્ધાનમ્ એકત્વે તથા સર્વત્ર તે ભવેત્ ॥

પ્રાયણાન્ નરકક્લેશાત્ પ્રસૂતિવ્યસનાદ્ અપિ ॥

ચિરાતિવૃત્તાઃ પ્રાગ્જન્મ ભોગા ન સ્મૃતિગોચરાઃ ॥

યુગપજ્ જાયમાનેષુ (સુખદુઃખાદિષુ સ્ફુટઃ) ॥

આશ્રયાસઙ્કરસ્ તત્ર કથમ્ ઐકાર્થ્યવિભ્રમઃ ॥

ન ચ પ્રાતિસ્વિકાવિદ્યા કલ્પિતસ્વસ્વદૃશ્યકૈઃ ॥

જીવૈર્ અનેકૈર્ અપ્ય્ એષા લોકયાત્રોપપદ્યતે ॥

પરવાર્તાનભિજ્ઞાસ્ તે સ્વસ્વસ્વપ્નૈકદર્શિનઃ ॥

કથં પ્રવર્તયેયુસ્ તાં સઙ્ગાદ્યેકનિબન્ધનામ્ ॥

કિંચ સ્વયમ્પ્રકાશત્વ વિભુત્વૈકત્વનિત્યતાઃ ॥

ત્વદભ્યુપેતા બાધેરન્ સંવિદસ્ તે ઽદ્વિતીયતામ્ ॥

સંવિદ્ એવ ન તે ધર્માઃ સિદ્ધાયામ્ અપિ સંવિદિ ॥

વિવાદદર્શનાત્ તેષુ તદ્રૂપાણાં ચ ભેદતઃ ॥

ન ચ તે ભ્રાન્તિસિદ્ધાસ્ તે યેનાદ્વૈતાવિરોધિનઃ ॥

તત્ત્વાવેદકવેદાન્ત વાક્યસિદ્ધા હિ તે ગુણાઃ ॥