સભિકસૌગતશાસનપ્રવ્રજ્યાવ્રતચરણપરિવર્ત · શ્લોક 142-161

યત્ સભાયાં પ્રજાતો ઽયં તેનાસ્ય નન્દનસ્ય મે ।
સભિક ઇતિ વિખ્યાતં નામ ભવતુ સર્વતઃ

ઇત્ય્ આખ્યાય પિતા તસ્ય દારકસ્ય યથાર્થતઃ ।
સભિક ઇતિ પ્રખ્યાતં નામ કૃત્વાત્યસારયત્

તતઃ સ દારકો માત્રા પિત્રાપિ સંપ્રપાલિતઃ ।
પરિપુષ્ટેન્દ્રિયો વૃદ્ધો બભૂવાશુ મનોહરઃ

તતઃ સ સભિકો ધીમાન્ અશિક્ષત લિપીઃ ક્રમાત્ ।
સર્વશાસ્ત્રાણ્ય્ અધીત્યાશુ મહાવાદિત્વમ્ આયયૌ

એવં સ વાદિજિદ્ વિજ્ઞઃ સર્વવિદ્યાવિચક્ષણઃ ।
વિદ્યાભિમાનિનઃ સર્વાન્ પરાજેતું સમૈચ્છત

તતો ઽનુજ્ઞાં સમાસાદ્ય પિત્રોઃ સો ઽત્યતિમાનિકઃ ।
પ્રવ્રજિત્વા ગુરોર્ આજ્ઞાં ધૃત્વાચરદ્ યતિવ્રતં

યસ્ય માતા મહાપ્રાજ્ઞા વિદ્યાકરઃ પિતા તથા ।
અતો ઽતિમાની સભિકઃ સ્વયં વિદ્યાવિચક્ષણઃ

તતઃ સ માનિનો જેતું સમુદ્રાન્તિક આશ્રમે ।
મહર્ષીન્ બ્રાહ્મણાન્ વિજ્ઞાન્ સંદ્રષ્ટું સમુપાચરત્

તત્ર સ વાદિનઃ સર્વાન્ સર્વશાસ્ત્રપ્રવાદિતે ।
જિત્વા વિજયમ્ આસાદ્ય સમભ્યાનન્દિતો ઽચરત્

તતો ઽન્યત્રાશ્રમે ગત્વા સ સભિકો વ્યલોકયત્ ।
તથા પ્રવાદિનઃ સર્વાઞ્ જિત્વા જયં સમાયયૌ

એવં સ સભિકો ગત્વા ષોડશનગરેષ્વ્ અપિ ।
સર્વાન્ પ્રવાદિનો જિત્વા જયકીર્તિશ્રિયં યયૌ

તતઃ સ સભિકઃ સર્વવિદ્યામદાભિમાનિકઃ ।
સર્વાન્ પ્રવાદિનો જેતું મનસૈવં વ્યચિન્તયત્

સંબુદ્ધો ઽસૌ મહાભિજ્ઞઃ સર્વજ્ઞો ઽર્હન્ મુનીશ્વરઃ ।
સર્વવાદિવિજેતેતિ પ્રથિતં સર્વતો ઽધુના

તદ્ અહં તસ્ય મુનીન્દ્રસ્ય જગચ્છાસ્તુર્ મહામતેઃ ।
પ્રજ્ઞાવિશેષમ્ આજ્ઞાતું ગમિષ્યામિ તદાશ્રમે

જેતું ન શક્યતે બુદ્ધઃ ક્ષત્રિયાત્મજ એવ સઃ ।
રણકાલે તુ વીરાસ્ તે ક્ષત્રિયાઃ શાસ્ત્રવૈમુખાઃ

વિદ્યાકરો મમ પિતા મહાધીર્ જનની પુનઃ ।
સ્વયં વિદ્યાબ્ધિપારશ્ ચ સર્વવાદિમદાપહઃ

ઇતિ સ સભિકો ધ્યાત્વા વારાણસ્યાં જિનાશ્રમે ।
મૃગદાવે ભ્રમન્ ગત્વા સમીક્ષ્ય સમુપાચરત્

તત્ર સભાસનાસીનં સર્વલોકસમાવૃતં ।
દદર્શ સ મુનીન્દ્રં તં પૂર્ણેન્દુમ્ ઇવ ભાસ્કરં

તં દૃષ્ટ્વા સ મહામાની વિસ્મયાક્રાન્તમાનસઃ ।
વિભિન્નવદનસ્ તસ્થૌ પશ્યન્ નિશ્ચલિતેન્દ્રિયઃ

તતો ધૈર્યં સમાલમ્બ્ય મદમાનં વિહાય સઃ ।
પ્રણત્વા સાઞ્જલિસ્ તત્ર સંપશ્યન્ સમુપાચરત્