સાધનદીપિકા · અધ્યાય 5

ઇતિ પઞ્ચમ-કક્ષા ।
ષષ્ઠ-કક્ષા
શ્રી-રાધિકાયૈ નમઃ
વન્દેઽહં શ્રીલ-રાધાયાઃ પદ-ચિન્તામણિં સદા ।
શ્રી-કીર્તિદા-ગર્ભ-ખનિ-પ્રાદુર્ભૂતં સુભાસ્વરમ્

શ્રી-ગોવિન્દ-પ્રિયતમા વરેયં વૃષભાનુજા ।
તત્ સુખં નિત્યમ્ ઇચ્છન્તી વપુષા વચસા ધિયા

સ યથા ગોકુલે સાક્ષાદ્ વ્રજેન્દ્ર-સુત ઈર્યતે ।
તસ્ય કાન્તા તથા સાક્ષાદ્ વૃષભાનુ-સુતા સ્મૃતા

યદા યથેચ્છા ભવતિ નિજ-પ્રિયતમસ્ય હિ ।
તદા તથૈવ કુર્વતી તેનૈવ સહ દીવ્યતિ

મૌન-મુદ્રાં ધૃતે કૃષ્ણે વ્રજેઽસ્મિન્ પ્રકટં ગતે ।
સ્વયા તન્-મૌદ્રયા યુક્તા તત્ પૂર્વં પ્રકટં ગતા

અત્રાપિ શ્રૂયતે કાચિત્ કથા પૌરાતની શુભા ।
વિપ્રો બૃહદ્-ભાનુ-નામા દાક્ષિણાત્યઃ સુ-વૈષ્ણવઃ

ઓડ્ર-દેશ-નિવાસી સ રાધા-નગર-ગ્રામકે ।
પું-સ્ત્રી-ભાવેન તેનેયં કતિ વર્ષાણિ સેવિતા ।
યદ્ ઇયં કરુણા યસ્યાસ્ તત્ર કિઞ્ચિન્ ન દુર્ઘટમ્

શ્રી-ગોવિન્દ-સ્થાલાવાસી શ્રી-ગોપાલો દયામ્બુધિઃ ।
સાક્ષ્યં દાતું બ્રાહ્મણસ્ય સ્વપદાભ્યાં યતો ગતઃ

અદ્યાપિ રાજતે ઓડ્ર-દેશેઽસૌ ભક્ત-વત્સલઃ ।
કર્તું ન કર્તું તત્ કર્તું સમર્થો હરિર્ ઈશ્વરઃ ।
યથા હરિસ્ તથા સેયં તત્-પ્રિયા પરમેશ્વરી

તતઃ કિયદ્ દિનાન્તેઽસ્મિન્ બ્રાહ્મણેઽપ્રકટં ગતે ।
તદ્-ગ્રામ-વાસિભિર્ ગૂઢં સેવ્યતે વૃષભાનુજા

તતઃ શ્રી-રૂપ-ગોસ્વામિ-દ્વારાસ્મિન્ વૃન્દિકા-વને ।
ગોવિન્દે પ્રકટં ગતે સાક્ષાદ્ ગોપેન્દ્ર-નન્દને

શ્રીમત્-પ્રતાપરુદ્રસ્ય પુત્રઃ પરમ-સુન્દરઃ ।
મહા-ભાગવતો ધીરઃ સંમતં સાધુ-મણ્ડલૈઃ

શ્રીમત્-પણ્ડિત-ગોસ્વામિ-શિષ્યસ્ તત્રાધિકારવાન્ ।
તસ્મિન્ન્ આજ્ઞાભવદ્ રાત્રૌ શ્રી-ગોવિન્દ-પ્રિયા-મણેઃ

મત્-પ્રાણનાથો ગોવિન્દઃ સાક્ષાચ્ છ્રી-નન્દનન્દનઃ ।
રૂપ-દ્વારા વ્રજે તસ્મિન્ન્ ઇદાનીં પ્રકટં ગતઃ

શીઘ્રં યાસ્યામિ તત્રાહં નોચિતાત્ર સ્થિતિર્ મમ ।
નામ્ના ગદાધરઃ ખ્યાતો મદ્-રૂપઃ પણ્ડિતઃ સુધીઃ

પ્રસ્થાપયતુ માં યત્ર શિષ્ય-દ્વારા ત્વરાન્વિતઃ ।
સોઽપિ તદ્-વચનં શ્રુત્વા રાજા પરમ-વિસ્મિતઃ

તદાનેનૈવ રૂપેણ શ્રીશ્વરી પ્રાપિતા વ્રજે ।
રાધા-ગદાધર-પ્રિય-શિષ્ય-યુગ્મેન ધીમતા

પથિ સંસેવ્ય સંસેવ્ય સાનીતા પરમેશ્વરી ।
યદા મદ્-ઈશ્વરી રાધા ગોવિન્દ-વામ-પાર્શ્વગા ।
ભવેત્ તદૈવાસ્ય શોભા-વિશેષો હિ વિવર્ધતે

અત્ર પ્રમાણં શ્રી-ગોવિન્દ-લીલામૃતે (13.32)-
રાધા-સઙ્ગે યદા ભાતિ તદા મદન-મોહનઃ ।
અન્યથા વિશ્વ-મોહોઽપિ સ્વયં મદન-મોહિતઃ ॥
શ્રી-ભાગવતે ચ તત્રાતિશુશુભે તાભિઃ (10.33.6) ઇતિ ।
અસ્યાઃ સૌન્દર્ય-માધુર્ય-સૌશીલ્યાદિકમ્ એવ યત્ ।
દર્શનાદ્ એવ જ્ઞાતવ્યં તસ્માન્ નાત્ર વિલિખ્યતે