સભિકસૌગતશાસનપ્રવ્રજ્યાવ્રતચરણપરિવર્ત · શ્લોક 21-40

તત્ પ્રદત્તાં સમાદાય સધાત્રીં સોપચારિકાં ।
દત્વા ભદ્રાશિષં તસ્મૈ શિરી નામા તતો ઽચરત્*

તત્ર સા સ્વાશ્રમે ગત્વા સધાત્રીં તાં પ્રમોદિતા ।
સ્વાત્મજામ્ ઇવ સંપાલ્ય સહસા સમપોષયત્

એવં સંપાલ્યમાના સા દિને દિને ઽભિવર્ધિતા ।
પરિપુષ્ટેન્દ્રિયા કાન્તા સર્વમનોહરાભવત્

તતસ્ તયાનુશાસિન્યા પ્રવ્રાજિતા યથાવિધિં ।
સા યતિસંવરં ધૃત્વા કાષાયચીવરાચરત્

તતઃ સા સુમતી કન્યા સર્વા લિપીર્ અશિક્ષત ।
તતઃ ક્રમેણ સર્વાણિ શાસ્ત્રાણિ સમશિક્ષત

એવમ્ અધીત્ય સા વિજ્ઞા સર્વવિદ્યાન્તપારગા ।
મહાધીર્ ઇતિ નામાભૂત્ સુબુદ્ધિત્વાત્ ત્રિયન્ત્રિકા

ક્રમેણ કુટિલાંગી સા શાલપ્રોચ્ચાભવત્ સુધીઃ ।
નિજધર્માનુભાવેન પૂર્વપાપક્ષયં ગતે

ચતુઃષષ્ટિ કલાધીતા વેદાધ્યયનચાતુરી ।
સર્વવાદિમનોત્રાસં સંહરન્તી વ્યરાજત

સર્વે ઽપિ વાદિનો વિજ્ઞાસ્ તાં જેતું નૈવ શેકિરે ।
સૈવ પ્રવાદિનઃ સર્વાન્ વિનિર્જિત્યાભ્યરાજત

તત્ કીર્તિસુરભિસ્ તસ્યાઃ સમન્તતઃ પ્રસારિતા ।
તત્ સુમતિં સમકર્ણ્ય સર્વે ઽતિવિસ્મયં યયુઃ

તદા તત્ર દ્વિજો વિદ્વાન્ સર્વવેદાન્તપારગઃ ।
વિદ્યાકરાભિધો માની દક્ષિણાતઃ સમાગતઃ

સ પાર્શ્વં તામ્રપટ્ટેન વેષ્ટયિત્વા સમુન્મનાઃ ।
ઉલ્કામ્ ઉજ્વાલિતાં ધૃત્વા પુરે તત્ર મુદાવિશત્

યો મયા સહ સંવાદં કર્તુમ્ અત્ર સમિચ્છતિ ।
તસ્યાહમ્ ઉપગચ્છેયમ્ ઇતિ માની મુદાચરત્

તમ્ આયાતં સમાલોક્ય માથુરિકા મહાજનાઃ ।
તં દ્વિજં સમુપામન્ત્ર્ય સર્વે પ્ય્ એવં બભાષિરે

સાધો માત્ર સમાગચ્છ ધૃત્વોલ્કાં જ્વલિતામ્ ઇમાં ।
યા પરિવ્રાજિકા સાધ્વી સા પ્રાજ્ઞા વિદ્યતે સતી

ઇતિ તૈર્ ગદિતં શ્રુત્વા વિદ્યાકરો ઽતિમાનિકઃ ।
માથુરિકાન્ ઉપાસૃત્ય સાહંકારઃ સમબ્રવીત્

કા પરિવ્રાજિકા પ્રાજ્ઞા વિદ્યતે ઽત્ર કુહાશ્રિતા ।
તામ્ અહં દ્રષ્ટુમ્ ઇચ્છામિ તદ્ દર્શયિતુમ્ અર્હથઃ

ઇતિ તદુક્તમ્ આકર્ણ્ય સર્વે ઽપિ તે મહાજનાઃ ।
બ્રાહ્મણં તં સમાલોક્ય સંપ્રષ્ટુમ્ એવમ્ અબ્રવીત્

સાધો યદિ તયા સાર્ધં સંવાદં કર્તુમ્ ઇચ્છસિ ।
તાં કાન્તાં સુમતિં વિજ્ઞાં દર્શયિષ્યામહે વયં

ઇતિ સર્વૈર્ અપિ પ્રોક્તં શ્રુત્વા સ બ્રાહ્મણો મુદા ।
સંપશ્યન્સ્ તાન્ જનાન્ સર્વાન્ પુરઃ સ્થિત્વૈવમ્ અબ્રવીત્