સંવિત્સિદ્ધિ · શ્લોક 301-320

અપિ ચ વ્યવહારજ્ઞાઃ સતિ પુષ્કલકારણે ॥

કાર્યં ન જાયતે યેન તમ્ આહુઃ પ્રતિબન્ધકમ્ ॥

ઇહ કિં તદ્ યદ્ ઉત્પત્તુમ્ ઉપક્રાન્તં સ્વહેતુતઃ ॥

અવિદ્યાપ્રતિબદ્ધત્વાદ્ ઉત્પત્તિં ન પ્રપદ્યતે ॥

ન મુક્તિર્ નિત્યસિદ્ધત્વાન્ ન બ્રહ્માસ્મીતિ ધીર્ અપિ ॥

ન હિ બ્રહ્માહમ્ અસ્મીતિ સંવિત્પુષ્કલકારણમ્ ॥

સંસારિણસ્ તદાસ્તીતિ કથં સા પ્રતિબધ્યતે ॥

યતઃ સા કારણાભાવાદ્ ઇદાનીં નોપજાયતે ॥

ન પુનઃ પ્રતિબદ્ધત્વાદ્ અસ્થાને તેન તદ્વચઃ ॥

કિંચૈકો જીવ ઇત્ય્ એતદ્ વસ્તુસ્થિત્યા ન યુજ્યતે ॥

અવિદ્યાતત્સમાશ્લેષ જીવત્વાદિ મૃષા હિ તે ॥

પ્રાતિભાસિકમ્ એકત્વં પ્રતિભાસપરાહતમ્ ॥

યતો નઃ પ્રતિભાસન્તે સંસરન્તઃ સહસ્રશઃ ॥

આસંસારસમુચ્છેદં વ્યવહારાશ્ ચ તત્કૃતાઃ ॥

અબાધિતાઃ પ્રતીયન્તે સ્વપ્નવૃત્તવિલક્ષણાઃ ॥

તેન યૌક્તિકમ્ એકત્વમ્ અપિ યુક્તિપરાહતમ્ ॥

પ્રવૃત્તિભેદાનુમિતા વિરુદ્ધમિતિવૃત્તયઃ ॥

તત્તત્સ્વાત્મવદ્ અન્યે ઽપિ દેહિનો ઽશક્યનિહ્નવાઃ ॥

યથાનુમેયાદ્ વહ્ન્યાદેર્ અનુમાના (?) વિલક્ષણાઃ ॥

પ્રત્યક્ષં (?) તે તથાન્યેભ્યો જીવેભ્યો ન પૃથક્ કથમ્ ॥