સભિકસૌગતશાસનપ્રવ્રજ્યાવ્રતચરણપરિવર્ત · શ્લોક 121-141

એકસ્મિન્ન્ એવ દિવસે મહાધીસ્ તેન નિર્જિતા ।
કથમ્ અત્ર સંદેહ ઇતિ સર્વે સવિસ્મયાઃ

ઇતિ સર્વૈઃ સમાખ્યાતં શ્રુત્વા સ બ્રાહ્મણો મુદા ।
તાં પરિવ્રાજિકાં પશ્યન્ વિહસન્ન્ એવમ્ અબ્રવીત્

અયિ ભદ્રે સમાયાહિ યથાભિસમયં કૃતમ્ ।
તથાનુગત્વમ્ આસાદ્ય ચર ધર્મં મમાનુગા

ઇતિ તદુક્તમ્ આકર્ણ્ય સા પરિવ્રાજિકા સ્મિતા ।
લજ્જાભિહતચિત્તેવ તસ્થાવ્ અભિનતાનના

તતઃ સ મુદિતો વિપ્રો દણ્ડં ચ્છત્રમ્ ઉપાનહં ।
દત્વા તાં સહસામન્ત્ર્ય સમાશ્વાસ્યૈવમ્ અબ્રવીત્

અયિ ભદ્રે તથા સિદ્ધં યથા મયા સમીહિતં ।
તત્ ત્વં મુદા મયા સાર્ધં સુખં ચર સમાવ્રજ

ઇતિ તત્ કથિતં શ્રુત્વા સા પરિવ્રાજિકા તતઃ ।
દણ્ડમ્ ઉપાનહૌ ચ્છત્રં ગૃહીત્વા પ્રસ્થિતા શનૈઃ

તતઃ સ બ્રાહ્મણો ધૃત્વા તાં પરિવ્રાજિકાં મુદા ।
વિજયશ્રીમહોત્સાહૈર્ વાસાલયમ્ ઉપાચરત્

તત્ર વાસે સમાશ્રિત્ય વિદ્વાન્ સો ઽત્યભિનન્દિતઃ ।
તયા સાર્ધં યથાકામં ભુંજમાનો ઽરમત્ સુખં

તત્રૈવં રમ્યમાણાસૌ તેન ભર્ત્રાતિરાગિના ।
કાલ આપન્નસત્વાભૂત્ પ્રાવૃષીવ ઘનો ઽમ્બુભૃત્

તતઃ ક્રમેણ સા નારી સંપ્રવર્ધિતગર્ભિણી ।
કૃશાંગી પાણ્ડુવર્ણાભૂન્ મૃદુવાગ્ મન્દગામિની

ગર્ભિણી સા પરિજ્ઞાય નિન્દ્યમાના મહાજનૈઃ ।
લજ્જાસંકોચિતસ્વાન્તા ભર્તારમ્ આહ તં દ્વિજં

સ્વામિન્ ભવાન્ વિજાનાતુ યદ્ અહં ગર્ભિણી ભવે ।
તલ્ લોકૈર્ નિન્દ્યમાનાત્ર કથં ચરેય સાંપ્રતં

તદ્ અન્યવિષયે ગત્વા સ્થાતુમ્ ઇચ્છતિ મે મનઃ ।
યદીચ્છસિ મયા સાર્ધં રન્તું પ્રેહિ વ્રજેવહિ

ઇતિ તયા સમાખ્યાતં શ્રુત્વા સ બ્રાહ્મણસ્ તથા ।
અન્યત્ર વિષયે ગન્તું તયા સાર્ધં સમૈચ્છત ॥135 ॥
તતસ્ તૌ મથુરાં ત્યક્ત્વા જગ્મતુર્ દક્ષિણાપથં ।
જનપદચારિકાં તત્ર ચરિત્વા સુખમ્ આપતુઃ

તત્ર શ્વેતવલાકાખ્યે પુરે તૌ દમ્પતી મુદા ।
ગત્વા રાત્રૌ સમાશ્રિત્ય ન્યૂષતુઃ પરિખેદિતૌ

તત્ર સા નવમાસાનામ્ અત્યયાત્ સમયાગતે ।
મઠે લોકસભોનાન્તે પ્રાસૂત લઘુદારકમ્

આત્મજં તં સમાલોક્ય સુવર્ણમ્ અભિસુન્દરં ।
સા માતા વિસ્મિતસ્વાન્તા તસ્થૌ લજ્જાનતાનના

જનકોઽ પિ તમ્ આલોક્ય વિજ્ઞો ઽયં હિ ભવેદ્ અપિ ।
ઇતિ મત્વા ચિરં પશ્યન્સ્ તસ્થૌ સંહર્ષિતાશયઃ

તતઃ સ જનકસ્ તસ્ય કૃત્વા જાતિમહં સ્વયં ।
નામાસ્ય કિં કરિષ્યે ઽહમ્ ઇતિ ધ્યાત્વૈવમ્ અબ્રવીત્